សិល្បៈជាតិ៖ ហេតុការណ៍ជាន់គ្នាដែលបណ្ដាលឱ្យមានមនុស្សស្លាប់យ៉ាងហោចណាស់១៥១ នៅប្រទេសកូរ៉េខាងត្បូងកាលពីថ្ងៃទី២៩ ខែតុលា ឆ្នាំ២០២២ នោះ ក៏មានវត្តមាន Madam Da ដែលជាអ្នកលក់ឡេអនឡាញ និងបុគ្គលល្បីលើបណ្ដាញសង្គមនិងស្វាមីស្ថិតនៅហេតុការណ៍នោះដែរ។ ជាសំណាងល្អគឺស្ត្រីខ្មែរនិងស្វាមីជនជាតិថៃបានរួចរស់ជីវិតពីក្នុងសោកនាដកម្មដែលបានឆក់យកជីវិតរាប់រយនាក់នោះ។
តាមការរៀបរាប់ Madam Da បាននាំប្ដីទៅព្យាបាលជើងនៅប្រទេសកូរ៉េហើយក៏បានឆ្លៀតទៅដើរលេងនៅម្ដុំ Itaewon ដែលជាមជ្ឈមណ្ឌលនិងហាងទំនើបដ៏ធំមួយរបស់ប្រទេសកូរ៉េខាងត្បូង ដែលជាទីតាំងប្រារព្ធកម្មវិធីបុណ្យហាឡូវីនដ៏ធំមួយកន្លែងក្នុងប្រទេសកូរ៉េខាងត្បូង។
ហេតុការណ៍ជាន់គ្នានេះគឺជាសោកនាដកម្មដ៏ធំមួយបន្ទាប់ពីហេតុការណ៍លិចសាឡាងសម្លាប់មនុស្ស៣០៤នាក់ ដែលភាគច្រើនជាសិស្សវិទ្យាល័យកាលពីខែមេសា ឆ្នាំ២០១៤។ ពីអតីតកាលធ្លាប់មានសោកនាដកម្មជាន់គ្នាបែបនេះកើតឡើងនៅប្រទេសកូរ៉េខាងត្បូង ដោយកាលពីឆ្នាំ២០០៥ មនុស្ស១១ត្រូវបានសម្លាប់ ចំណែក៦០នាក់ទៀតរបួសក្នុងហេតុការណ៍ជាន់គ្នាមួយ នាការប្រគំតន្ត្រីប៉ុបក្នុងក្រុង Sangju ស្ថិតនៅប៉ែកខាងត្បូងប្រទេស។ ដោយឡែកនៅឆ្នាំ១៩៩២ ក្មេងស្រីវ័យជំទង់ម្នាក់បានស្លាប់ និងមនុស្សរាប់សិបនាក់ទៀតបានរងរបួសក្នុងហេតុការណ៍ជាន់គ្នាមួយនាការប្រគំតន្ត្រីមួយក្នុងក្រុងសេអ៊ូលរបស់ក្រុមចម្រៀងប៉ុបអាមេរិក News Kids on the Block។
បើយោងតាមសារព័ត៌មាននិងរដ្ឋបាលកូរ៉េ បានប្រកាសថាជនរងគ្រោះដែលស្លាប់ក្នុងហេតុការណ៍នេះភាគច្រើនគឺជាយុវជនដែលស្ថិតក្នុងវ័យ២០ឆ្នាំប្លាយ៕
ទស្សនាវីដេអូខ្លះចេញពីសោកនាដកម្មនៅប្រទេសកូរ៉េ ខាងក្រោម
