តារាសម្ដែង Alex Teeradetch បានបង្ហើបឱ្យដឹងពីមូលហេតុដែលខ្លួនសម្រេចចិត្តតាមសុំស្នេហ៍ bow Maylada ព្រោះមានអារម្មណ៍ថាខាងស្រីគឺជាមនុស្សគួរឱ្យស្រលាញ់ បានធ្វើការងារជាមួយសប្បាយ ពេញចិត្តអត្តចរិតតាំងពីថ្ងៃដំបូងដែលបានជួបគ្នា ប៉ុន្តែស្នេហានេះជួបឧបសគ្គព្រោះតែម្ដាយខាងស្រីមិនពេញចិត្តខ្លួន។
តារាសម្ដែងប្រចាំប៉ុស្តិ៍លេខ៣ទាំង២ដួង ក្រោយពីប្រកាសជាចំហរថាកំពុងសេពគប់និងមើលចិត្តគ្នាក្នុងឋានៈជាសង្សារ តែងតែមានរូបភាពឬវីដេអូផ្អែមល្ហែមប្រៀបបាននឹងទឹកឃ្មុំខែប្រាំង ធ្វើឱ្យអ្នកនៅលីវច្រណែនជានិច្ច។ ប៉ុន្តែស្នេហានេះមិនងាយនោះឡើយព្រោះដំបូង Alex មិនត្រូវបានអ្នកម្ដាយរបស់ Bow ពេញចិត្តនោះឡើយ ដោយសារតែ Alex ជំរាបសួរមនុស្សគ្រប់គ្នាទាំងអស់ តែអត់បានជំរាបសួរម្ដាយរបស់ Bow ម្នាក់គត់។
Alex បានរំលឹករឿងនេះ ថាថ្ងៃមួយដោយសារតែកូវីដរាតត្បាតអត់អាចទៅណាបាន ក៏បានទៅលេងផ្ទះ Bow ហើយក៏បានដឹងរឿងមួយពីមាត់ម៉ាក់របស់ Bow ថាមិនចូលចិត្តខ្លួននោះទេ ព្រោះនៅថ្ងៃថត MV បទថ្មី Bow ថ្ងៃនោះខ្លួនដើរសំពះគេគ្រប់គ្នាតែអត់បានសំពះម៉ាក់របស់ Bow ដោយសារតែខ្លួនមិនស្គាល់ផងម្យ៉ាងដោយសារតែម៉ាក់របស់ Bow មើលទៅនៅក្មេងទៀត ហើយក៏មិនដែលដឹងថាម៉ាក់ទៅតាមដែរទើបអត់ចាប់អារម្មណ៍សំពះ មួយវិញទៀតម៉ាក់នៅក្នុងបន្ទប់ អត់បាននៅខាងក្រៅជាមួយក្រុមការងារផ្សេងៗ។
យ៉ាងណាមិញស្នេហារបស់ Alex និង Bow នៅពេលនេះមិនមានឧបសគ្គអ្វីទៀតនោះឡើយ ហើយអ្នកទាំងពីរក៏ចាត់ចូលថាជាគូស្នេហ៍តារាដ៏ស័ក្ដិសម និងស្រលាញ់គ្នាខ្លាំងបំផុតមួយគូក្នុងរង្វង់សិល្បៈថៃផងដែរ៕
ប្រភព៖ thebangkokinsight