Thursday, December 8 Login

ភាពយន្ត​​ខ្នាត​ធំ​កម្រិត​យក្ស​ដែល​បាន​ផ្ដិត​យក​ព្រឹត្តិការណ៍​សោកនាដកម្ម​ដ៏​ធំធេង​មួយ​តាម​រយៈ​ក្ដី​ស្នេហា​របស់​ Jack និង​ Rose បាន​​បញ្ចាំង​ថ្ងៃ​ដំបូង​នៅ​សហរដ្ឋ​អាមេរិក​ ថ្ងៃ​ទី​ ១៩ ​ធ្នូ​ ១៩៩៧​ គឺ​ជា​ភាពយន្ត​លំដាប់​ប្រវត្តិសាស្ត្រ​ដ៏​សំខាន់​សម្រាប់​វិស័យ​ភាពយន្ត​ខ្នាត​ធំ​។ យោង​តាម GQ នេះ​គឺ​ជា​រឿង​រ៉ាវ​ពិត​ទាំង​២០​ ពាក់ព័ន្ធ​នឹង​ភាពយន្ត​ Titanic ដែល​អ្នក​អាច​នឹង​មិន​ទាន់​បាន​ដឹង​ ទោះ​ជា​ធ្លាប់​បាន​ទស្សនា​រឿង​នេះ​ច្រើន​ដង​ហើយ​ក្ដី​។​

សូមចុចអាន៖ Netflix ត្រៀម​លើក​ដៃ​​​ Bye-Bye ភាពយន្ត​​៥៣​ រឿង​ក្នុង​​ខែ​មិថុនា​នេះ!​​

១. នៅ​ពេល​ដែល​ James Cameron នាំ​យក​ Project រឿង​ទៅ​លក់​ឱ្យ​ 20th Century Fox គាត់​បាន​និយាយ​ថា​រឿង​នេះ​ជា​រឿង​ស្នេហា​បែកបាក់​បែបរ៉ូមេអូ​និង​ជូលៀត​លើ​កប៉ាល់​ Titanic ​​ «Romeo and Juliet on Titanic»

២. កប៉ាល់​ Titanic ពិត​ប្រាកដ​ប្រើប្រាស់​កញ្ចប់​ថវិកា​កសាង​ពី​ឆ្នាំ​ ១៩១០-១៩១២ ចំនួន​ ៧.៥​ លាន​ដុល្លារ​ ដែល​ចំនួន​នេះ​ប្រហាក់ប្រហែល​នឹង​តម្លៃ​ ១២០-១៥០ លាន​ដុល្លារ​នៅ​ឆ្នាំ​១៩៩៧​ ដែល​តម្លៃ​នេះ​នៅ​ទាប​ជាង​តម្លៃ​ផលិត​ភាពយន្ត​ Titanicដែល​ប្រើប្រាស់​កញ្ចប់​ថវិកា​អស់​រហូត​ដល់​២០០​លាន​ដុល្លារ​។

៣. ខាង​ស្ទីតយ៉ូ​ចង់​ឱ្យ​Matthew McConaughey ​សម្ដែង​ជា​តួអង្គ​ Jack តែ​ James Cameron នៅ​តែ​អះអាង​យក​ Leonardo Dicaprio សម្ដែង​

៤. តួ​អង្គ​ Rose ត្រូវ​បាន​គេ​ស្នើ​ឱ្យ Gwyneth Paltrow ,Winona Ryder ,Claire Danes ឬ​ក៏​ឱ្យ​ដាក់​ Reese Witherspoon ប៉ុន្តែ​តារា​ស្រី​ទាំង​៤​ រូប​នេះ​បាន​តប​បដិសេធ​ តែ​ Kate Winslet បាន​សរសេរ​សំបុត្រ​តាំង​ពី​ប្រទេស​អង់គ្លេសស្នើ​សុំ​ឱ្យ​ James Cameron យល់​ព្រម​ឱ្យ​ខ្លួន​ជិះយន្តហោះ​ទៅ​ Audition (សាក​កាំមេរ៉ា) រឿង​នេះ​នៅ​ហូលីវូដ​។​​

៥. ឈុត​ឆាក​ត្រង់​កន្លែង​ Jack គូរ​គំនូរ​អាក្រាត​របស់​ Rose គឺ​ជា​ឆាក​ដំបូង​ដែល​ថត​មុន​គេ​ដោយ​សារ​តែ​កាល​នោះ​កប៉ាល់​សង់​ថត​នៅ​មិន​ទាន់​រួច​រាល់​ ចំណែក​គំនូរ​អាក្រាត​របស់​ Rose ដែល​ Jack គូរ​ឱ្យ​ក្នុង​ឈុត​ឆាក​សម្ដែង​នោះ​ ការ​ពិត​គឺ​ជាស្នាដៃ​គូរ​របស់​ James Cameron

សូមចុចអាន៖ ភាពយន្ត​កូរ៉េ​ ១០​រឿង ​តួឯក​ប្រុស​ស្អាត​សង្ហា​តែ​បែរ​មិនមែន​ជា​មនុស្ស​​ធម្មតា​!

