បុរសជាជនសង្ស័យម្នាក់ បានលួចយកម៉ូតូមួយគ្រឿងពីនារីជាសង្សាររបស់ខ្លួន នៅពេលដែលនាចូលបន្ទប់ទឹកក្រោយពេលបាយជុំគ្នារួច ប៉ុន្តែជនសង្ស័យត្រូវសមត្ថកិច្ចចាប់ខ្លួនបានក្រោយពីជនរងគ្រោះប្រើល្បិចឲ្យមិត្តរបស់ខ្លួនផ្ញើសារទាក់ទងនិងណាត់ជួបជន សង្ស័យនៅថ្ងៃទី២៨ខែតុលាឆ្នាំ២០២២នេះ។
ប្រភពពីសមត្ថកិច្ចបានឲ្យដឹងថា នៅវេលាម៉ោង ២១និង០០នាទីថ្ងៃទី១៦ខែតុលា ជនរងគ្រោះបានចេញពីធ្វេីការវិញហេីយងូតទឹកនិងហូបបាយជាមួយជនសង្ស័យ (ជាគូរសង្សារ) នៅបន្ទប់ផ្ទះជួលរបស់ជនរងគ្រោះនៅភូមិត្រពាំងប្រុយ ឃុំបែកចាន ។ ហូបបាយរួចហេីយជនរងគ្រោះបានចូលទៅក្នុងបន្ទប់ទឹក ពេលនោះបានឮសូរសំលេងម៉ូតូជិះចេញទៅក្រៅ ជនរងគ្រោះរត់ចេញទៅមេីល ស្រាប់តែបាត់ជនសង្ស័យនិងម៉ូតូរបស់ខ្លួន ។ ជនរងគ្រោះគិតថា ជនសង្ស័យ ជិះម៉ូតូទៅមានការនៅខាងក្រៅហេីយ ដោយមិនឃេីញត្រឡប់មកវិញ យូរពេកជនរងគ្រោះបានតេទៅជនសង្ស័យតែមិនលេីកទូរស័ព្ទ ជនរងគ្រោះក៏បា នចូលសម្រាន្ដ។
រហូតដល់ថ្ងៃទី១៨ ខែតុលា ឆ្នាំ២០២២ ជនរងគ្រោះក៏នៅបន្តទាក់ទងទៅជនសង្ស័យ តែមិនបានដំណឹងក៏បានសម្រេចចិត្តមកដាក់ពាក្យដណ្ដឹងនៅប៉ុស្តិ៍នគរបាលរដ្ឋបាលបែកចាន នៃអធិការដ្ឋាននគរបាលស្រុកអង្គស្នួល តាមនីតិវិធីច្បាប់។
លុះរហូតមកដល់ថ្ងៃទី២៦ ខែតុលា ឆ្នាំ២០២២ ជនរងគ្រោះ បានឲ្យពួកម៉ាកខ្លួនឆាតញ៉ែ រហូតណាត់ជួបគ្នានៅមុខវត្តបទុមវត្តី សង្កាត់ចតុមុខ ខណ្ឌដូនពេញ រាជធានីភ្នំពេញវេលាម៉ោង ០៤:៣០ទៀបភ្លឺ ឈានចូលថ្ងៃទី២៦ ខែតុលា ឆ្នាំ ២០២២ ជនសង្ស័យ ក៏ត្រូវបានកម្លាំងប៉ុស្តិ៍នគរបាលរដ្ឋបាលចតុមុខ នៃអធិការដ្ឋាននគរបាលខណ្ឌដូនពេញ ចាប់ខ្លួនជនសង្ស័យ និងប្រគល់ជូនកម្លាំងជំនាញនគរបាលយុត្តិធម៌ នៃអធិការដ្ឋាននគរបាលស្រុកអង្គស្នួល ។
ជនសង្ស័យដែលសត្ថកិច្ចចាប់ខ្លួនបានមានឈ្មោះ ឈ្មោះ ម៉ន បារាំង (ហៅអាទី) ភេទប្រុស អាយុ១៩ឆ្នាំ ជន ជាតិខ្មែរ មុខរបរមិនពិតប្រាកដ មានទីលំនៅស្នាក់នៅភូមិតាកេរ្តិ៍២ សង្កាត់កំបូល ខណ្ឌកំបូល រាជធានី ភ្នំពេញ ។ ជនរងគ្រោះមានឈ្មោះ អុី សឿន ភេទស្រី អាយុ២៨ឆ្នាំ ជនជាតិខ្មែរ មុខរបរកម្មការិនីរោងចក្រ ស្នាក់នៅបន្ទប់ ជួលភូមិត្រពាំងប្រុយ ឃុំបែកចាន ស្រុកអង្គស្នួល ខេត្តកណ្តាល។
វត្ថុតាងដែលសមត្ថកិច្ចចាប់ដកហូតបានរួមមាន៖ ១.ម៉ូតូ ០១គ្រឿង ម៉ាក Honda Beat (ហុងដាប៊ីត) ពណ៌ ខៀវ-ស ពាក់ផ្លាកលេខ ភ្នំពេញ 1IW-2405 ផលិតឆ្នាំ២០២១ ជារបស់ជនរងគ្រោះ។ ២.ទូរសព្ទ័ដៃ ០១ គ្រឿងម៉ាក IPhone 6 plus ពណ៌ទឹកប្រាក់។
ក្រោយចាប់ខ្លួនបាន ជនសង្ស័យត្រូវបានបញ្ជូនមកកាន់អធិការដ្ឋាននគរបាលស្រុកអង្គស្នួល ដេីម្បីបន្តនីតិវិធី៕
អត្ថបទ៖តាខ្មៅ