កីឡាករខ្សែប្រយុទ្ធសញ្ជាតិបារាំង មានវ័យ២៣ ឆ្នាំ Kylian Mbappe បច្ចុប្បន្នកំពុងប្រកបអាជីពនៅក្លិបបាល់ទាត់ Paris Saint-Germain សមាជិកលីគបាល់ទាត់កំពូលបារាំង ទើបតែបានចុះកុងត្រារយៈពេល៣ឆ្នាំបន្ថែមទៀតជាមួយក្លិបកាលពីខែឧសភាកន្លងទៅ ខណៈនៅតែមានពាក្យចចាមអារាមថារូបគេចង់ចាកចេញពីក្លិបអ្នកមានបារាំង មួយនេះ។
សារព័ត៌មានអន្តរជាតិ BBC បានដាក់ចំណងជើងធំៗថា៖« Kylian Mbappe គាត់និយាយថាមិនដែលស្នើសុំចាកចេញពីក្រុម PSG នោះទេ»។ អ្វីដែលពិសេសនោះរូបគេបញ្ជាក់ថានឹងមិនបំពានកិច្ចសន្យាហើយចាកចេញពីក្រុមនៅអំឡុងទីផ្សារដោះដូរកីឡាករ បើកទ្វានៅខែមករា ខាងមុខនោះទេ។ នេះជាការលើកឡើងរបស់ Mbappe បន្ទាប់ពី ក្រុម PSG បានយកឈ្នះលើក្រុមខ្លាំង Marseille ១-០ ចុងសប្ដាហ៍ថ្មីៗនេះ។
យ៉ាងណាក្តីកីឡាករវ័យក្មេង Kylian Mbappe រូបនេះ ក៏ធ្លាប់មានការទាក់ទងផ្លាស់ទៅកាន់ក្លិបនៅប្រទេសអេស្បាញ Real Madrid ផងដែល តែពេលនេះសមាជិកដែលជួយក្រុមជម្រើសជាតិបារាំងឈ្នះ World Cup ២០១៨ រូបនេះបានច្រានចោលព័ត៌ទាំងអស់។ ចំពោះរូបគេផ្ទាល់ ក៏មិនយល់ថារឿងរ៉ាវដែលបានចុះផ្សាយតាមបណ្តាលព័ត៌មាននេះចេញមកពីប្រភពណាឡើយ ហើយគឹក៏មានភាពភ្ញាក់ផ្អើលដូចអ្នកគាំទ្រគ្រប់គ្នារបស់រូបគេដែរ។
គួរឲ្យដឹងថា ក្រុម PSG បច្ចុប្បន្ននៅតែបន្តរក្សាកំណត់ត្រាមិនទាន់ចាញ់ក្នុង Ligue 1 ក្រោយឈ្នះ ១-០ លើ Marseille ដែលបានទាត់បញ្ចូលទីរបស់ខ្សែបម្រើប្រយុទ្ធ Neymar នៅនាទី៤៥ បូក២(ចុងវគ្គទី១)៕
ប្រែសម្រួល៖ សុន ភានុ
