យោងតាមការចុះផ្សាយរបស់ទីភ្នាក់ងារព័ត៌មាន AP កាលពីថ្ងៃទី២ ខែវិច្ឆិកា ឆ្នាំ២០២៦ បានឱ្យដឹងថា ក្នុងអំឡុងចុងសប្ដាហ៍នៃពិធីបុណ្យហាឡូវីនកន្លងទៅនេះ កើតមានករណីបាញ់ប្រហារយ៉ាងរន្ធត់នៅតាមតំបន់កម្សាន្ត និងកន្លែងកម្សាន្តពេលរាត្រីជាច្រើនកន្លែងនៅទូទាំងសហរដ្ឋអាមេរិក បណ្តាលឱ្យមនុស្សយ៉ាងហោចណាស់ ៦នាក់ស្លាប់បាត់បង់ជីវិត និងរាប់សិបនាក់ផ្សេងទៀតបានរងរបួស។
ហេតុការណ៍ហិង្សាធ្ងន់ធ្ងរជាងគេបានកើតឡើងនៅទីក្រុងដាឡាស (Dallas) រដ្ឋតិចសាស់ ដោយមានការបាញ់ប្រហារជាច្រើនចំណុចនៅក្នុងតំបន់ “Deep Ellum” ដែលជាមជ្ឈមណ្ឌលប្រមូលផ្តុំទៅដោយភោជនីយដ្ឋាន និងកន្លែងកម្សាន្តរាត្រី បណ្តាលឱ្យមនុស្ស ៤នាក់ស្លាប់ និង ១៥នាក់រងរបួស។ លោក Daniel Como ប៉ូលិសក្រុងដាឡាសបានឱ្យដឹងថា ការបាញ់ប្រហារ ៣លើកបានកើតឡើងក្នុងរយៈពេលត្រឹមតែជាង ១ម៉ោងកាលពីយប់ថ្ងៃសៅរ៍ ទី៣១ ខែតុលា ហើយអាជ្ញាធរកំពុងស៊ើបអង្កេតថាតើ ករណីទាំងនេះមានទំនាក់ទំនងគ្នាកម្រិតណា ខណៈជនសង្ស័យមួយចំនួនត្រូវបានចាប់ខ្លួនជាបណ្តោះអាសន្ន។
ក្រៅពីនេះ ក៏ករណីបាញ់ប្រហារជាច្រើនទៀតបានកើតឡើងនៅតាមតំបន់ក្បែរសកលវិទ្យាល័យនានាក្នុងរដ្ឋជាច្រើនទៀតដូចជា៖
-រដ្ឋអាឡាបាម៉ា (Alabama)៖ នៅទីក្រុង Birmingham ករណីបាញ់ប្រហារ ២លើកបានកើតឡើងនៅខាងក្រៅកីឡដ្ឋាន Legion Field បន្ទាប់ពីចប់ការប្រកួតពានរង្វាន់ “Magic City Classic” កាលពីយប់ថ្ងៃសៅរ៍ បណ្តាលឱ្យមនុស្ស ១នាក់ស្លាប់ និង ៨នាក់រងរបួស។ អាជ្ញាធរបានឃាត់ខ្លួនជនសង្ស័យម្នាក់ និងដកហូតបានអាវុធជាច្រើនដើមនៅកន្លែងកើតហេតុ។
-រដ្ឋអ៊ីលលីណយ (Illinois)៖ នៅទីក្រុង Bloomington ក្បែរសកលវិទ្យាល័យ Illinois Wesleyan ករណីបាញ់ប្រហារកាលពីព្រឹកព្រលឹមថ្ងៃអាទិត្យ បានបណ្តាលឱ្យស្ត្រីវ័យ ១៩ឆ្នាំម្នាក់ស្លាប់ ស្ត្រីម្នាក់ទៀតរងរបួសធ្ងន់ធ្ងរ និង ៦នាក់ផ្សេងទៀតរងរបួស។
-រដ្ឋដេឡាវ៉ែរ (Delaware)៖ នៅទីក្រុង Newark ក្បែរដីកោះនៃសកលវិទ្យាល័យ Delaware មនុស្ស ៦នាក់បានរងរបួសដោយសារការបាញ់ប្រហារកាលពីយប់ថ្ងៃសៅរ៍ ហើយត្រូវបានបញ្ជូនទៅមន្ទីរពេទ្យភ្លាមៗ។
-រដ្ឋអាកាន់សាស (Arkansas)៖ នៅទីក្រុង Fayetteville ក្បែរសកលវិទ្យាល័យ Arkansas មនុស្ស ៦នាក់ត្រូវបានបញ្ជូនទៅមន្ទីរពេទ្យបន្ទាប់ពីត្រូវគ្រាប់កាំភ្លើងកាលពីព្រឹកព្រលឹមថ្ងៃអាទិត្យ ដែលដើមហេតុបណ្តាលមកពីជម្លោះពាក្យសម្តី។
ដោយឡែក កាលពីថ្ងៃសុក្រ ក៏មានករណីបាញ់ប្រហារដាច់ដោយឡែកពីគ្នាចំនួន ២លើកផ្សេងទៀតបានកើតឡើងនៅហាង “Spirit Halloween” ក្នុងរដ្ឋកាលីហ្វ័រញ៉ា និងរដ្ឋមីឈីហ្គែន។ ក្នុងនោះ នៅទីក្រុង Fairfield រដ្ឋកាលីហ្វ័រញ៉ា ការបាញ់ប្រហារក្នុងហាងបានសម្លាប់ស្ត្រីមានផ្ទៃពោះវ័យ ៣១ឆ្នាំម្នាក់ និងបង្កឱ្យមនុស្ស ៦នាក់ទៀតរងរបួស ខណៈនៅទីក្រុង Madison Heights រដ្ឋមីឈីហ្គែន បុរសវ័យ ២១ឆ្នាំម្នាក់ត្រូវបានបាញ់សម្លាប់ផងដែរ។
រហូតមកទល់ថ្ងៃចេញផ្សាយព័ត៌មាន កងកម្លាំងសមត្ថកិច្ច និងអាជ្ញាធរប៉ូលិសនៅតាមរដ្ឋនីមួយៗនៃសហរដ្ឋអាមេរិកកំពុងបន្តការស៊ើបអង្កេតយ៉ាងយកចិត្តទុកដាក់ ដើម្បីប្រមូលភស្តុតាង និងតាមចាប់ខ្លួនជនល្មើសមកផ្តន្ទាទោសតាមច្បាប់៕
