ក្នុងជំនួបសរុបទាំង២ជើង ដែលព្រះខ័នរាជស្វាយរៀង យកឈ្នះភ្នំពេញក្រោន នៃពានរង្វាន់លំដាប់ទី៣ ប្រចាំទ្វីបអាស៊ី AFC Challenge League រដូវកាលឆ្នាំ២០២៥-២៦ មានគ្រាប់កើតឡើងសរុប៨គ្រាប់ ក្រោយបញ្ចប់ក្នុងពហុកីឡដ្ឋានជាតិ នារាត្រីថ្ងៃទី១២ ខែមីនា ឆ្នាំ២០២៦។
នៅជើងទី១ ព្រះខ័នរាជស្វាយរៀង បានយកឈ្នះភ្នំពេញក្រោន ដោយលទ្ធផល ៤ទល់និង១ វគ្គ៨ក្រុមចុងក្រោយ នៃពានរង្វាន់លំដាប់ទី៣ប្រចាំទ្វីប ក្រោមក្រសែភ្នែកអ្នកគាំទ្រជាង ២ម៉ឺននាក់ នាពហុកីឡដ្ឋានជាតិរាជធានីភ្នំពេញ កាលពីរាត្រីថ្ងៃទី៥ ខែមីនា ឆ្នាំ២០២៦។
ឈានដល់ើជើងទី២ ក្រោមក្រសែភ្នែកអ្នកគាំទ្រជាង ១ ម៉ឺន ២ពាន់ ព្រះខ័នរាជស្វាយរៀង បន្តយកឈ្នះដោយស៊ុតបញ្ចូលទី ២គ្រាប់ របូត ១គ្រាប់វិញ ដូចនេះសរុបលទ្ធផលទាំង២ជើង នៅវគ្គ៨ក្រុម ស្វាយរៀង ៦ ភ្នំពេញក្រោន ២ ផ្ដល់ឱកាសឱ្យព្រះខ័នរាជស្វាយរៀង ឡើងទៅកាន់វគ្គ៤ក្រុម។
យ៉ាងណាវិញ សម្រាប់គូប្រកួតរបស់ព្រះខ័នរាជស្វាយរៀង នៅវគ្គ៤ក្រុម រវាង Dewa United ឥណ្ឌូណេស៊ី និង Manila Digger របស់ហ្វីលីពីន នៅមិនទាន់បញ្ចប់ការប្រកួតជើងទី២ឡើង ខណ:ជើងទី១ កន្លងទៅ Manila យកឈ្នះ Dewa ក្នុងលទ្ធផល ១-០ កាលទីថ្ងៃទី៥ មីនា ២០២៦។
ការប្រកួតវគ្គ៨ក្រុមចុងក្រោយ នៃពានរង្វាន់កម្រិតទី៣ ប្រចាំទីបអាស៊ីនេះ គឺបានដំណើរការតែ៤ក្រុមប៉ុណ្ណោះ នៅក្នុងតំបន់អាស៊ីខាងកើត ស្របពេលការប្រកួត៤ក្រុមផ្សេងទៀត នៅតំបន់អាស៊ីខាងលិច គឺពុំទាន់អាចរៀបចំបានឡើយ ក្រោមហេតុផលនៃវិវាទសង្គ្រាមមជ្ឈិមបូព៌ា។
ការប្រកួតវគ្គជម្រុះក្នុងពូលតាមតំបន់ទាំង២ ពានរង្វាន់កម្រិតទី៣ ប្រចាំទ្វីប AFC Challenge League ២០២៥-២៦ ត្រូវបានចាប់ផ្ដើម វគ្គ៨ក្រុមតំបន់ខាងកើតចាប់ផ្ដើមនៅថ្ងៃទី៥ មីនា ស្របពេលតំបន់ខាងលិត ត្រូវបានពន្យាពេល ដោយសារស្ថានភាពភូមិសាស្ត្រ ខណៈវគ្គផ្ដាច់ព្រ័ត្រ នឹងធ្វើឡើងនៅថ្ងៃទី៩ ខែឧសភា ឆ្នាំ២០២៦ ខាងមុខ៕
