វគ្គជម្រុះជុំទី២ ប្រចាំទ្វីបអាស៊ី នៃពានរង្វាន់បាល់ទាត់ពិភពលោក 2022 FIFA World Cup និងវគ្គជម្រុះពាន AFC Asian Cup 2023 ជើងឯកទ្វីបអាស៊ី បានរកឃើញក្រុមឡើងនិងក្រុមធ្លាក់បណ្តើរៗហើយ ខណៈក្រុមចំនួន១២ ដែលធ្វើល្អជាងគេតាមពូលនីមួយៗ មានឈ្មោះឡើងទៅលេងជុំទី៣ ប្រចាំទ្វីបជាបន្ត ហើយក្រុមដែលធ្លាក់ចេញមានឈ្មោះចូលរួមប្រកួតវគ្គជម្រុះពានរង្វាន់ជើងឯកទ្វីបអាស៊ី។
គិតត្រឹមពេលនេះ គណៈកម្មការប្រកួតបានរកឃើញក្រុម២មុនគេឡើងទៅលេងជុំទី៣ ប្រចាំទ្វីបអាស៊ី ជាបន្តបើទោះជាការប្រកួតមិនទាន់បញ្ចប់ក្នុងជុំទី២ក៏ដោយ។ ក្រុម២នោះមានក្រុមស៊ីរី ពូល A និងជប៉ុន ពូលF។ ចំណែកក្រុមនៅពូលផ្សេងទៀតនៅប្រទាញប្រទង់គ្នានៅឡើយ។
ចំណែកក្រុមដែលធ្លាក់ចេញមុនគេ មានកោះហ្គាម ពូល A, តៃវ៉ាន់ ពូល B, ឥណ្ឌូណេស៊ី ពូល , កម្ពុជា ពូល C មានឈ្មោះធ្លាក់មុនគេនៅតាមពូលរៀងៗ ខ្លួន ប៉ុន្តែនៅសល់ឱកាសប្រកួតវគ្គជម្រុះក្នុងពានរង្វាន់ AFC Asian Cup 2023 ជើងឯកទ្វីបអាស៊ី មួយលើកទៀត ក្នុងវគ្គជម្រុះជុំទី១។
អត្ថបទពាក់ព័ន្ធ៖Troryorng Zoom «សម្លេងកីឡាករកម្ពុជា ពីប្រទេសបារ៉ែនត្រៀមជម្រុះ World Cup»
និយាយពីពានរង្វាន់ AFC Asian Cup 2023 ជើងឯកទ្វីបអាស៊ី គ្រោងធ្វើនៅប្រទេសចិន ដោយចំរាញ់យកក្រុមខ្លាំងៗចំនួន២៤ក្រុម។ ចំណែកការប្រកួតជម្រុះវិញគ្រោងបែងចែកជាច្រើនដំណាក់កាល៖
វគ្គជម្រុះជុំទី១៖ ក្រុមដែលមានពិន្ទុតិចជាងគេក្នុងវគ្គជម្រុះតាមពូលជុំទី២ 2022 FIFA World Cup ប្រចាំទ្វីបចំនួន១០ក្រុមត្រូវចាប់គូប្រកួតគ្នា។ ជាឧទាហរណ៍គឺកម្ពុជា តៃវ៉ាន់ ឥណ្ឌូណេស៊ី និងកោះហ្គាម ត្រូវប្រកួតនៅវគ្គនេះ។
វគ្គជម្រុះជុំទី២៖ អ្នកចាញ់នៅវគ្គជម្រុះជុំទី១ ត្រូវចាប់គូប្រកួតគ្នាម្តងទៀតរកអ្នកឈ្នះ។
វគ្គជម្រុះជុំទី៣៖ ក្រុមឈ្នះជុំទី១និងជុំទី២ បូកទាំងក្រុមចំណាត់ថ្នាក់លេខ២ លេខ៣និងលេខ៤ ក្នុងវគ្គជម្រុះតាមពូលជុំទី២ 2022 FIFA World Cup ត្រូវចាប់ពូលប្រកួតគ្នា ដោយ១ពូលមាន៤ក្រុម។ ក្រុមចំណាត់ថ្នាក់លេខ១និងលេខ២ក្នុងពូលមានឈ្មោះទៅប្រទេសចិន តែម្តង។
ចំណែកក្រុមចំណាត់ថ្នាក់លេខ១ តាមពូលនីមួយៗក្នុងវគ្គជម្រុះ តាមពូលជុំទី២ 2022 FIFA World Cup មានឈ្មោះទៅប្រកួត AFC Asian Cup 2023 វគ្គ២៤ក្រុមចុងក្រោយដោយស្វ័យប្រវត្តិ។ ជាឧទាហរណ៍ជាក់ស្តែងក្រុមជប៉ុន និងស៊ីរី មានឈ្មោះដោយស្វ័យប្រវត្តិតែម្ដង៕
អត្ថបទពាក់ព័ន្ធ៖Messi ឡាវ៖«ប្រទេសឡាវទាំងមូល នឹងគាំទ្រជម្រើសជាតិវៀតណាម ទៅប្រកួតWorld Cup»
