សហព័ន្ធកីឡាបាល់ទាត់កម្ពុជា បានបញ្ជាក់ថាមានចុងម្នាក់ជាជនជាតិខ្មែរកំពុងធ្វើការនៅប្រទេសបារ៉ែន បានស្កាត់ជួយធ្វើម្ហូបដល់ក្រុមកីឡាករជម្រើសជាតិកម្ពុជា ដែលកំពុងតែបំពេញបេសកកម្មក្នុងវគ្គជម្រុះជុំទី២ ពូលC ប្រចាំទ្វីបអាស៊ី នៃពានរង្វាន់បាល់ទាត់ពិភពលោក 2022 FIFA World Cup និងវគ្គជម្រុះពាន AFC Asian Cup 2023 ជើងឯកទ្វីបអាស៊ី។
សហព័ន្ធបានបញ្ជាក់នៅលើហ្វេសប៊ុកថា៖«ជួបជាមួយអ្នកចំអិនម្ហូបសម្រាប់ក្រុមជម្រើសជាតិយើង បងស្រី ប៉ម សុភ័ក្រ្ត ដែលជាជនជាតិខ្មែរមកធ្វើការនៅប្រទេសបារ៉ែន។ ក្រុមការងាររបស់ក្រុមជម្រើសជាតិបានទាក់ទងខាងសណ្ឋាគារ ដើម្បីធ្វើម្ហូបអាហារខ្មែរដោយខ្លួនឯង បន្ថែមលើម្ហូបដែលសណ្ឋាគារមានសម្រាប់កីឡាករ។ ប៉ុន្តែដោយសារការការពារពីការឆ្លងជំងឺកូវីដ-១៩ ខាងសណ្ឋាគារមិនអនុញ្ញាតឡើយ តែចៃដន្យមានបុគ្គលិកខ្មែរម្នាក់ធ្វើការផ្នែកផ្សេងនៅសណ្ឋាគារនេះ បន្ទាប់មកខាងសណ្ឋាគារបានអនុញ្ញាតឱ្យបងស្រីមកជួយផ្នែកចុងភៅធ្វើម្ហូបខ្មែរមួយចំនួន រួមផ្សំជាមួយម្ហូបរបស់សណ្ឋាគារសម្រាប់ក្រុមជម្រើសជាតិយើង»។
ក្រុមជម្រើសជាតិកម្ពុជា កំពុងស្ថិតនៅប្រទេសបារ៉ែន ដើម្បីចូលរួមប្រកួតដែលនៅសេសសល់ក្នុងពូល C ជាមួយអ៊ីរ៉ាក់ អ៊ីរ៉ង់ ហុងកុង និងម្ចាស់ផ្ទះបារ៉ែន។ ២ប្រកួតមកនេះកម្ពុជា ចាញ់បារ៉ែន ៨ទល់០ ហើយបន្តចាញ់អ៊ីរ៉ាក់ ៤ទល់១ ខណៈប្រកួតចុងក្រោយត្រៀមជួបក្រុមអ៊ីរ៉ង់ នៅថ្ងៃទី១១ ខែមិថុនាខាងមុខ៕
