ពាក្យចាស់លោកពោលថាបើជាគូនឹងគ្នាហើយ ទោះទៅដល់ជើងមេឃក៏គង់នឹងវិលមកជួបគ្នាវិញ ប្រៀបដូចជាគូស្នេហ៍តារាថៃទាំងប៉ុន្មានគូនេះដែលទោះជាបានបែកបាក់ចែកផ្លូវគ្នាដោយបញ្ហាផ្សេងៗ តែទីបំផុតក្ដីស្រលាញ់បានធ្វើឱ្យអ្នកទាំងអស់នោះវិលត្រលប់មកជួបជុំគ្នាវិញ។ ចង់ដឹងថាមានគូណាខ្លះ សូមតាមដាននៅខាងក្រោមនេះ៖
១. AUM Patchrapa-Pok [Hi-So] (លែងចង់ត្រឹមធ្វើជាមិត្តភក្ដិ)
សម្រាប់គូស្នេហ៍តារាសម្ដែងលេខ១របស់ថៃ AUM Patchrapa និងគូស្នេហ៍កំលោះ HiSo អាចចាត់ទុកថាជាគូដ៏ស័ក្តិសមបំផុតនិងត្រូវបានមហាជនផ្ដោតការចាប់អារម្មណ៍ខ្លាំងចាប់តាំងពីអ្នកទាំងពីរចាប់ផ្ដើមទំនាក់ទំនងកាលពី៣ឆ្នាំមុន (២០១៨) ព្រោះរាល់រូបថតរបស់ Aum នៅក្នុងកម្មវិធីខួបកំណើតរបស់មិត្តភក្ដិរមែងមានអ្នកកំលោះ Hiso រូបនេះរួមជាមួយជានិច្ច ប៉ុន្តែទំនាក់ទំនងនោះមិនទាន់ត្រូវបានគេសន្មតថាជាការពិតឬក៏អត់នោះទេ ព្រោះមិនមានការបញ្ជាក់ពី AUM។ សម្ព័ន្ធភាពលើសពីមិត្តធម្មតានេះចាប់ផ្ដើមច្បាស់ឡើងនៅក្នុងថ្ងៃខួបកំណើត AUM ដែលមានមិត្តភក្ដិស្និទ្ធស្នាលមកចូលរួមជាច្រើននាក់ ក៏មាន HiSo Pok ចូលរួមដែរ។ ជាងនោះទៀតអ្នកកំលោះរូបនេះ គឺជាអ្នកនៅពីក្រោយការរៀបចំកម្មវិធីខួបកំណើតលើកនេះទៀតផង ក្រោយពីកម្មវិធីខួបកំណើត ក៏ចាប់ផ្ដើមមានរូបភាពផ្អែមល្ហែមរវាងអ្នកទាំងពីរចេញមកជាបន្តបន្ទាប់។ ប៉ុន្តែដូចពាក្យចាស់លោកពោលទុកថា «ផ្កាកុលាបរមែងមានបន្លា រីឯស្នេហាតែងមានឧបសគ្គ» ព្រោះកាលពីឆ្នាំ២០១៩ ព័ត៌មានចចាមអារ៉ាមរឿងបែកបាក់អ្នកទាំងពីរចាប់ផ្ដើមលេចឮច្រើនឡើងៗ រហូត AUM បានចេញមកផ្ដល់បទសម្ភាសថាទំនាក់ទំនងអ្នកទាំងពីរនៅត្រឹមតែជាមិត្តភក្ដិប៉ុណ្ណោះ ក្រោយពីនោះមួយរយៈក៏ស្រាប់តែមានរូបភាពAUM និងគូស្នេហ៍ដដែលនេះលេចចេញមកបង្អួតកែវភ្នែកមហាជនតាមរយៈរូបភាពផ្អែមល្ហែមក្នុងដំណើរកម្សាន្តផ្សេងៗ ទីបំផុតស្នេហាដែលអ្នកទាំងពីរមានចំពោះគ្នាបានទម្លាយកំពែងឧបសគ្គហើយត្រលប់មកស្រលាញ់គ្នាល្អូកល្អិនលើសដើមរហូតមកដល់ពេលនេះមានរយៈពេល៤ឆ្នាំឈានចូល៥ឆ្នាំហើយ។
២. Peak pattarasaya – Todd [Hi-So] (ចិត្តនឹកគ្មានអ្នកណាអាចហាមឃាត់បាន)
