ក្រុមបាល់ទាត់ជម្រើសជាតិកម្ពុជា នឹងបង្ហាញខ្លួនជាលើកទី១០ ក្នុងវគ្គចែកពូលនៃពានរង្វាន់ជើងឯកប្រចាំតំបន់អាស៊ាន AFF Championship ដែលបច្ចុប្បន្នមានឈ្មោះស្របតាមម្ចាស់ឧបត្ថម្ភ ថា ASEAN Mitsubishi Electric Cup ខណៈពានរង្វាន់នេះបង្កើតឡើងដំបូងតាំងពី១៩៩៦ មក ដោយមានឈ្មោះថា AFF Tiger Cup ហើយក្រោយមកប្តូរឈ្មោះទៅជា AFF Suzuki Cup។
បើតាមអ៊ីម៉ែលដែលសារព័ត៌មានត្រយង ទទួលបានពីសហព័ន្ធកីឡាបាល់ទាត់អាស៊ាន បានបញ្ជាក់ថាពានរង្វាន់ASEAN Mitsubishi Electric Cup ឆ្នាំ២០២៤ នេះនឹងដំណើរការពីថ្ងៃទី២៣ ខែវិច្ឆិកា ដល់២១ ខែធ្នូ ឆ្នាំ២០២៤ ស្របពេលដែលប្រទេសជាសមាគមន៍អាស៊ាន រួមគ្នាធ្វើជាម្ចាស់ផ្ទះ។ ក្រុមចំនួន១១ បែងចែកការប្រកួតជា២ដំណាក់កាល ដោយក្នុងនោះ៖
*ដំណាក់កាលទី១៖ វគ្គជម្រុះ ប្រ៊ុយណេ ប៉ះ ទីម័រខាងកើត (អ្នកឈ្នះឡើងទៅដំណាក់កាលទី២)
*ដំណាក់កាលទី២៖ វគ្គជម្រុះតាមពូលបន្តទៅរកជើងឯក មានក្រុមរង់ចាំដូចជា កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ វៀតណាម និងក្រុមឈ្នះនៅដំណាក់កាលទី១ ចំនួន១ក្រុម (ទីម័រខាងកើត ឬ ប្រ៊ុយណេ)។
ក្រុមទាំងអស់នឹងចាប់ឆ្នោតបែងចែកជា២ពូល ដោយការចាប់ឆ្នោតនឹងធ្វើឡើងនៅថ្ងៃអង្គារ ទី២១ ខែឧសភា ឆ្នាំ២០២៤ វេលាម៉ោង២រសៀល នៅជាន់ទី៧១ នៃសណ្ឋាគារ The InterContinental Hanoi Landmark72 ក្នុងរដ្ឋធានីហាណូយ ប្រទេសវៀតណាម។ ការចាប់ពូលនេះក៏មានផ្សាយផ្ទាល់នៅលើបណ្តាញសង្គមរបស់សហព័ន្ធបាល់ទាត់អាស៊ាន ផងដែរ។
សហព័ន្ធបាល់ទាត់អាស៊ាន បានបង្កើតពានរង្វាន់ AFF Championship នេះរាល់២ឆ្នាំម្តងគិតតាំងពីឆ្នាំ១៩៩៦ មកស្របពេលដែរប្រទេសចំនួន៤ធ្លាប់គ្រងជើងឯក ក្នុងនោះថៃ ឈ្នះបាន៧លើក សិង្ហបុរី ឈ្នះ៤លើក វៀតណាម ឈ្នះបាន២លើក និងម៉ាឡេស៊ី ឈ្នះបាន១លើក។
អត្ថបទពាក់ព័ន្ធ៖អបអរសាទរ! ក្រុមជម្រើសជាតិថៃ ក្លាយជាម្ចាស់ជើងឯក AFF Championship ២០២២
សម្រាប់កម្ពុជា ធ្លាប់ចូលរួមការប្រកួតវគ្គចែកពូលនេះចំនួន៩លើកមកហើយ ប៉ុន្តែមិនទាន់បានឆ្លងផុតវគ្គចែកពូលនៅឡើយនោះទេ៕