៦. ក្រោយ​និពន្ធ​សេណារីយ៉ូ​ភាពយន្ត​ចប់​ James Cameron បាន​ដឹង​ថា​មាន​អ្នក​ជិះ​លើ​នាវា​ម្នាក់​ដែល​ស្លាប់​លើ​កប៉ាល់​ Titanic ក្នុង​ព្រឹត្តិការណ៍​លិច​កប៉ាល់​នោះ​​ឈ្មោះ​ J. Dawson

៧. ឈ្មោះ​ហៅ​ភាពយន្ត​នេះ​គឺ​ Planet Ice ដើម្បី​បិទបាំង​កុំ​ឱ្យ​អ្នក​ដទៃ​ដឹង​ថា​ពួក​គេ​កំពុង​ថត​រឿង​ពាក់ព័ន្ធ​នឹង​ Titanic

៨. ឈុត​ឆាក​ដែល​ត្រូវ​ថត​ឱ្យ​ឃើញ​កប៉ាល់​ Titanic ទាំង​មូល​ ត្រូវ​បាន​ថត​នៅ​ក្នុង​អាង​ទឹក​ខ្នាត​យក្ស​ដែល​ជីក​ឡើង​នៅ​លើ​ឆ្នេរ​ខ្សាច់​ភាគ​ខាង​ត្បូង​ Rosarito ក្នុង​ប្រទេស​ម៉ិចស៊ិក​ ដោយ​ជម្រៅ​ទឹក​ក្នុង​អាង​មាន​កម្ពស់​ត្រឹម​តែ​៩០​សង់​ទី​ម៉ែត្រ​ប៉ុណ្ណោះ​​

៩. តួ​អង្គ​ដែល​សម្ដែង​ជា​អ្នក​ធ្វើ​ការ​ក្នុង​បន្ទប់​ម៉ាស៊ីន​ក្នុង​បាត​កប៉ាល់​ មាន​កម្ពស់​ត្រឹម​តែ​១.៥០ សង់​ទីម៉ែត្រ​ប៉ុណ្ណោះ​ ដើម្បី​បញ្ឆោត​ភ្នែក​អ្នក​មើល​ឱ្យ​ឃើញ​ដូច​ជា​​បន្ទប់​ធំ​មហាសាល​

១០. អ្នក​គ្រប់គ្រង​ Fox បាន​បញ្ជា​ឱ្យ​ James Cameron កាត់​ចោល​ឈុត​ខ្លះ​ដោយ​ឱ្យ​កាត់​ពី​៣​ម៉ោង​ មក​នៅ​ត្រឹម​ជាង​២​ម៉ោង​បាន​ហើយ​ ដើម្បី​បាន​បញ្ចាំង​នៅ​ក្នុង​រោង​កាន់​តែ​ច្រើន​ដង​ ហើយ​ជួយ​ឱ្យ​រឿង​ឈ្នះ​អូស្ការ​ទៀត តែ​ James Cameron បដិសេធ​ដាច់​អហង្ការ​មិន​ព្រម​កាត់​ឈុត​ឆាក​ចោល​។

១១. Gloria Stuart ដែល​សម្ដែង​ជា​តួអង្គ​ Rose វ័យ​ចំណាស់​មាន​ឈ្មោះ​ដណ្ដើម​ពាន​រង្វាន់​អូស្ការ​នៅ​វ័យ​៨៧​ឆ្នាំ​ ដែល​កាល​នោះ​ចាត់​ទុកថា​ជា​តារា​ដែល​មាន​ឈ្មោះ​ដណ្ដើម​ពាន​រង្វាន់​ចាស់​ជាង​គេ​។ លោក​យាយ​ Gloria Stuart បាន​បាត់បង់​ជីវិត​នៅ​ឆ្នាំ​ ២០១០ ដោយ​អាយុ​១០០​ឆ្នាំ​ គឺ​ស្មោះ​នឹង​ Rose ក្នុង​ភាពយន្ត​ដែរ​។

១២. Kate Winslet បដិសេធ​​ស្លៀក​ឈុត​ Wetsuit (ឈុត​ហែល​ទឹក​) ​នៅ​ក្នុង​ពេល​កំពុង​ថត​ឈុត​ឆាក​ក្រោម​ទឹក​ ទី​បំផុត​នាង​បាន​​កើត​ជំងឺ​​ហើម​សួត​

