ព្រះខ័នរាជស្វាយរៀង យកឈ្នះភ្នំពេញក្រោន ៦-២ សរុបទាំង២ជើង កកកៅអីវគ្គពាក់កណ្ដាលផ្ដាច់ព្រ័ត្រ នៃពានរង្វាន់លំដាប់ទី៣ ប្រចាំទ្វីបអាស៊ី AFC Challenge League រដូវកាលឆ្នាំ២០២៥-២៦។
ចប់ការប្រកួត លោក Oleg Starynskyi គ្រូបង្វឹកក្រុមភ្នំពេញក្រោន ថ្លែងថា៖ ខ្ញុំមានមោទនភាពខ្លាំងណាស់ចំពោះកូនក្រុមរបស់ខ្ញុំ ទោះលទ្ធផលយ៉ាងណាក៏ដោយ ពួកគេខិតខំ ១០០% សម្រាប់ការប្រកួតថ្ងៃនេះ ព្យាយាមរហូតដល់ចប់ការប្រកួត។
វគ្គទី១យើងធ្វើបានល្អ វគ្គទី២ក៏ដូចគ្នា ប៉ុន្តែយើងខ្វះសំណាង យ៉ាងណាក៏នៅតែសរសើរកូនក្រុមទាំងមូលអំពីឆន្ទះពួកគេ ហើយសង្ឃឹមថាយើងនឹងបន្តធ្វើបានល្អបែបនេះទៀត។
ជាចុងក្រោយលោកជូនពរដល់ព្រះខ័នរាជស្វាយរៀង ពួកគេធ្វើបានល្អសង្ឃឹមថាស្វាយរៀង តំណាងឲ្យកម្ពុជា ឡើងទៅវគ្គបន្តៗទៀត។
លោក McConkey Matthew គ្រូបង្វឹកព្រះខ័នរាជស្វាយរៀង ថា៖ ការប្រកួតនេះពិតជាតានតឹងណាស់ តង់ទី១យើងធ្វើបានល្អ គ្រាន់តែរបូតគ្រាប់ចុងម៉ោងធ្វើឱ្យបារម្ភបន្តិចបន្តួច។ តង់ទី២យើងធ្វើបានល្អខ្លាំងរហូតរកបាន២គ្រាប់ទទួលបានជ័យជម្នះឡើងទៅវគ្គបន្ត។
ផែនការបន្ទាប់នោះគឺត្រូវរង់ចាំអ៊ុតមើលថាក្រុមណា នឹងឡើងមកជួបយើង ទើបយើងគិតតាមក្រោយ យ៉ាងណាមិញយើងនៅសល់ការប្រកួតច្រើនក្នុងដៃ ពានរង្វាន់ច្រើនត្រូវប្រជែង។
សម្រាប់ក្រុមហ្វីលីពីន Manila Digger FC ពួកគេមានបរទេសច្រើន បើសិនជួបគ្នានៅវគ្គពាក់កណ្តាលផ្តាច់ព្រ័ត្រ ច្បាស់ណាស់នឹងតានតឹងខ្លាំងព្រោះយើងធ្លាប់ជួបគ្នារួចហើយនៅវគ្គជម្រុះ។
ព្រះខ័នរាជស្វាយរៀង របស់កម្ពុជា នឹងត្រូវជួបក្រុមមកពីហ្វីលីពីន Manila Digger នៅវគ្គពាក់កណ្ដាលផ្ដាច់ព្រ័ត្រ ពានរង្វាន់លំដាប់ទី៣ ប្រចាំទ្វីបអាស៊ី រដូវកាលឆ្នាំ២០២៥-២៦ ដោយការប្រកួតជើងទី១ នៅទឹកដីកម្ពុជា ថ្ងៃទី៩ មេសា ជើងទី២ នៅទឹកដីហ្វីលីពី ថ្ងៃទី១៦ មេសា ២០២៦។
គួរបញ្ជាក់ថា ការប្រកួតវគ្គ ៨ក្រុមចុងក្រោយ នៃពានរង្វាន់កម្រិតទី៣ ប្រចាំទីបអាស៊ីនេះ គឺបានដំណើរការតែ៤ក្រុមប៉ុណ្ណោះ នៅក្នុងតំបន់អាស៊ីខាងកើត ស្របពេលការប្រកួត៤ក្រុមផ្សេងទៀត នៅតំបន់អាស៊ីខាងលិច គឺពុំទាន់អាចរៀបចំបានឡើយ ក្រោមហេតុផលនៃវិវាទសង្គ្រាមមជ្ឈិមបូព៌ា។
ការប្រកួតវគ្គជម្រុះក្នុងពូលតាមតំបន់ទាំង២ ពានរង្វាន់កម្រិតទី៣ ប្រចាំទ្វីប AFC Challenge League ២០២៥-២៦ ត្រូវបានចាប់ផ្ដើម វគ្គ៨ក្រុមតំបន់ខាងកើតចាប់ផ្ដើមនៅថ្ងៃទី៥ មីនា ស្របពេលតំបន់ខាងលិត ត្រូវបានពន្យាពេល ដោយសារស្ថានភាពភូមិសាស្ត្រ ខណៈវគ្គផ្ដាច់ព្រ័ត្រ នឹងធ្វើឡើងនៅថ្ងៃទី៩ ខែឧសភា ឆ្នាំ២០២៦ ខាងមុខ៕
