ក្រុមបាល់ទះបុរសស្លូវេនី នឹងត្រូវជួបជប៉ុន ក្រុមបាល់ទះបុរសប៉ូឡូញ ត្រូវបារាំង នៅវគ្គពាក់កណ្ដាលផ្ដាច់ព្រ័ត្រ នៃពានរង្វាន់បាល់ទះផ្នែកបុរសកម្រិតពិភពលោក 2024 FIVB Volleyball Men’s Nations League។
មុនឡើងមកកាន់វគ្គពាក់កណ្ដាលផ្ដាច់ព្រ័ត្រនេះ ជប៉ុន យកឈ្នះ កាណាដា ប៉ូឡូញ ឈ្នះប្រេស៊ីល បារាំង ឈ្នះ អ៊ីតាលី និងស្លូវេនី ឈ្នះអាហ្សង់ទីន។
លទ្ធផលប្រកួតថ្ងៃទី២៧ មិថុនា៖
- ជប៉ុន ៣-០ កាណាដា (26–24 , 25–18, 26–24)
- ប៉ូឡូញ ៣-១ ប្រេស៊ីល (18–25, 25–23, 25–22, 25–16)
លទ្ធផលប្រកួតថ្ងៃទី២៨ មិថុនា៖
- អ៊ីតាលី ២-៣ បារាំង (25–19, 20–25, 25–22, 22–25, 11–15)
- ស្លូវេនី ៣-២ អាហ្សង់ទីន (19–25, 25–17, 17–25, 29–27, 15–7)
ក្រុមខ្លាំង ៤ នឹងត្រូវជួបគ្នានៅវគ្គពាក់កណ្ដាលផ្ដាច់ព្រ័ត្រ ការប្រកួតនឹងធ្វើឡើងនៅថ្ងៃទី២៩ មិថុនា ។ សម្រាប់ការប្រកួតយកចំណាត់ថ្នាក់លេខ៣ និងវគ្គផ្ដាច់ព្រ័ត្រដណ្ដើមជើងឯក និងធ្វើឡើងនៅថ្ងៃទី៣០ មិថុនា ២០២៤។
កម្មវិធីប្រកួតវគ្គពាក់កណ្ដាលផ្ដាច់ព្រ័ត្រ ថ្ងៃទី២៩ មិថុនា៖
- ប៉ូឡូញ ប៉ះ បារាំង វេលាម៉ោង ៥:០០នាទីល្ងាច
- ស្លូវេនី ប៉ះ ជប៉ុន វេលាម៉ោង ៨:០០នាទីយប់
ប្រកួតពានរង្វាន់បាល់ទះផ្នែកបុរស 2024 FIVB Volleyball Men’s Nations League ត្រូវបានរៀបចំឡើងដោយសហព័ន្ធកីឡាបាល់ទះអន្តរជាតិ បានចាប់ផ្ដើមដំណើរការពីថ្ងៃទី២១ ឧសភា ដល់ថ្ងៃទី៣០ មិថុនា ២០២៤ ដោយមានក្រុមចូលរួមមកពីតាមទ្វីបនានាចំនួន១៦ក្រុម ធ្វើឡើងនៅប្រទេសប៉ូឡូញ។
ក្រុមទាំង១៦ ដែលចូលរួមប្រកួតប្រជែងនៅក្នុងពានរង្វាន់ FIVB Volleyball Men’s Nations League មានអាហ្សង់ទីន, ប្រេស៊ីល, ប៊ុលហ្គារី, កាណាដា, គុយបា, បារាំង, អាល្លឺម៉ង់, អ៊ីរ៉ង់, អ៊ីតាលី, ជប៉ុន, ហុល្លង់, ប៉ូឡូញ, តួកគី, ស្លូវេនី, ស៊ែប៊ី និង សហរដ្ឋអាមេរិក ដោយត្រូវចាប់គូប្រកួតវិលជុំសន្សំពិន្ទុ ដើម្បីរកអ្នកមានចំណាត់ថ្នាក់ល្អជាងគេ៤ក្រុមឡើងទៅលេងវគ្គពាក់កណ្ដាលផ្ដាច់ព្រ័ត្រ និងបន្តទៅវគ្គផ្ដាច់ព្រ័ត្រ។
ពានរង្វាន់ FIVB Volleyball Men’s Nations League រៀបចំឡើងពីឆ្នាំ២០១៨ មកខណៈឆ្នាំដំបូងធ្វើឡើងនៅទីក្រុង Lille ប្រទេសបារាំង និងឆ្នាំបន្ទាប់ធ្វើឡើងនៅទីក្រុង Chicago សហរដ្ឋអាមេរិក ហើយក្រុមជម្រើសជាតិរុស្ស៊ី ឈ្នះជើងឯកទាំង២លើក ស្របពេលឆ្នាំ២០២០ កន្លងទៅត្រូវបានរំសាយចោលដោយសារស្ថានភាពរីករាលដាលនៃជំងឺកូវីដ-១៩។
លុះដល់ឆ្នាំ ២០២១ ធ្វើនៅទីក្រុង Rimini ប្រទេសអ៊ីតាលី ជើងឯកបានទៅលើក្រុមជម្រើសជាតិប្រេស៊ីល ចំណែកឯឆ្នាំ ២០២២ ធ្វើនៅទីក្រុង Bologna ប្រទេសអ៊ីតាលី ជើងឯកបានទៅលើក្រុមជម្រើសជាតិបារាំង និងចុងក្រោយឆ្នាំ ២០២៣ ធ្វើនៅទីក្រុង Gdańsk ប្រទេសប៉ូឡូញ ជើងឯកបានទៅលើក្រុមជម្រើសជាតិប៉ូឡូញ។ ខណ:ក្រុមបាល់ទះជម្រើសជាតិជប៉ុន ធ្លាប់ទទួលបានចំណាត់ថ្នាក់លេខ៣ (មេដាយសំរិទ្ធ) ម្តងប៉ុណ្ណោះកាលពីឆ្នាំ២០២៣៕
