ក្រុមបាល់ទាត់យុវជនក្រោមអាយុ២០ឆ្នាំរបស់កម្ពុជា ធ្លាប់ឡើងផុតវគ្គចែកពូលនៃពានរង្វាន់កម្រិតទ្វីបអាស៊ី រហូតដល់ទី៤ដង ប៉ុន្តែលើកចុងក្រោយឆ្នាំ២០២០ កន្លងទៅត្រូវលុបចោលដោយសាររងផលប៉ះពាល់ពីកូវីដ-១៩។
ពានរង្វាន់បាល់ទាត់យុវជនក្រោមអាយុ២០ឆ្នាំប្រចាំទ្វីប AFC U-20 Asian Cup រៀបចំឡើងដំបូងពីឆ្នាំ១៩៥៩ មកម៉្លេះ រាល់១ឆ្នាំម្តង ប៉ុន្តែចាប់ពីឆ្នាំ២០០៨ មកមានការផ្លាស់ប្តូររៀបចំរាល់២ឆ្នាំម្តងវិញ។ ការប្រកួតនេះក៏ជាការចំរាញ់យកក្រុមខ្លាំងតំណាងឱ្យទ្វីបអាស៊ី ចូលរួមក្នុងពានរង្វាន់ជើងឯកពិភពលោក U20 FIFA World Cup ផងដែរ។
ចំណែកក្រុមកម្ពុជា វិញធ្លាប់បង្កើតកំណត់ត្រាឆ្លងដល់វគ្គចែកពូលចំនួន៤លើក ឯណោះ៖
លើកទី១ឆ្នាំ១៩៦៣៖ការប្រកួតធ្វើឡើងនៅរដ្ឋ Penang ប្រទេសម៉ាឡេស៊ី ពីថ្ងៃទី១៨ ដល់២៨ ខែមេសាឆ្នាំ១៩៦៣ ដោយមានក្រុមចូលរួមចំនួន១២ ចែកជា២ពូល។ កម្ពុជា ស្ថិតក្នុងពូល A ជាមួយម៉ាឡេស៊ី ថៃ ភូមា (មីយ៉ាន់ម៉ា) ឥណ្ឌា និងហ្វីលីពីន ហើយពូល B មានកូរ៉េខាងត្បូង ហុងកុង វៀតណាមខាងត្បូង សិង្ហបុរី ជប៉ុន និង ស្រីលង្កា។
ជាលទ្ធផលសម្រាប់ក្រុមកម្ពុជា ក្នុងវគ្គចែកពូលមាន៖
-ថៃ ៤-០ កម្ពុជា
-ម៉ាឡេស៊ី ០-១ កម្ពុជា
-កម្ពុជា ៦-២ ហ្វីលីពីន
-ឥណ្ឌា ២-០ កម្ពុជា
-ភូមា ៤-០ កម្ពុជា
ក្នុងនាម១ពូល A ក្រុមភូមា ត្រូវប៉ះក្រុមកូរ៉េខាងត្បូង លេខ១មកពូល B យកជើងឯកហើយលទ្ធផល នៅវគ្គផ្ដាច់ព្រ័ត្រ គឺស្មើគ្នា២ទល់២។ ដូច្នេះចែកពានគ្នាកាន់ពាក់កណ្ដាលឆ្នាំម្នាក់។
លើកទី២ឆ្នាំ១៩៧២៖ នេះជាការប្រកួតលើកទី១៤ ហើយ ខណៈសម្រាប់កម្ពុជា បានចូលរួមជាលើកទី២ ដោយប្រើឈ្មោះជាសាធារណៈរដ្ឋខ្មែរ ដែលធ្វើឡើងនៅរាជធានីបាងកក ប្រទេសថៃ ចាប់ពីថ្ងៃទី១៤ ដល់៣០ខែមេសា ខណៈក្រុមចូលរួមសរុបទាំង១៧ ត្រូវបែងចែកជា៤ពូល។
ពូល A មានអ៊ីស្រាអែល, ថៃ, ឥណ្ឌា និងនេប៉ាល់ ពូល B មានជប៉ុន, សិង្ហបុរី,ម៉ាឡេស៊ី,ហុងកុង និងប្រ៊ុយណេ ពូល C មានភូមា (មីយ៉ាន់ម៉ា), ឥណ្ឌូណេស៊ី,តៃវ៉ាន់ និងកម្ពុជា ពូល D មានកូរ៉េខាងត្បូង,អ៊ីរ៉ង់,ឡាវ និងហ្វីលីពីន។
លទ្ធផលរបស់ក្រុមកម្ពុជា មាន៖
-ភូមា ៥-០ កម្ពុជា
-តៃវ៉ាន់ ០-០ កម្ពុជា
-ឥណ្ឌូណេស៊ី ៣-០ កម្ពុជា
