ទាត់បាល់ពិន័យ១១ម៉ែត្របានសម្រេច ១គ្រាប់ ក្នុងប្រកួតមិត្តភាពអន្តរជាតិរវាងក្រុម U23 កម្ពុជា ទល់ក្រុម U23 ជប៉ុន បានធ្វើឱ្យកីឡាករ ជួន ចាន់ចាវ ជាប់កំណត់ត្រាជាកីឡាករដំបូងដែលទាត់ចូលទីក្រុម Samurai Blue ខណៈ៣ប្រកួតផ្លូវការគិតត្រឹមថ្ងៃនេះ កម្ពុជា របូតគ្រាប់បាល់រហូតដល់៩គ្រាប់។
លទ្ធផលសរុបក្រោយលោកអាជ្ញាកណ្ដាលជនជាតិថៃ Warintorn Sassadee ផ្លុំកញ្ចែបញ្ចប់ការប្រកួត ក្រុម U23 កម្ពុជា បន្តចាញ់ក្រុម U23 ជប៉ុន ជាលើកទី៣ ដោយលទ្ធផល ៣-១ លើទីលានពហុកីឡដ្ឋានមរតតេជោ ក្នុងរាជធានីភ្នំពេញ នារាត្រីថ្ងៃអង្គារ ទី២០ ខែកញ្ញា ឆ្នាំ២០២២ នេះ។កីឡាករ Komori Hiiro រកបានគ្រាប់បាល់ទី១ ហើយកីឡាករ Fujii Kaito រកបានគ្រាប់បាល់ទី២អោយជប៉ុន និងគ្រាប់ទី៣ រកបានដោយកីឡាករ Mizuno Hayata។ ចំណែកគ្រាប់បាល់វាយបករបស់កម្ពុជា រកបានដោយ ជួន ចាន់ចាវ។
នេះជាការត្រៀមខ្លួនរបស់ក្រុម U23 កម្ពុជា មុនធ្វើជាម្ចាស់ផ្ទះក្នុងព្រឹត្តិការណ៍កីឡាស៊ីហ្គេមឆ្នាំ២០២៣ ដែលនឹងមកដល់ក្នុងខែឧសភា ឆ្នាំក្រោយ។
ដូច្នេះលទ្ធផលជួបគ្នាផ្លូវការទាំង៣លើករវាងក្រុម U23 កម្ពុជា ជាមួយ U23 ជប៉ុន៖
-វគ្គជម្រុះជើងឯកប្រចាំទ្វីបឆ្នាំ២០១៧៖ U23ជប៉ុន ៤-០ U23 កម្ពុជា (នៅភ្នំពេញ)
-វគ្គជម្រុះជើងឯកប្រចាំទ្វីបឆ្នាំ២០២១៖ U23 កម្ពុជា ០-២ U23 ជប៉ុន (នៅជប៉ុន)
-មិត្តភាពអន្តរជាតិ ឆ្នាំ២០២២ ៖ U23 កម្ពុជា ១-៣ U23 ជប៉ុន (នៅភ្នំពេញ)