សិល្បៈអន្តរជាតិ៖ ត្បិតកម្មវិធី Met Gala Red Carpet 2024 ដែលបានរៀបចំឡើងកាលពីថ្ងៃទី៦ ខែឧសភា កន្លងទៅ បានបញ្ចប់ទៅដោយជោគជ័យទៅហើយក្ដី ប៉ុន្តែចំណាប់អារម្មណ៍លើតារាស្រី Camila Cabello នៅតែត្រូវបានសាធារណជនលើកយកមកជជែកជាប្រធានបទ នោះក៏ព្រោះតែកាបូបទឹកកកដ៏ប្រណិត ស្អាត ប្លែក ដែលនាងបានកាន់ដើរនារាត្រីនោះ។
![](https://cdn.troryorng.com/wp-content/uploads/2024/05/27131302/photo1715223552-1024x682.jpeg)
នៅក្នុងរាត្រីសមោសរនៃកម្មវិធី Met Gala Red Carpet 2024 ដែលរៀបចំឡើងក្រោមមូលបទ «The Garden of Time» និង «Sleeping Beauties: Reawakening Fashion» ទើបធ្វើឱ្យតារាជាច្រើនបានបង្ហាញវត្តមានក្នុងសំលៀកបំពាក់ដែលស្របទៅតាមលំនាំនៃមូលបទកម្មវិធី។ នៅក្នុងចំណោមតារាស្រស់ស្អាត និងស្រស់សង្ហា ដ៏ច្រើនស្អេកស្កះគ្នានោះ Camila Cabello បានបង្ហាញវត្តមាននៅក្នុងសំលៀកបំពាក់ជារ៉ូបដែលមានទម្ងន់រហូតដល់ ១៥ ផោន គិតជាគីឡូ ប្រមាណជិត ៧គីឡូ រចនាយ៉ាងប្រណិតដោយត្បូងគ្រីស្ដាល់២៥០០០គ្រាប់ ពេញមួយតួខ្លួនតែម្ដង។
ក្រៅពីរ៉ូបដែលស្លៀកទាក់ភ្នែកអ្នកចូលរួមហើយនោះ អ្វីដែលកាន់តែពិសេសជាងនោះទៀតគឺ កាបូបដៃតូចច្រឡឹងបង្កប់ទៅដោយផ្កាកុលាបមួយទងមានរាងជាចតុកោណកែង។ ត្បិតថាមើលទៅឃើញសាមញ្ញ អាចគិតថាគ្រាន់តែជាដុំទឹកកកបង្កប់ផ្កាកុលាបមួយទងក៏ពិតមែន ប៉ុន្តែតម្លៃរបស់វាវិញនោះមិនធម្មតានោះឡើយ ព្រោះវាមានតម្លៃខ្ពស់រហូតដល់២២.៥ម៉ឺនដុល្លារឯណោះ។
![](https://cdn.troryorng.com/wp-content/uploads/2024/05/27131303/photo1715223552-2.jpeg)
![](https://cdn.troryorng.com/wp-content/uploads/2024/05/27131304/photo1715223552-1.jpeg)
គួរដឹងថា ដើម្បីអាចច្នៃ និង រចនា កាបូបដ៏ស្អាតនិងប្លែកភ្នែកនេះបាន អ្នករចនាបានចំណាយពេលសរុប ៨៥ម៉ោង ធ្វើដោយដៃ ដោយសាច់កាបូបគេយកទឹកពី NEVAS នៅប្រទេសអាឡឺម៉ង់ និងផ្កាកុលាបធ្វើដោយដៃជាមួយនឹងខ្សែមាសសុទ្ធ 18k តុបតែងដោយពេជ្រកាត់យ៉ាងល្អឥតខ្ចោះដែលមានទំងន់ ០.៥០ ការ៉ាត់៕
![](https://cdn.troryorng.com/wp-content/uploads/2024/04/27142737/Troryorng-Telegram-1-1024x126-1-1-1-1.jpg)