ការប្រកួតបាល់ទាត់ជើងឯកខេមបូឌានលីគយុវជន ឆ្នាំ២០២៤ ដោយមាន ២កម្រិតអាយុផ្សេងគ្នាគឺ លីគយុវជនអាយុក្រោម១៦ឆ្នាំ និងលីគយុវជនអាយុក្រោម១៩ឆ្នាំ នឹងចាប់ផ្ដើមប្រកួតពីថ្ងៃអាទិត្យ ទី១៩ ខែឧសភា ឆ្នាំ២០២៤ នេះ ។
ក្នុងនោះសារព័ត៌មានត្រយង នឹងធ្វើការផ្សាយផ្ទាល់សម្រាប់ការប្រកួតរវាង ក្រុមយុវជនអាយុក្រោម១៩ឆ្នាំ វិសាខា ទល់នឹងយុវជនសាលាបាល់ទាត់ជាតិបាទីអាយុ១៦ឆ្នាំ ដោយការប្រកួតនឹងធ្វើឡើងនៅមជ្ឍមណ្ឌលហ្វឹកហាត់វិសាខា វេលាម៉ោង ៣:៣០នាទីរសៀលតទៅ។
សម្រាប់ការចាប់ផ្តើមរដូវកាលដំបូង លីគយុវជនអាយុ១៩ឆ្នាំ មានក្រុម ១០ចូលរួមប្រកួត មានដូចជា៖ ណាហ្គាវើលដ៍, សមាគមកីឡាបាល់ទាត់ខេមរភូមិន្ទ, អង្គរថាយហ្គឺរ, ព្រះខ័នរាជស្វាយរៀង, ភ្នំពេញក្រោន, វិសាខា, ISI ដង្កោសែនជ័យ, បឹងកេត, សាលាតម្រង់ទិសរាជធានីភ្នំពេញអាយុ១៨ឆ្នាំ និង សាលាបាល់ទាត់ជាតិបាទីអាយុ១៦ឆ្នាំ។
ដោយឡែកសម្រាប់លីគយុវជនអាយុក្រោម១៦ឆ្នាំ មាន១០ក្រុមចូលរួមប្រកួត មានដូចជា៖ យុវជនណាហ្គាវើលដ៍, សមាគមកីឡាបាល់ទាត់ខេមរភូមិ, អង្គរថាយហ្គឺរ, ព្រះខ័នរាជស្វាយរៀង, ភ្នំពេញក្រោន, វិសាខា, ISI ដង្កោសែនជ័យ, បឹងកេត, សាលាតម្រង់ទិសរាជធានីភ្នំពេញអាយុ១៥ឆ្នាំ និង ក្លិបសៀមរាប យូណាយធីត។
តាមការគ្រោងទុក កម្មវិធីប្រកួតលីគយុវជនកម្ពុជានឹងចាប់ផ្តើមនៅថ្ងៃទី១៩ ខែឧសភា ឆ្នាំ២០២៤។ រូបមន្តនៃការប្រកួតគឺវិលជុំសន្សំពិន្ទុ២ជើង (ក្នុងដី និងក្រៅដី) មុនពេលយកក្រុមកំពូលទាំង៤ឡើងទៅប្រកួតជុំទី៣ដែលមាន៣ប្រកួតទៀត។ ក្រុមមានពិន្ទុខ្ពស់ជាងគេជាជើងឯក៕