កីឡាការិនីអត់ទាន់មានចំណាត់ថ្នាក់ Barbora Krejčíková ជនជាតិឆែក បានឈ្នះជើងឯកពានរង្វាន់វាយកូនបាល់អន្តរជាតិ 2021 French Open វិញ្ញាសាឯកត្តជននារី ដែលធ្វើឡើងនៅទីក្រុងបារីស ប្រទេសបារាំង ក្រោយយកឈ្នះលើកីឡាការិនី Anastasia Pavlyuchenkova របស់រុស្ស៊ី ដោយលទ្ធផល ៦-១,២-៦ និង៦-៤។
តាមពិតកីឡាការិនី Barbora Krejčíková ធ្លាប់ឡើងឈរលេខ១ពិភពលោក ផ្នែកវាយគូនារី តាំងពីឆ្នាំ២០១៨ មកម៉្លេះ ហើយធ្លាប់សហការជាមួយដៃគូឈ្នះជើងឯកវាយគូនារី 2018 French Open និង 2018 Wimbledon ខណៈវាយគូចម្រុះ (បុរស-នារី) ធ្លាប់ឈ្នះជើងឯក Australian Open ឆ្នាំ២០១៩,២០២០ និង២០២១ ផងដែរ។ តែចូលដល់ឆ្នាំ២០២១ កីឡាការិនីវ័យ២៥ឆ្នាំរូបនេះប្តូរទៅលេងវិញ្ញាសាឯកត្តជនផង និងវិញ្ញាសាវាយគូនារី ទៀតផង។
អត្ថបទពាក់ព័ន្ធ៖កីឡាករDjokovic ឡើងទៅវគ្គផ្ដាច់ព្រ័ត្រលើកទី២ ខណៈកីឡាការិនីអត់ចំណាត់ថ្នាក់ម្នាក់ឡើងដែរ
ក្រោយឈ្នះជើងឯកវាយឯកត្តជននារី Barbora Krejčíková និងមិត្តរួមជាតិ Kateřina Siniaková ត្រូវប្រកួតវគ្គផ្ដាច់ព្រ័ត្រវិញ្ញាសាវាយគូនារី មួយទៀត ជាមួយកីឡាការិនី Bethanie Mattek-Sands របស់អាមេរិក ជាមួយIga Świątek របស់ប៉ូឡូញ លើទីលាន Roland Garros Stadium។
«ខ្ញុំពិតជារីករាយមែនទែនដែលក្តីសុបិន្ដបានក្លាយជាការពិត តែវាពិតជាត្រេកត្រអាលខ្លាំងបើសិនខ្ញុំអាចសាងប្រវត្តិសាស្ត្រឈ្នះជើងឯក៣ វិញ្ញាសាផ្សេងគ្នា នៅ Grand Slamនេះបាន។ ពិតជាមិនគួរឱ្យជឿមែន»។ កីឡាការិនី Barbora Krejčíková លើកឡើង។
*Grand Slam គឺសំដៅលើព្រឹត្តិការណ៍វាយកូនបាល់អន្តរជាតិធំៗចំនួន ៤ លើលោក ដែលក្នុងនោះមាន Australian Open (នៅអូស្ត្រាលី) Wimbledon (អង់គ្លេស) និង US Open (នៅអាមេរិក) និង French Open (នៅបារាំង)៕