ក្រុមបាល់ទាត់ Sarawak United ដែលជាទ្រនំរបស់ខ្សែការពារ កុក បូរីស សមាជិកក្រុមជម្រើសជាតិកម្ពុជា បានបន្តបរាជ័យជាលើកទី១៣ គិតត្រឹមសប្ដាហ៍ទី១៩នៃពានរង្វាន់លីគកំពូលម៉ាឡេស៊ី Malaysia Super League 2022។
សប្ដាហ៍ទី១៩ នេះក្រុម Sarawak United បានប្រកួតចាញ់ក្រុមម្ចាស់ផ្ទះ Kuala Lumpur City ដោយលទ្ធផល ៥ទល់០ លើទីលានកីឡដ្ឋាន Kuala Lumpur Stadium ធ្វើឲ្យពួកគេធ្លាក់ទៅឈរលេខ១១ក្នុងកាន់តំបន់កាត់ចោល ក្រោយឆ្លងកាត់១៩ប្រកួត ឈ្នះ៤ ស្មើ២ និងចាញ់១៣ មានត្រឹមតែ១៤ពិន្ទុប៉ុណ្ណោះ។
នេះជាលើកដំបូងដែលខ្សែការពារ កុក បូរីស បង្ហាញខ្លួនឲ្យ Sarawak United ក្រោយខកខានចាប់តាំងពីថ្ងៃទី២៤ ខែសីហា ឆ្នាំ២០២២ ដោយសារបញ្ហាប្រាក់ឈ្នួល ដែលក្លិបបាល់ទាត់ Sarawak United សមាជិកលីគកំពូលម៉ាឡេស៊ីមិនបានបើកប្រាក់ខែដល់កីឡាករ និងបុគ្គលិកទាំងអស់រយៈពេល៤ខែ។
គួរដឹងថា កុក បូរីស បានចាកចេញពីក្លិបបាល់ទាត់ភ្នំពេញក្រោន ទៅកាន់ Sarawak United FC សមាជិកលីគកំពូលនៃប្រទេសម៉ាឡេស៊ី Malaysia Super League ក្នុងលក្ខខណ្ឌខ្ចីជើងចំនួន១រដូវកាល ខណៈរូបគេជាកីឡាករកម្ពុជា ដំបូងគេចេញទៅប្រកួតអាជីពនៅក្រៅប្រទេសក្នុងឆ្នាំ២០២២ នេះ៕
