កំពូលតារាសម្ដែងថៃរូបសង្ហា ត្រូវបានមហាជនសរសើរថាជាមនុស្សសាមញ្ញ ចូលចិត្តដាក់ខ្លួន ព្រោះទោះជាមានកេរ្តិ៍ឈ្មោះល្បីល្បាញនិងមានទ្រព្យសម្បត្តិច្រើន បែរជាប្រើជីវិតដូចមនុស្សធម្មតាឡើងជិះរថភ្លើងអគ្គីសនីមិនជិះឡានទំនើបដូចជាតារាមួយចំនួនទៀត។ យ៉ាងណាមិញទន្ទឹមនឹងពាក្យសរសើរតារាប្រុសដ៏សង្ហាកូនកាត់ថៃអូស្ត្រាលី ក៏ត្រូវបានមនុស្សមួយភាគទៀតរិះគន់ ថាតារារូបនេះឡើងជិះរថភ្លើងដោយមិនមានពាក់ម៉ាស ថែមទាំងឈរផ្អែកមាត់ទ្វារថែមទៀត ដែលនេះគឺជាគំរូមួយមិនល្អទាល់តែសោះ។
រឿងនេះកំពុងតែក្លាយជារឿងមានចាប់អារម្មណ៍និងបង្កឱ្យមានការជជែកវែកញែកគ្នាបែកផ្សែង ក្រោយមានហ្វេនរបស់ Nadech បានយកវីដេអូតារារូបនេះមកផុសបង្អួតគ្នា ថាបានឡើងជិះរថភ្លើងអគ្គីសនី BTS ជាមួយតារាល្បី ដោយក្នុងវីដេអូនោះ Nadech កំពុងឈរលេងទូរស័ព្ទដៃមុនច្រកទ្វារចេញចូល។
បន្ទាប់ពីវីដេអូនោះត្រូវបានបញ្ចេញមកខាងក្រៅមនុស្សជាច្រើននាក់បានចាប់អារម្មណ៍ទៅលើរូបរាងនិងមុខមាត់ដ៏សង្ហារបស់តារារូបនេះ ប៉ុន្តែក្នុងនោះមានអ្នកលេងបណ្ដាញសង្គមខ្លះបែរជាចូលមក បញ្ចេញយោបល់ ផ្ទុយពីការសរសើរដោយបានរិះគន់ និងដាក់បន្ទុកលើបុរសសង្ហានេះថា មិនមានពាក់ម៉ាសការពារឱ្យបានម៉ត់ចត់និងត្រឹមត្រូវ ក្នុងខណៈដែលជំងឺកូវីដនៅរាតត្បាត ថែមទាំងឈរផ្អែកទ្វារចេញចូលទៀត។
«ហេតុអីមិនពាក់ម៉ាស់ អ្នកផ្សេងៗទៀតគេពាក់គ្រប់គ្នា, ពាក់ម៉ាសទៅអ្នកកំលោះ យ៉ាងណាក៏នៅតែសង្ហាទម្លុះម៉ាសដែរ, ខ្ញុំចាក់ដូសទី៥ហើយ គ្រាន់តែជិះឡានក្រុងទៅខេត្ត ស្រាប់តែឆ្លងកូវីដ-១៩ភ្លាម, ជាតារាមានសិទ្ធិលើសពីអ្នកផ្សេងៗមែន?,ទោះជារដ្ឋបាលប្រកាសមានការលើកលែងការពាក់ម៉ាសនៅទីសាធារណៈក្ដី ប៉ុន្តែបើឡើងជិះរថភ្លើងអគ្គិសនី BTS ចាំបាច់ត្រូវតែពាក់ម៉ាសអនាម័យគ្រប់ពេល ក្នុងពេលធ្វើដំណើរដើម្បីសុខសុវត្ថិរបស់អ្នករួមដំណើរ ដោយក្ដីបារម្ភ។
ទោះជាមានមតិរិះគន់ច្រើនចំពោះបុរសសង្ហារូបនេះ ចំពោះបញ្ហាពាក់ម៉ាស់ ប៉ុន្តែក៏មានអ្នកគាំទ្រលោកបានចេញមកជួយការពារដែរថា៖ បើធ្វើដំណើរទៅបរទេសនឹងដឹងហើយថាគេមិនបាច់ឱ្យពាក់ម៉ាស់ទៀតទេ ប៉ុន្តែមានប្រទេសខ្លះនៅមានអ្នកពាក់ ដោយអាស្រ័យលើការស្ម័គ្រចិត្តពីបុគ្គលខ្លួនឯង។ ចំណែកករណី Nadech គេមិនពាក់ម៉ាស់គឺជាសិទ្ធិរបស់គេ បើយើងខ្លាចចង់ពាក់ក៏ពាក់ទៅគ្មានអ្នកណាថាទេ តែកុំទៅពាក់ព័ន្ធ ឱ្យគេពាក់ម៉ាស់ឬមិនពាក់ម៉ាស់ ចង់ពាក់ឬមិនពាក់វាជាសិទ្ធិរបស់បុគ្គល។ នៅមិនអស់ត្រឹមតែប៉ុណ្ណេះទេ គេមិនបានបង្គាប់ឱ្យអ្នកណាម្នាក់ត្រូវតែពាក់ម៉ាស់ពេលឡើងជិះ BTS នោះឡើយគេគ្រាន់តែស្នើសុំឱ្យពាក់ម៉ាស់នៅពេលដែលមនុស្សណែនណាន់ប៉ុណ្ណោះ តែបើមិនមានមនុស្សច្រើនទេនោះ មិនពាក់ក៏មិនអីដែរ។ ពេលនេះមានមនុស្សច្រើនណាស់ដែលមិនពាក់ម៉ាស់ មិនមែនមានតែ Nadech នោះទេ មានមនុស្សច្រើនណាស់ដែលដើរផ្សារ ដើរតាមហាងមិនពាក់ម៉ាស់នោះ៕