ខ្សែប្រយុទ្ធចេញពីក្លិបនៅលីគកំពូលកម្ពុជា ២រូប គឺកីឡាករ Moses Dyer របស់ភ្នំពេញក្រោន ៧គ្រាប់ និង Kwame Peprah របស់ព្រះខ័នរាជស្វាយរៀង ៦គ្រាប់ បានបំបែកកំណត់ត្រាស៊ុតបញ្ចូលទីបានច្រើនជាងគេ ក្នុងចំណោមកីឡាករពីក្លិបកម្ពុជា ធ្លាប់បានបង្ហាញខ្លួន ក្នុងពានរង្វាន់លំដាប់ទី៣ ប្រចាំទ្វីប AFC Challenge League។
គិតចាប់ពីចូលរួមការប្រកួតក្នុងពានរង្វាន់លំដាប់ទី៣ ប្រចាំទ្វីបនេះមក មានកីឡករពីក្លិបនៅកម្ពុជា ស៊ុតបញ្ចូលទីបានត្រឹម៥គ្រាប់ប៉ុណ្ណោះកន្លងមករួមមាន៖
- ឆ្នាំ២០០៩ J. Lappe Lappe របស់ភ្នំពេញក្រោន ស៊ុតបាន ៥គ្រាប់
- ឆ្នាំ២០១១ K. Njoku របស់ភ្នំពេញក្រោន ស៊ុតបាន ៥គ្រាប់
- ឆ្នាំ២០០៥ ហុក សុចិត្រា Hello United (បច្ចុប្បន្នភ្នមពេញក្រោន) ស៊ុតបាន ៤គ្រាប់
- ឆ្នាំ២០១២ ឃឹម បូរី របស់ភ្នំពេញក្រោន ស៊ុតបាន ៤គ្រាប់
- ឆ្នាំ២០១៣ ចាន់ វឌ្ឍនាការ របស់បឹងកេត ស៊ុតបាន ៤គ្រាប់
- ឆ្នាំ២០២៤-២៥ មិន រតន: និង Cristian Rouge របស់ព្រះខ័នរាជស្វាយរៀង ស៊ុតបាន ៤គ្រាប់។
យ៉ាងណាវិញ សម្រាប់ Moses Dyer អស់ការប្រកួតហើយ នៅសល់តែ កីឡាករស្វាយរៀង និង Manila ដែលនឹងត្រូវជួបគ្នានៅវគ្គពាក់កណ្ដាលផ្ដាច់ព្រ័ត្រ ជើងទី១ នៅទឹកដីកម្ពុជា ថ្ងៃទី៩ មេសា ជើងទី២ នៅទឹកដីហ្វីលីពី ថ្ងៃទី១៦ មេសា ២០២៦។
គ្រាប់បាល់ស៊ុតបញ្ចូលទីបច្ចុប្បន្ន៖
- Moses Dyer របស់ភ្នំពេញក្រោន ស៊ុតបាន ៧គ្រាប់
- Kwame Peprah របស់ព្រះខ័នរាជស្វាយរៀង ៦គ្រាប់
- Ousman Gai របស់ Manila Digger ៥គ្រាប់
- Takashi Odawara របស់ព្រះខ័នរាជស្វាយរៀង ៤គ្រាប់
ក្នុងជំនួបសរុបទាំង២ជើង ដែលព្រះខ័នរាជស្វាយរៀង យកឈ្នះភ្នំពេញក្រោន ៦-២ នៃពានរង្វាន់លំដាប់ទី៣ ប្រចាំទ្វីបអាស៊ី AFC Challenge League រដូវកាលឆ្នាំ២០២៥-២៦ មានគ្រាប់កើតឡើងសរុប៨គ្រាប់ ក្រោយបញ្ចប់ក្នុងពហុកីឡដ្ឋានជាតិ នារាត្រីថ្ងៃទី១២ ខែមីនា ឆ្នាំ២០២៦។
ការប្រកួតវគ្គ៨ក្រុមចុងក្រោយ នៃពានរង្វាន់កម្រិតទី៣ ប្រចាំទីបអាស៊ីនេះ គឺបានដំណើរការតែ៤ក្រុមប៉ុណ្ណោះ នៅក្នុងតំបន់អាស៊ីខាងកើត ស្របពេលការប្រកួត៤ក្រុមផ្សេងទៀត នៅតំបន់អាស៊ីខាងលិច គឺពុំទាន់អាចរៀបចំបានឡើយ ក្រោមហេតុផលនៃវិវាទសង្គ្រាមមជ្ឈិមបូព៌ា។
ការប្រកួតវគ្គជម្រុះក្នុងពូលតាមតំបន់ទាំង២ ពានរង្វាន់កម្រិតទី៣ ប្រចាំទ្វីប AFC Challenge League ២០២៥-២៦ ត្រូវបានចាប់ផ្ដើម វគ្គ៨ក្រុមតំបន់ខាងកើតចាប់ផ្ដើមនៅថ្ងៃទី៥ មីនា ស្របពេលតំបន់ខាងលិត ត្រូវបានពន្យាពេល ដោយសារស្ថានភាពភូមិសាស្ត្រ ខណៈវគ្គផ្ដាច់ព្រ័ត្រ នឹងធ្វើឡើងនៅថ្ងៃទី៩ ខែឧសភា ឆ្នាំ២០២៦ ខាងមុខ៕
