អ្នកលេងគុនខ្មែរ ឈឿង ល្វៃ បានក្លាយជាម្ចាស់ខ្សែរក្រវ៉ាត់ I-1 Supreme Champion នៅលើទឹកដីហុងកុង ប្រទេសចិន ក្រោយយកឈ្នះ កីឡាករ Luca Lonmbardo សញ្ជាតិអ៊ីតាលី ដោយពិន្ទុ នៅក្នុងការប្រកួកម្មវិធីលំដាប់ពិភពលោក I-1 World Muay Thai Competition 2024 កាលពីរាត្រីថ្ងៃទី២៥ ខែមិថុនា ឆ្នាំ២០២៤។
![](https://cdn.troryorng.com/wp-content/uploads/2024/06/26094408/ghghg-1024x576.jpg)
ក្នុងការចូលរួមបង្ហាញទង់ជាតិកម្ពុជា ក៏ដូចជាគុនខ្មែរនៅលើទឹកដីហុងកុងនេះ ក៏ជាលើកទី២ ហើយរបស់អ្នកលេងគុនខ្មែរ ឈឿង ល្វៃ ដែលដណ្ដើមបានខ្សែរក្រវ៉ាត់ ដោយលើកទី១ បានក្លាយជាម្ចាស់ខ្សែក្រវាត់ម៉ាតុងកម្រិតពិភពលោក World Super-4 Championship បន្ទាប់ពីបានយកឈ្នះដៃគូ២នាក់ជាប់គ្នា ទី១ ផ្តួលកីឡាករថៃ Fahsang ឡើងទៅវគ្គផ្តាច់ព្រ័ត្រ ឈ្នះកីឡាករអាល្លឺម៉ង់ Elysee Kochiese នៅថ្ងៃទី១២ ខែមីនា ឆ្នាំ២០២៤ នៅទីក្រុងហុងកុង ប្រទេសចិន។
![](https://cdn.troryorng.com/wp-content/uploads/2024/06/26094007/%E1%9E%8A%E1%9E%90%E1%9E%84%E1%9E%A0%E1%9E%8A%E1%9E%90%E1%9E%A0-1024x708.jpg)
ទទួលបានជាខ្សែក្រវាត់ទី២ លើកនេះ អ្នកលេងគុនខ្មែរ ឈឿង ល្វៃ គឺជាការឈ្នះនៅក្រៅប្រទេស ហើយក៏ជាកីឡាករគុនខ្មែរទី១ ដែលបានឈ្នះខ្សែក្រវាត់នៅលើទឹកដីហុងកុង ប្រទេសចិន ២ដងផងដែរ។
គួរបញ្ជាក់ថា សម្រាប់ព្រឹត្តិការណ៍ I-1 World Muay Thai Festival 2024 មានការចូលរួមពីបណ្ដាលប្រទេសជាច្រើនមកពីជុំវិញពិភពលោក រួមមាន៖ ហុងកុង ចិន អ៊ីតាលី អូស្រ្តាលី ទុយនេស៊ី ម៉ារ៉ុក លីប៊ី ន័រវែស យេមែន អ៊ីរ៉ង់ ប្រេស៊ីល អាហ្សង់ទីន ម៉ុងហ្គោលី ជប៉ុន ម៉ាឡេស៊ី ថៃ កម្ពុជា ភីលីពីន ដែលបានរៀបចំឡើងនៅ លើទឹកដីហុងកុង ប្រទេសចិន នាយប់ថ្ងៃទី២៥ ខែមិថុនា ឆ្នាំ២០២៤៕
![](https://cdn.troryorng.com/wp-content/uploads/2024/06/26100016/fghd.jpg)
![](https://cdn.troryorng.com/wp-content/uploads/2024/06/26094013/%E1%9F%81%E1%9E%9A%E1%9E%99%E1%9E%84%E1%9E%8A%E1%9E%84%E1%9E%9F-1024x658.jpg)
![](https://cdn.troryorng.com/wp-content/uploads/2024/04/27142737/Troryorng-Telegram-1-1024x126-1-1-1-1.jpg)