១៣. Deborah lynn scott អ្នក​រចនា​ម៉ូដ​សំលៀក​បំពាក់​នៅ​ក្នុង​រឿង​ Titanic បាន​ដេរ​ឈុត​ដែល​ Rose ឬ​ Kate Winslet ស្លៀក​​ដដែល​ចំនួន​២៤​ឈុត​​ដើម្បី​ឱ្យ​តួ​​ឯក​ស្រី​មើល​ទៅ​ស្អាត​គ្រប់​ពេលវេលា​ទាំង​នៅ​លើ​ទូក​និង​នៅ​ក្នុង​ទឹក​

១៤. Titanic គឺ​ជា​ភាពយន្ត​ដំបូង​គេ​បង្អស់​ដែល​ចេញ​ជា​វីដេអូ​ ទាំង​ដែល​រឿង​កំពុង​បញ្ចាំង​នៅ​​លើ​រោង​ភាពយន្ត​

១៥. Paramount Pictures ចាំ​បាច់​ត្រូវ​បញ្ជូន​ដុំ Film (​ហ្វីល) ​​ឈុត​ថ្មី​ជា​ច្រើន​ឈុត​ទៅ​កាន់​រោង​ភាពយន្ត​ជា​ច្រើន​កន្លែង​ព្រោះ​បញ្ចាំង​ច្រើន​ដង​ពេក​រហូត​ Film (​ហ្វីល) ខូច​

១៦. ដើម​ដំបូង​ James Cameron បាន​និយាយ​ចរចា​សុំ​ឱ្យ Enya សិល្បករ​ចម្រៀង​បែប​ New Age ​មក​ធ្វើ​ភ្លេង​បញ្ចូល​ក្នុង​ភាពយន្ត​ឱ្យ​ តែ​ Enya បដិសេធ​ James Cameron ក៏​បាន​ទាក់ទង​ទៅ​ James Horner ឱ្យ​ធ្វើ​វិញ​

១៧. ​ដំបូង​ឡើយ​ James Cameron មិន​ចង់​ឱ្យ​មាន​ភ្លេងច្រៀង​​អ្វី​ទាំង​អស់​សម្រាប់​រឿង​នេះ​ តែ​ក្រោយ​ពី​ James Horner បាន​លួច​​តែ​​អត្ថបទ​ចម្រៀង​ My Heart Will Go On រួម​ជាមួយ​នឹង Will Jennings ហើយ​ឱ្យ​ Celine Dion ច្រៀង​ក្នុង​ Demo កាសែត​ចម្រៀង​ លោក James Cameron ស្រាប់​តែ​ពេញ​ចិត្ត​ហើយ​សម្រេច​ចិត្ត​ដាក់​បទ​ចម្រៀង​នេះ​នៅ​ក្នុង​ Credit ចប់​រឿង​​

១៨. ដំបូង​ឡើយ​ Celine Dion មិន​ចង់​ច្រៀង​បទ​ «My Heart Will Go on» ព្រោះ​ទើប​តែ​ល្បីល្បាញ​ពី​បទ​ចម្រៀង​ដែល​ដាក់​បញ្ចូល​ក្នុង​ភាពយន្ត​ «Beauty and the Beast» ម្យ៉ាង​មិន​ចង់​ធ្វើ​អ្វី​ដដែល​ៗ តែ​Simon Franglen អ្នក​តែង​បទ​ភ្លេង​ដែល​ធ្វើការងារ​ជាមួយ​នឹង​នាង​យូរ​ឆ្នាំ​ព្រម​ទាំង​ស្វាមី​របស់​ Dion លោក Rene Angelil បាន​ព្យាយាម​ជួយ​និយាយ​បញ្ចុះបញ្ចូល​នាង​ទាល់​តែ​បាន​សម្រេច​។

១៩. ចំណែក​ Soundtrack របស់​ Titanic ដែល​តែង​ឡើង​ដោយ​ James Horner ក៏​លក់​បាន​តម្លៃ​ជាង​៣០​លាន​កូពី​ ទាំង​ដែល​បទ​ចម្រៀង​មាន​សំឡេង​ច្រៀង​តែ​មួយ​បទ​ ក្រៅ​ពី​នោះ​គឺ​ជា​តន្ត្រី​សុទ្ធ​។​​

២០.​ភាពយន្ត​នេះ​រក​ចំណូល​បាន​ពី​ទូទាំង​ពិភពលោក​ច្រើន​ជាង​ ២,១៨៧លាន​ដុល្លារ​អាមេរិក​ ក្លាយ​ជា​ភាពយន្ត​ដែល​រក​ចំណូល​បាន​ច្រើន​បំផុត​នា​សម័យ​នោះ​ មុន​នឹង​ភាពយន្ត​ Avatar របស់​លោក​ James Cameron បាន​បំបែក​កំណត់​ត្រា​ភាពយន្ត​ដែល​លោក​ដឹកនាំ​ខ្លួន​ឯង​នៅ​ឆ្នាំ​២០០៩​ ដោយ​រក​ចំណូល​សរុប​ ២,៧៨៧​លាន​ដុល្លារ​៕

Telegram-Troryorng
Share.

Leave A Reply