មានការចែករំលែកជាច្រើននៅលើបណ្ដាញសង្គមហ្វេសប៊ុកដោយលើកយកសមាជិករបស់ក្រុមយុវជនក្រោមអាយុ១៦ឆ្នាំរបស់ក្លិបវិសាខា ១រូប គឺប្រធានក្រុម ធិន យ៉ុងប៊ិន ថាលើសអាយុនៅក្នុងការប្រកួតពានរង្វាន់លីគយុវជនក្រោមអាយុ១៦ឆ្នាំដែលរៀបចំឡើងដោយសហព័ន្ធកីឡាបាល់ទាត់កម្ពុជា។
![](https://cdn.troryorng.com/wp-content/uploads/2024/05/27124059/Visakha-U16-2023-24-1024x1024.jpg)
ជុំវិញការចោទឡើងបែបនេះលោក មាស ចាន់ណា នាយកបច្ចេកទេសក្លិបបាល់ទាត់វិសាខា បានឆ្លើយតបថា៖«ការប្រើប្រាស់បណ្តេញសង្គមមានមនុស្សច្រើននាក់ណាស់មិនបំពេញព័ត៌មានជាក់លាក់របស់ខ្លួនឡើយ។ សម្រាប់បញ្ហាកីឡាកររបស់ក្លិបយើងរងការចោទប្រកាន់គឺយើងមានឯកសារច្បាស់លាស់ពីភាពត្រឹមត្រូវរបស់គាត់ ទាំងកាតសិស្ស, សៀវភៅគ្រួសារ និងសំបុត្រកំណើត ជាដើម»។
![](https://cdn.troryorng.com/wp-content/uploads/2024/05/27124100/VSK-Player-2024-1024x683.jpg)
លោកបន្តថា៖«សម្រាប់ក្លិបយើងផ្ទាល់ ថ្នាក់ដឹកនាំបានចំណាយធនធានជាច្រើនដើម្បីរួមចំណែកអភិវឌ្ឍន៍វិស័យកីឡាបាល់ទាត់ក្នុងស្រុកឱ្យរីកចម្រើនកាន់តែលឿនរហ័ស។ ដូច្នេះយើងពិនិត្យច្បាស់លាស់នៅពេលបញ្ចូលសមាជិកថ្មីក្នុងឈុតយុវជន ដោយមានឯកសារបញ្ជាក់ព័ត៌មានផ្ទាល់ខ្លួនជាក់លាក់ និងមានការធានាពីឪពុកម្ដាយឬ អាណាព្យាបាលរបស់ក្មេងថាព័ត៌មានរបស់គាត់ត្រឹមត្រូវ។ យើងទទួលរ៉ាប់រងការស្នាក់នៅ ហូបចុក រៀនសូត្រ ហ្វឹកហាត់របស់ពួកគាត់ទាំងអស់។ តើមានឆ្ងល់ទេថា ទន្ទឹមការចំណាយដ៏ច្រើនសន្ធឹកសន្ធាប់នេះ ចាំបាច់យើងទៅពាក់ព័ន្ធនឹងរឿងអវិជ្ជមានបែបនេះ បែបនោះធ្វើអ្វី?»។
បុរសកាន់អាជ្ញាប័ណ្ណគ្រូបង្វឹកកម្រិតទ្វីបអាស៊ី AFC A License រូបនេះបន្ថែមថា៖«ពេលខ្លះការចោទប្រកាន់គ្មានមូលដ្ឋាន ប្រៀបដូចមិនឱ្យតម្លៃគណៈកម្មការរៀបចំការប្រកួត ដូច្នេះដែរ។ សហព័ន្ធគាត់មាន System ចុះបញ្ជីកីឡាករត្រឹមត្រូវ បើក្មេងលើសអាយុគាត់មិនចុះអោយទេ។ បើមានភស្តុតាងជាក់លាក់អាចប្តឹងតវ៉ាទៅសហព័ន្ធបាន ខ្ញុំក៏គាំទ្រដែរ បើសិនមានបញ្ហាកើតឡើងមិនថាក្រុមខ្ញុំ ឬ ក្រុមគេផ្សេង ព្រោះនេះជាការប្រកួតសម្រាប់បណ្ដុះយុវជនថ្នាល។ បើសិនជាព្យាយាមបង្កើតរឿងចោទនេះ ចោទនោះ ទាំងក្មេងមិនមានកំហុស ប្រៀបដូចបំបាក់ស្មារតីក្មេង ពីក្រោយខ្នងអីចឹង»។
![](https://cdn.troryorng.com/wp-content/uploads/2024/05/27124058/Visakha-U16-2024-1024x683.jpg)
លោក មាស ចាន់ណា សំណូមពរដល់អ្នកគាំទ្រកីឡាបាល់ទាត់ជាតិសូមជួយលើកទឹកចិត្តដល់ប្អូនៗជាកីឡាករឱ្យបានច្រើនជាជាងបន្ទោសបង្អាប់ព្រោះថាពួកគាត់គឺជាផ្នែកមួយនៃអនាគតរបស់បាល់ទាត់កម្ពុជា ដោយត្រូវការជំរុញពីផ្នែកពាក់ព័ន្ធទាំងអស់តាំងពីថ្នាក់ដឹកនាំ ក្រុមការងារគ្រូបង្វឹក អាណាព្យាបាល មិត្តរួមក្រុម និងមនុស្សនៅជុំវិញខ្លួន។
សូមបញ្ជាក់ថានៅក្នុងលក្ខន្តិកៈនៃការប្រកួតពានរង្វាន់យុវជនក្រោមអាយុ១៦ឆ្នាំគឺអនុញ្ញាតឱ្យក្លិបបាល់ទាត់ជាសមាជិកអាចចុះបញ្ជីកីឡាករមានកើតនៅថ្ងៃទី១ ខែមករា ឆ្នាំ២០០៨, ២០០៩, ២០១០។ ចំណែកកីឡាករដែលរងការចោទប្រកាន់គឺកើតនៅថ្ងៃទី៧ ខែវិច្ឆិកា ឆ្នាំ២០០៨ ដែលស្ថិតនៅក្នុងការអនុញ្ញាតនៃការចុះបញ្ជីកីឡាករបាន។
ពានរង្វាន់លីគយុវជនក្រោមអាយុ១៦ឆ្នាំរៀបចំពីថ្ងៃទី១៩ ខែឧសភា ដល់ថ្ងៃទី៣ ខែវិច្ឆិកា ឆ្នាំ២០២៤ ដោយមានក្រុមចូលរួមចំនួន១០ក្រុម ប្រកួតប្រជែងចំនួន២ជុំហើយក្រុមដែលមានពិន្ទុច្រើនជាងគេចំនួន៤ក្រុម បន្តឡើងទៅប្រកួតវគ្គពាក់កណ្តាលផ្ដាច់ព្រ័ត្រ និងឈានដល់វគ្គផ្ដាច់ព្រ័ត្រ៕
![](https://cdn.troryorng.com/wp-content/uploads/2024/04/27142737/Troryorng-Telegram-1-1024x126-1-1-1-1.jpg)