សម្រាប់គូស្នេហ៍រវាងតួឯកស្រី Diary Tootsie The Series និងអ្នកកំលោះ Todd HiSo កូនសេដ្ឋីព្រោះបើរំលឹកថយក្រោយកាលពីបុណ្យនៃក្ដីស្រលាញ់ឆ្នាំ២០១៨ ភាគីខាងស្រីបានបង្ហោះរូបគូជាមួយនឹងកំលោះតតព្រមទាំងបញ្ជាក់ពីឋានៈរវាងអ្នកទាំងពីរថាជាគូស្នេហ៍នឹងគ្នាក្រោយលួចទាក់ទងគ្នាស្ងាត់ៗ៥ខែ ដោយភីកបានប្រាប់ថាពេញចិត្តត្រង់ខាងប្រុសជាប្រុសគួរឱ្យស្រលាញ់និងពោរពេញដោយភាពកក់ក្ដៅ។ នៅពេលបង្ហាញពីទំនាក់ទំនងជាសាធារណៈហើយ រូបភាពស្និទ្ធស្នាលសែនផ្អែមល្ហែមរវាងអ្នកទាំងពីរចាប់ផ្ដើមចេញមកជាបណ្ដើរៗ ប៉ុន្តែនៅឆ្នាំ២០១៩ ស្រាប់តែមានលេចឮដំណឹងថាគូស្នេហ៍ទាំងពីរចាប់ផ្ដើមមានបញ្ហាហើយនៅដើមឆ្នាំ២០២០ ភីគបានចេញមកទទួលស្គាល់ថាស្នេហារវាងអ្នកទាំងពីរបានដើរមកដល់ផ្លូវទាល់ ដូច្នេះបាននិយាយគ្នាស្រុះស្រួលគ្នា និងបែកគ្នាដោយសន្តិវិធី។ ភីគបាននិយាយទៀតថាទុកពេលឱ្យបេះដូងទំនេរ ប៉ុន្តែរំលងបាន៦ខែស្រាប់តែ មានរូបភាពភីគនិងកំលោះ Hiso តត ចេញមកបង្អួតខ្សែភ្នែកមហាជន គ្រាន់តែលើកនេះអ្នកទាំងពីរមិនត្រឹមតែបណ្ដើរគ្នាលម្ហែនៅមាត់សមុទ្រប្រកបដោយបរិយាកាសស្រស់ស្រាយនោះទេ ថែមទាំងបន្ថែមរសជាតិផ្អែមរហូតសមុទ្រសឹងតែប្ដូរពីរសជាតិប្រៃមកផ្អែម។ ក្រោយពី Trip កម្សាន្តដ៏ផ្អែមល្ហែមនៅមាត់សមុទ្ររួចមកក៏ចាប់ផ្ដើមមានរូបភាពផ្អែមល្ហែមរវាងអ្នកទាំងពីរចេញមកជាញឹកញាប់ ថែមទាំងរូបភាពថ្មីៗគឺកាន់តែផ្អែមល្ហែមនិងគួរឱ្យច្រណែនលើសដើម។
៣. Prang kannarun-Tong [Twopee] (រក្សាទុកក្នុងបេះដូងជានិរន្តរ៍)
មួយគូនេះបើនិយាយថាជាគូដែលព្រហ្មលិខិតកំណត់ឱ្យមកជាគូក៏ថាបាន ព្រោះបើវិលថយក្រោយកាលពីអាយុ២០ឆ្នាំ ទើបតែរៀនចប់មហាវិទ្យាល័យថ្មីៗ កាលនោះ Tong អ្នកកំលោះ Rapper រូបសង្ហាបានចូលមកសុំស្គាល់និងសុំស្នេហ៍ Prang និយាយថាដោយមើលឃើញពីការព្យាយាមរបស់ Tong ធ្វើឱ្យខ្លួនព្រមបើកចិត្តសេពគប់គ្នាក្នុងឋានៈគូស្នេហ៍តែត្រូវស្ថិតក្រោមខ្សែភ្នែករបស់អ្នកម៉ាក់របស់ Prang ជានិច្ច។ បើរំលឹកឡើងវិញរយៈពេល៤ឆ្នាំដំបូងដែលសេពគប់គ្នា Tong បានជួបជាមួយនឹងម៉ាក់របស់ Prang តែប៉ុន្មានលើកប៉ុណ្ណោះ ថែមទាំងមិនដែលបានចូលផ្ទះទៀត។ ក្រោយមកស្នេហាអ្នកទាំងពីរស្រាប់តែជាប់ផុងព្រោះដោយការគិត គំនិតទស្សនៈខុសឆ្ងាយពីគ្នា ធ្វើឱ្យអ្នកទាំងពីរផ្ដាច់ទំនាក់ទំនងគ្នាពីរឆ្នាំពេញ ដោយម្ខាងៗមិនបានដឹងដំណឹងម្ខាងទៀត ប៉ុន្តែគូស្នេហ៍ដែលព្រហ្មលិខិតចាប់គូនេះ បានវិលមកជួបគ្នាសារជាថ្មី និងបានសេពគប់គ្នាបែបស្ងាត់ៗ រយៈពេលមួយឆ្នាំពេញ មុនព្រមចេញមកប្រកាសឱ្យដឹងទំនាក់ទំនងស្នេហាខ្យល់បក់បញ្ច្រាសថយក្រោយនេះមានភាពស្និទ្ធស្នាលនឹងកាន់តែផ្អែមល្ហែមទ្វេឡើង រហូតអ្នកគាំទ្ររំអុកចង់ឱ្យរៀបការឆាប់ៗថែមទៀតផង៕
