នៅព្រឹកថ្ងៃពុធ ទី១៤ ខែសីហា ឆ្នាំ២០២៤ ក្លិបបាល់ទាត់ Nongbua Pitchaya FC សមាជិកលីគកំពូលថៃ បានប្រកាសនាំចូលកីឡាករ Marcus Haber ជនជាតិកាណាដា ត្រៀមសម្រាប់ Thai League 1 រដូវកាល ២០២៤-២៥។
ខ្សែប្រយុទ្ធ Marcus Haber ទើបតែចុះកុងត្រាចូលរួមជាមួយក្រុមបាល់ទាត់ Chonburi Football Club សមាជិកលីគទី២ថៃ កាលពីថ្ងៃទី២ ខែកក្កដា ឆ្នាំ២០២៤ កន្លងទៅ។ ស្របតែបញ្ជីឈ្មោះកីឡាករ២៩នាក់ចុងក្រោយ ក្រោមការដឹកនាំរបស់លោក Pipob On-Mo ត្រៀមសម្រាប់ការប្រកួតលីគលំដាប់ទី២ថៃ Thai League 2 រដូវកាល ២០២៤-២៥ បែរជាគ្មានឈ្មោះខ្សែប្រយុទ្ធ Marcus Haber ទៅវិញ។
ដូច្នេះ Marcus Haber គឺជាកីឡាករបរទេសទី៤ ចាកចេញពីលីគកំពូលកម្ពុជា ទៅប្រកបអាជីពនៅលីគកំពូលថៃ៖
- Marcus Haber ចាកចេញពីព្រះខ័នរាជស្វាយរៀង ទៅចូលរួមជាមួយក្រុម Nongbua Pitchaya FC
- Samuel Gbenga Ajayi ចាកចេញពីភ្នំពេញក្រោន ទៅចូលរួមជាមួយក្រុម Bangkok Glass (បច្ចុប្បន្នឈ្មោះ BG Pathum United)
- Justine Uche Prince ចាកចេញពីភ្នំពេញក្រោន ទៅចូលរួមជាមួយក្រុម
- Julius Oiboh ចាកចេញពីណាហ្គាវើលដ៍ ទៅចូលរួមជាមួយក្រុម Air Force United F.C.
- Kenneth Akpueze ចាកចេញពីភ្នំពេញ Empire (បច្ចុប្បន្នភ្នំពេញក្រោន) ទៅចូលរួមជាមួយក្រុម Chonburi។
កាលពីរដូវកាល ២០២៣-២៤ អំឡុងពេលប្រកបអាជីពបាល់ទាត់នៅព្រះខ័នរាជស្វាយរៀង ខ្សែប្រយុទ្ធ Marcus Haber បានជួយឲ្យក្រុមដែលមានមូលដ្ឋាននៅខេត្តស្វាយរៀង ឈ្នះជើងឯកលីគកំពូលកម្ពុជា Cambodian Premier League និង Hun Sen Cup ខណ:រូបគេគឺជាម្ចាស់ស្បែកជើងមាន Top Scorers ក្រោយស៊ុតបញ្ចូលទីបាន ៣១គ្រាប់។
កីឡាករកម្ពស់ ១.៩២ម៉ែត្រ ផ្លាស់មកប្រកបអាជីពនៅលីគកំពូលកម្ពុជា ដំបូងនៅឆ្នាំ ២០២១ ដោយចូលរួមជាមួយវិសាខា ស៊ុតបញ្ចូលទីសរុប១៧គ្រាប់ មុនផ្លាស់ទៅចូលរួមជាព្រះខ័នរាជស្វាយរៀង នៅឆ្នាំ ២០២២ ដល់ឆ្នាំ ២០២៤ ស៊ុតបញ្ចូលទីសរុប ៥៦គ្រាប់ ឈ្នះស្បែកជើងមាសលីគកំពូលកម្ពុជា ២រដូវកាលជាប់គ្នា ត្រូវបានអ្នកគាំទ្រដាក់រហស្សនាមថាស្តេចប្រើក្បាលតែតបញ្ចូលទី (King of Header)៕
