កីឡាករ Bryan Bagunas ជម្រើសជាតិរបស់ហ្វីលីពីន ដែលជាដៃគូដ៏ស្អិតល្មួតរបស់កីឡាករកម្ពុជា វឿន វាសនា នៅក្លិប Win Streak ក្នុងលីគបាល់ទះរបស់តៃវ៉ាន់ គឺជាកីឡាករបាល់ទះតែម្នាក់គត់ នៅក្នុងតំបន់អាស៊ាន ផ្ទេរទៅលេងនៅលីគបាល់ទះជប៉ុន រដូវកាលនេះ។
Bryan Bagunas បានសម្រេចចុះកុងត្រាចូលរួមជាមួយក្លិប Osaka Bluteon របស់ជប៉ុន កាលពីថ្ងៃទី១៧ កញ្ញាកន្លងទៅ ដែលមាន Super Star ឆ្វេងជប៉ុន Yuji Nishida នៅលីគបាល់ទះជប៉ុន។
សម្រាប់កីឡាករបរទេសដែល ផ្ទេរទៅលេងនៅលីគបាល់ទះជប៉ុន រដូវកាលឆ្នាំ២០២៥-២៦នេះ រួមមាន៖ ចិន ១នាក់ បារាំង ១នាក់ ហ្វីលីពីន ១នាក់ គុយបា ១នាក់ ប្រេស៊ីល ១នាក់ អាហ្សង់ទីន ១នាក់ ស្លូវើនី ១នាក់ ព័រទុយហ្គាល់ ១នាក់ ប៉ូឡូញ ២នាក់ និងអាមេរិក ២នាក់។
សូមរំលឹកថា កីឡាករ Bryan Bagunas អតីតសមាជិករបស់ក្រុមបាល់ទះ Win Streak និងជាដៃគូរបស់ វឿន វាសនា បានផ្លាស់ទៅចូលរួមជាមួយក្រុម Cignal HD Spikers របស់ហ្វីលីពីន ក្នុងលក្ខខណ្ឌខ្ចីជើង កាលពីដើមឆ្នាំ២០២៤។
កាលនៅហ្វីលីពីន មុនចូលរួមជាមួយក្លិប Osaka Bluteon របស់ជប៉ុន រូបគេក៏បានជួយឱ្យក្រុមបាល់ទះ Cignal HD Spikers ឈ្នះជើងឯក នៃពានរង្វាន់ Spikers’ Turf (2024 Open Conference) រដូវកាល ២០២៤ របស់ប្រទេសហ្វីលីពីន ព្រមទាំងជាប់ឈ្មោះជាកីឡាករឆ្នើម (MVP)។
គួរបញ្ជាក់ថា កីឡាករ Bryan Bagunas កើតនៅថ្ងៃទី១០ ខែតុលា ឆ្នាំ១៩៩៧ អាយុ ២៧ឆ្នាំ និងកម្ពស់ ១.៩៥ម៉ែត្រ រូបធ្លាប់ជួយឱ្យក្រុមជម្រើសជាតិហ្វីលីពីន ឈ្នះមេដាយប្រាក់ ក្នុងព្រឹត្តិការណ៍ស៊ីហ្គេម ឆ្នាំ២០១៩៕
