ប្រទេសថៃ បានរៀបចំការប្រកួតជើងឯប្រដាល់សេរី Kick Boxing នៅក្នុងប្រទេសខ្លួន ដើម្បីជាកម្តៅសាច់ដុំសម្រាប់មួយដ៏សំខាន់មុនរៀបចំធ្វើម្ចាស់ផ្ទះក្នុងប្រកួតពានរង្វាន់ជើងឯកអាស៊ី Asian Kickboxing Championship។
ការប្រកួតកីឡាប្រដាល់លើកទី១ នៅប្រទេសថៃនេះ ប្រព្រឹត្តទៅនៅកីឡដ្ឋាន Thai-Japanese Stadium ក្នុងរាជធានីបាងកក ប្រទេសថៃ ដែលចាប់ពីថ្ងៃទី២០ ដល់៣០ ខែតុលា ឆ្នាំ២០២២ ខណៈការប្រកួតនេះជើងឯកប្រដាល់សេរីនេះរៀបចំឡើងក្នុងគោលបំណងលើកម្ពស់វិស័យកីឡា និងជ្រើសរើសកីឡាករសម្រាប់ក្រុមជម្រើសជាតិថៃ ផងដែរ។
បើតាមសារព័ត៌មាន Bangkok Post បានបញ្ជាក់ថាការប្រកួតនេះចែកចេញជាបីប្រភេទសម្រាប់គូប្រកួតអាយុ១៣-១៥ឆ្នាំ ១៦-១៨ឆ្នាំ និងអាយុ១៩-៤០ឆ្នាំ ហើយការប្រកួតនេះជើងឯកប្រដាល់សេរីនេះ ផ្តោតលើលក្ខន្តិកៈ និងច្បាប់របស់ របស់សមាគមន៏ប្រដាល់ពិភពលោក (WAKO)។
កីឡាករ Tira Buyanee Kittikorn មកពីសមាគមន៏ Kickboxing នៃប្រទេសថៃ បាននិយាយថា វាជាលើកទីមួយសម្រាប់សមាគមន៏ ដែលរៀបចំព្រឹត្តិការណ៍នេះ ដោយប្រើច្បាប់ និងលក្ខន្តិកៈរបស់ សមាគមន៏កីឡាប្រដាល់ពិភពលោក WAKO ខណៈលោក Nassiri Nassiri ប្រធានសហព័ន្ធ Kickboxing អាស៊ី (WAKO) បានតាមដានការប្រកួតយ៉ាងដិតដល់ទៀតផង។
ជាមួយគ្នានោះដែរសមាគមប្រដាល់ថៃ ក៏បានប្តេជ្ញាចិត្ត និងត្រៀមខ្លួនជាស្រេចដើម្បីធ្វើជាម្ចាស់ផ្ទះព្រឹត្តិការណ៍នេះឲ្យអស់ពីសមត្ថភាព និងធ្វើឱ្យអ្វីៗគ្រប់យ៉ាងស្របតាមស្តង់ដារអន្តរជាតិ ហើយវាក៏ជាឱកាសដ៏ល្អសម្រាប់ខ្លួនក្នុងការស្វែងយល់ពីច្បាប់ថ្មី និងទទួលបានបទពិសោធន៍ក្នុងការរៀបចំព្រឹត្តិការណ៍បែបនេះ មុនពេលធ្វើជាម្ចាស់ផ្ទះព្រឹត្តិការណ៍ Asian Kickboxing Championship នៅខែធ្នូ ខាងមុខ។
កំពូលតារាប្រដាល់ដ៏ល្បីរបស់ថៃ Buakaw Banchamek ដែលគេស្គាល់ថាជាកំពូលអ្នកប្រដាល់ ជួយគ្រប់គ្រងក្រុមថៃ ឲ្យឈ្នះមេដាយមាសកីឡាប្រដាល់សេរីចំនួនពីរនៅស៊ីហ្គេមនៅប្រទេសវៀតណាម បាននិយាយថា៖« ការប្រកួតប្រដាល់ជើងឯកថៃឆ្នាំ ២០២២ នឹងគាំទ្រទាំងវិស័យកីឡាជាទូទៅ និងផ្តល់ឱកាសឲ្យភាគីពាក់ព័ន្ធស្វែងយល់អំពី ច្បាប់របស់ខ្លួន និងបញ្ហាសំខាន់ៗផ្សេងទៀត ដែលនឹងក្លាយជាគន្លឹះក្នុងការអភិវឌ្ឍន៍កីឡានាពេលអនាគត។ គោលដៅរបស់យើងគឺមិនត្រឹមតែទទួលបានអ្នកប្រដាល់កាន់តែច្រើនសម្រាប់ក្រុមជម្រើសជាតិប៉ុណ្ណោះទេ ប៉ុន្តែក៏ជាការលើកកម្ពស់វិស័យកីឡា ក៏ដូចជាផ្តល់ឱកាសដល់ភាគីពាក់ព័ន្ធក្នុងការស្វែងយល់ពីអ្វីដែលថ្មីអំពីកីឡាប្រដាល់សេរីផងដែរ»។
ការប្រកួតដែលគាំទ្រជាចម្បងដោយអាជ្ញាធរកីឡានៃប្រទេសថៃ (SAT) គឺជាចលនាចុងក្រោយបំផុតដោយសមាគម Kickboxing នៃប្រទេសថៃ ដើម្បីផ្សព្វផ្សាយកីឡាដែលទទួលបានការពេញនិយមកើនឡើងចាប់តាំងពីទទួលបានជោគជ័យក្នុងព្រឹត្តិការណ៍ស៊ីហ្គេមនៅប្រទេសវៀតណាមកាលពីដើមឆ្នាំនេះ ដោយទទួលបានជាមួយនឹងមេដាយមាសចំនួន១២ នៅក្នុងការប្រកួតនេះ ប្រទេសថៃដណ្ដើមបានមេដាយមាសចំនួន២ ប្រាក់ចំនួន៤ និងមេដាយសំរឹទ្ធចំនួន៦ ខណៈដែលម្ចាស់ផ្ទះរៀតណាមដណ្តើមបានមេដាយមាសចំនួន៥ ប្រទេសហ្វីលីពីន ដណ្តើមបានចំនួន២ ប្រទេសឥណ្ឌូនេស៊ី ដណ្តើមបាន២ និងប្រទេសកម្ពុជា ដណ្តើមបាន១ ក្នុងចំណោម១២មេដាយមាស។
ឥឡូវនេះសម្រាប់ Kickboxing គឺជាវិញ្ញាសាដ៏សំខានមួយដែលតែងតែដាក់រួមបញ្ចូលក្នុងព្រឹត្តិការណ៍កីឡាអន្តរជាតិជាច្រើន រួមទាំងព្រឹត្តិ្កការណ៏ស៊ីហ្គេម ក៏ដូចជាការប្រកួតកីឡាអាស៊ីក្នុងផ្ទះ និងក្បាច់គុនលើកទី៦ ដែលនឹងត្រូវប្រារព្ធធ្វើនៅប្រទេសថៃនៅឆ្នាំក្រោយផងដែរ៕