លោក Yoo Sang-chul ដែលជាសមាជិកក្រុមជម្រើសជាតិកូរ៉េខាងត្បូង ជួយឱ្យក្រុមអាស៊ីមួយនេះឡើងដល់វគ្គពាក់កណ្ដាលផ្ដាច់ព្រ័ត្រពានរង្វាន់បាល់ទាត់ជើងឯកពិភពលោក 2002 FIFA World Cup មានកូរ៉េខាងត្បូង និងជប៉ុន ជាសហម្ចាស់ផ្ទះ បានទទួលមរណភាពនៅយប់ថ្ងៃចន្ទ សប្ដាហ៍នេះដោយសារជំងឺមហារីកលំពែង ក្នុងវ័យ៤៩ឆ្នាំ។
សហព័ន្ធកីឡាបាល់ទាត់កូរ៉េខាងត្បូង បានផ្ញើសារមរណទុក្ខពីការបាត់បង់បុគ្គលសំខាន់ក្នុងវិស័យកីឡាខ្លួនថា៖«យើងនឹងចងចាំជារៀងរហូតពីគុណបំណាច់របស់អ្នក (Yoo Sang-chul)។ សូមទៅកាន់សុគតិភព»។
ពានរង្វាន់ 2002 FIFA World Cup ជើងឯកបានទៅប្រេស៊ីល ហើយអាល្លឺម៉ង់ ជាជើងឯករង ខណៈទួរគី បានមេដាយសំរឹទ្ធ និងកូរ៉េខាងត្បូង ឈរលេខ៤។ សារព័ត៌មាន USA Today របស់សហរដ្ឋអាមេរិក បានជ្រើសរើសកីឡាករ All Star Team ក្រោយចប់ការប្រកួត ខណៈលោក Yoo Sang-chul ជាប់ឈ្មោះជាខ្សែបម្រើក្នុងបញ្ជី៥នាក់ ជាមួយMichael Ballack របស់អាល្លឺម៉ង់ Claudio Reyna របស់អាមេរិក Rivaldo និង Ronaldinho របស់ប្រេស៊ីល។
ចំណែកអ្នកចាំទីមាន Oliver Kahn របស់អាល្លឺម៉ង់ ជាមួយRüştü Reçber របស់ទួរគី ហើយខ្សែការពារមាន Sol Campbell របស់អង់គ្លេស Fernando Hierro របស់អេស្ប៉ាញHong Myung-bo របស់កូរ៉េខាងត្បូង Alpay Özalan របស់ទួរគី និងRoberto Carlos ប្រេស៊ីល។ ចំណែកខ្សែប្រយុទ្ធមាន El Hadji Diouf របស់សេណេហ្គាល់ Miroslav Klose របស់អាល្លឺម៉ង់ Ronaldo របស់ប្រេស៊ីល និងHasan Şaş របស់ទួរគី។
បុរសកម្ពស់១.៨៤ម៉ែត្ររូបនេះបានចំណាយជីវិត១៦ឆ្នាំក្នុងអាជីពជាកីឡាករបាល់ទាត់ពីឆ្នាំ១៩៩៤ ដោយប្រកបអាជីពនៅលីគកំពូលស្រុកកំណើតនិងនៅលីគកំពូលប្រទេសជប៉ុន និងចូលនិវត្តន៍នៅឆ្នាំ២០០៦។ ក្រោយព្យូរស្បែកជើងពីកីឡាករអាជីបលោកធ្លាប់បានដឹកនាំក្រុម Daeeon Citizen, Ulsan Univesity, Jeonnam Dragons និង Incheon United៕