ភាពយន្តភាគថ្មីដែលជាស្នាដៃរបស់ Mike Flanagan មានចំណងជើងថា «The Midnight Club» ទើបតែដាក់បញ្ចាំងនៅលើ App Netflix កាលពីថ្ងៃទី៧ ខែតុលា កន្លងទៅ ប៉ុន្តែរឿងនេះបែរជាអាចបំបែកឯកត្តទកម្ម Guinness World Records ជាសាច់រឿងដែលមានឈុតលងហើបគូទលឿនជាងគេបំផុត។
ភាពយន្តភាគដោយ Flabagan និងក្រុមការងាររបស់លោកត្រឹមតែភាគទីមួយនៃរដូវកាលទីមួយប៉ុណ្ណោះ ក្ដោបបានតំណែងជាភាពយន្តដែលមានសេណារីយ៉ូលងហើបគូទ ច្រើនបំផុតនៅក្នុងភាគតែមួយ។ ក្នុងភាគទីមួយនៃរឿង «Midnight Club» មានឈុតឆាកលងហើបគូទរហូតដល់ទៅ ២១លើកឯណោះ។
ខណៈទទួលបានវិញ្ញាប័ណ្ណបត្រ Flanagan បាននិយាយរឿងគួរឱ្យភ្ញាក់ផ្អើលមួយថា «នេះគឺជារឿងមួយអស់សំណើច…ខ្ញុំស្អប់ការលងបន្លាចណាស់, ខ្ញុំពិតជាស្អប់ខ្លាំងណាស់»។ លោកបានបន្ថែមទៀតថា «ពេញមួយជីវិតនៅក្នុងអាជីពការងាររបស់ខ្ញុំ មនុស្សជាច្រើនបានមកសួរនាំខ្ញុំ ពេលខ្ញុំកំពុងតែសរសេរស្គ្រីប ឬពេលយើងកំពុងតែកាត់ត ហើយនិយាយថា បន្ថែមឈុតលងបន្លាចថែមទៀត ដាក់ឱ្យច្រើន ដាក់ឱ្យលឿន លឿនជាងនេះទៀត!។ ដូច្នេះនៅក្នុងរឿងថ្មីនេះ យើងគ្រាន់តែគិតថាយើងនឹងដាក់ ឈុតឆាកលងបះសក់ឱ្យច្រើនតាមតែអាចធ្វើទៅបាននៅក្នុងតែមួយឈុត ហើយសង្ឃឹមថានៅចុងក្រោយ មិនមានន័យស្អីទាំងអស់»។
ចុងក្រោយ Flanagan បាននិយាយថា «នៅថ្ងៃអនាគត ប្រសិនបើមានអ្នកណាម្នាក់និយាយជាមួយយើង ហើយប្រាប់ថា ដាក់ឈុតលងបះសក់ឱ្យច្រើនថែមទៀត ពួកយើងនឹងអាចនិយាយប្រាប់គេវិញបានថា តាមពិតពួកខ្ញុំបានកាន់កាប់កំណត់ត្រា Guiness World Record ភាពយន្តភាគទូរទស្សន៍ ដែលមានឈុតឆាកលងហើបគូទច្រើនបំផុតនៅក្នុងត្រឹមតែមួយភាគប៉ុណ្ណោះ។ ហើយខ្ញុំគិតថាប៉ុណ្ណឹងបានហើយ»។
ប្រភព៖ gamerant.com
