ក្លិបបាល់ទាត់វិសាខា សមាជិកពានរង្វាន់លីគកំពូលកម្ពុជា បានថ្លែងចូលរួមរំលែកទុក្ខ ជាមួយមិត្តឥណ្ឌូណេស៊ី ដែលមានខ្លឹមសារទាំងស្រុងថា៖«ក្នុងនាមគ្រួសារបាល់ទាត់ពិភពលោក ពួកយើងពិតជាមានសេចក្ដីតក់ស្លុត និងសោកស្ដាយជាខ្លាំង ចំពោះហេតុការណ៍ដ៏អាក្រក់ ដែលបានកើតឡើងក្នុងការប្រកួតក្របខណ្ឌលីគកំពូលឥណ្ឌូនេស៊ី»។
«កាលពីរាត្រីថ្ងៃទី០១ ខែតុលា ឆ្នាំ២០២២ ក្នុងករណីប៉ះទង្គិច និងរត់ជាន់គ្នា ដែលបណ្ដាលឲ្យមានមនុស្សស្លាប់ជាង ១៧០នាក់ និងរបួសជាច្រើនរយនាក់។ ពួកយើងទាំងអស់គ្នា សូមចូលរួមរំលែកទុក្ខដ៏ក្រៀមក្រំបំផុតជាមួយគ្រួសារសព ប្រជាពលរដ្ឋ និងរដ្ឋាភិបាលឥណ្ឌូនេស៊ី ចំពោះសោកនាដកម្មនេះ។ សូមឧទ្ទិសកុសល និងបួងសួងសុំឲ្យវិញ្ញាណក្ខន្ធរបស់ប្រជាពលរដ្ឋ ក៏ដូចជាអ្នកគាំទ្រ ដែលបានបាត់បង់ជីវិតក្នុងឧបទ្ទវហេតុនេះ បានទៅកាន់សុគតិភព កុំបីឃ្លៀងឃ្លាតឡើយ»។
«កីឡា គឺដើម្បីរឹតចំណងមិត្តភាព សាមគ្គីភាព សុខភាព និងការបង្រួបបង្រួម ។ ផ្អែកលើហេតុការណ៍ខាងលើ ពួកយើងសង្ឃឹមយ៉ាងមុតមាំថា នឹងក្លាយជាមេរៀន និងបទពិសោធន៍ សម្រាប់ប្រជាពលរដ្ឋទូទៅពិភពលោក ដែលត្រូវចៀសវាងឲ្យបានដាច់ខាតនូវអំពើហិង្សា ទោះក្នុងទម្រង់បែបណាក៏ដោយ ពិសេសក្នុងសហគមន៍បាល់ទាត់ជាតិយើងតែម្ដង»។
បើយោងតាមប្រធានមន្ត្រីសន្តិសុខឥណ្ឌូណេស៊ីលោក Mahfud MD បាននិយាយអំពីមូលហេតុដែលបណ្តាឲ្យអ្នកគាំទ្ររត់ជាន់ ដោយសារកីឡដ្ឋានទាំងមូលបានអនុញ្ញាតិឲ្យអ្នកទស្សនាចូលពេញលើសចំណុះ។ នៅក្នុងការបង្ហោះនៅលើបណ្តាញ Instagram របស់លោក, លោកបានឲ្យដឹងថាសំបុត្រលក់ចេញសរុបមានចំនួន ៤២,០០០ សំបុត្រសម្រាប់ការប្រកួតនេះ ដោយជាក់ស្តែងកីឡដ្ឋាននេះអាចផ្ទុកមនុស្សបានត្រឹមតែជាង ៣៨,០០០ ប៉ុណ្ណោះ។
ខណ:ប្រធាន FIFA លោក Gianni Infantino បាននិយាយថា៖«ពិភពបាល់ទាត់ស្ថិតក្នុងស្ថានភាពតក់ស្លុតបន្ទាប់ពីឧប្បត្តិហេតុសោកនាដកម្មដែលបានកើតឡើងនៅក្នុងប្រទេសឥណ្ឌូនេស៊ីនៅចុងបញ្ចប់នៃការប្រកួតរវាង Arema FC និង Persebaya Surabaya នៅកីឡដ្ឋាន Kanjuruhan»។
លោកបន្តទៀតថា៖«នេះគឺជាថ្ងៃដ៏ខ្មៅងងឹតមួយសម្រាប់អ្នកដែលពាក់ព័ន្ធក្នុងកីឡាបាល់ទាត់ និងសោកនាដកម្មដែលហួសពីការយល់ឃើញ។ ខ្ញុំសូមចូលរួមរំលែកទុក្ខយ៉ាងក្រៀមក្រំបំផុតចំពោះក្រុមគ្រួសាររបស់ជនរងគ្រោះដែលបានបាត់បង់ជីវិតក្នុងឧបទ្ទវហេតុដ៏សោកនាដកម្មនេះ។ រួមជាមួយ FIFA និងសហគមន៍បាល់ទាត់ពិភពលោក គំនិត និងការបួងសួងរបស់យើងទាំងអស់គឺនៅជាមួយជនរងគ្រោះ អ្នកដែលបានទទួល របួស រួមជាមួយនឹងប្រជាជននៃសាធារណរដ្ឋឥណ្ឌូនេស៊ី សហព័ន្ធបាល់ទាត់អាស៊ី សមាគមបាល់ទាត់ឥណ្ឌូនេស៊ី និងលីគបាល់ទាត់ឥណ្ឌូនេស៊ី ក្នុងគ្រាដ៏លំបាកនេះ»៕