វគ្គផ្ដាច់ព្រ័ត្រ ក្រុមអ៊ីស្រាអែល យកឈ្នះកូរ៉េខាងត្បូង ដោយលទ្ធផល ១ទល់០ ហើយជាពានដែលអ៊ីស្រាអែល ឈ្នះលើកទី៦ របស់ខ្លួនផងដែរ។
លើកទី៣ឆ្នាំ១៩៧៤៖ ថៃ បន្តធ្វើជានៅរាជធានីបាងកក ដដែល ចាប់ពីថ្ងៃទី១៤ដល់៣០ខែមេសា ដែលមានក្រុមចូលរួមចំនួន១៦ក្រុម ក្នុងនោះចែកជា៤ពូល។ ចំណែកកម្ពុជា បន្តប្រើឈ្មោះសាធារណៈរដ្ឋខ្មែរដដែល។ ពូល A មានអ៊ីរ៉ង់,សិង្ហបុរី,វៀតណាមខាងត្បូងនិងហ្វីលីពីន ពូល B មានឥណ្ឌា,ហុងកុង,ភូមា (មីយ៉ាន់ម៉ា) និងឡាវ ពូល C មានកូរ៉េខាងត្បូង,ម៉ាឡេស៊ី,កម្ពុជា និងនេប៉ាល់ ពូល D មានថៃ ជប៉ុន តៃវ៉ាន់ និងប្រ៊ុយណេ។
លទ្ធផលរបស់កម្ពុជាមាន៖
-ម៉ាឡេស៊ី ២-១ កម្ពុជា
-កម្ពុជា ៦-២ នេប៉ាល់
-កូរ៉េខាងត្បូង ២-០ កម្ពុជា
វគ្គផ្ដាច់ព្រ័ត្រ ក្រុមឥណ្ឌា និងអ៊ីរ៉ង់ បានប្រកួតស្មើគ្នា ២ទល់២ ហើយចែកពានគ្នាពាក់កណ្ដាលឆ្នាំម្នាក់។
លើកទី៤ ឆ្នាំ២០២០៖ អស់រយៈពេលដល់ទៅក្បែរ៥០ឆ្នាំទើបក្រុមកម្ពុជា មានឱកាសចូលដល់វគ្គចែកពូលម្តងទៀត ក្រោយស្ថិតក្នុងបញ្ជីប្រទេសចំនួន១៦ឆ្លងផុតវគ្គជម្រុះ។ ប៉ុន្តែការប្រកួតត្រូវបានសហព័ន្ធកីឡាបាល់ទាត់អាស៊ី រំសាយចោលវិញដោយសារស្ថានភាពកូវីដ-១៩ ក្នុងតំបន់និងពិភពលោក ផ្ទុះខ្លាំង ខណៈប្រទេសអ៊ូបេគីស្ថាន ទទួលសិទ្ធិធ្វើជាម្ចាស់ផ្ទះពីថ្ងៃទី១៤ ដល់៣១ ខែតុលា ឆ្នាំ២០២០។
មុនឈានដល់វគ្គ១៦ក្រុមចុងក្រោយនេះ កម្ពុជា បានឈរឈ្មោះជាក្រុមលេខ២ល្អប្រចាំពូល G ក្នុងនាមជាម្ចាស់ផ្ទះ។ ប្រកួតលើទីលានពហុកីឡដ្ឋានជាតិ ក្នុងរាជធានីភ្នំពេញ ក្រុមកម្ពុជា បានចាញ់ម៉ាឡេស៊ី ៥-៤ ហើយឈ្នះកោះ Northern Mariana Islands ៩-០ បន្តឈ្នះថៃ ២-១ និងឈ្នះប្រ៊ុយណេ ៣-០។
ដោយឡែកការប្រកួតនៅឆ្នាំ២០២២ នេះនឹងត្រូវធ្វើការជម្រុះ រកក្រុមខ្លាំងទាំង១៦ ឡើងទៅវគ្គចុងក្រោយដែលធ្វើនៅប្រទេសអ៊ូបេគីស្ថាន ក្នុងខែមីនា ឆ្នាំ២០២៣ ខាងមុខ។ ក្នុងវគ្គជម្រុះនេះមានក្រុមចូលរួមចំនួន៤៤ ប្រទេសដោយចែកជា១០ពូល។ កម្ពុជា ស្ថិតក្នុងពូល ជាមួយម្ចាស់ផ្ទះតាជីគីស្ថាន សិង្ហបុរី និង លីបង់។ ក្រុមលេខ១តាមពូលមានឈ្មោះឡើងទៅជុំបន្ត ហើយក្រុមលេខ២ល្អជាងគេក្នុងចំណោម១០ពូល ចំនួន៥ក្រុមក៏កក់សំបុត្រយន្តហោះទៅអ៊ូបេគីស្ថាន ដែរ៕