សិល្បៈជាតិ៖ ដោយមើលឃើញថាព្រឹទ្ធាចារ្យ ចាប៉ីដងវែង គង់ណៃ កំពុងតែធ្ងន់ធ្ងរ ហើយត្រូវសម្រាកព្យាបាលនៅមន្ទីរពេទ្យ តារាចម្រៀង ពេជ្រ សោភា បានប្រកាសចូលរួមឧបត្ថម្ភថវិកាផ្ទាល់ខ្លួន ដើម្បីជួយសម្រាលបន្ទុកគ្រួសារលោកព្រឹទ្ធាចារ្យ។
កាលពីម្សិលមិញនេះ (28 តុលា 2022) ម្ចាស់បទ «អូនទៅហើយ» បានចែករំលែកឱ្យអ្នកគាំទ្រ និងអ្នកតាមដានខ្លួនបានដឹងថា អ្នកនាងបានចំណាយថវិកាផ្ទាល់ខ្លួនចំនួន៥០០ដុល្លារ (ប្រាំរយដុល្លារ) ជួយដល់ការចំណាយលើការព្យាបាលលោកព្រឹទ្ធាចារ្យ។
អ្នកនាងក៏បានអំពាវនាវសូមឱ្យជនរួមជាតិ ឱ្យរៃអង្គាសថវិកា តិចច្រើនទៅតាមកម្លាំងសិទ្ធាដើម្បីរួមគ្នាជួយជាវិភាគទានដល់លោក ក្នុងការព្យាបាលជំងឺ ដើម្បីឱ្យលោកបានបន្តអភិរក្សសិល្បៈចាប៉ីដងវែងជាបន្តទៅទៀត។
ក្រៅពីអ្នកនាង ពេជ្រ សោភា ដៃគូចម្រៀងក្នុងបទ «Times To Rise» វណ្ណដា ក៏បានប្រកាសយុទ្ធនាការ១០០លានរៀលដើម្បីប្រមូលថវិកាជូនដល់គ្រួសារលោកតា ដើម្បីសម្រាលបន្ទុកចំណាយលើថ្នាំពេទ្យនិងនិងការផ្គត់ផ្គង់ជីវភាពប្រចាំផងដែរ៕