ក្រុមបាល់ទះជម្រើសជាតិទាំង៤ មានកម្ពុជា សិង្ហបុរី ម៉ាឡេស៊ី និងឡាវ នឹងត្រូវមានបេសកម្មមួយទៀត គឺត្រូវប្រកួតដណ្តើមប្រាក់រង្វាន់សម្តេចមហាបវធិបតី ហ៊ុន ម៉ាណែត នៅថ្ងៃចន្ទ ទី២ ខែកញ្ញា ឆ្នាំ២០២៤នេះ ដោយប្រើរូបមន្ត ពីចំណាត់ថ្នាក់ក្នុងការប្រកួតក្នុងពានរង្វាន់ SEA V.League Challenge ដែលបានបញ្ជប់កាលពីម្សិលមិញ។
កម្មវិធីប្រកួត ថ្ងៃទី២ កក្កដា ២០២៤ មានដូចខាងក្រោម៖
គូទី១ ម៉ោង៨ព្រឹក ក្រុមលេខ១ កម្ពុជា ប៉ះ ក្រុមលេខ៤ ឡាវ
គូទី២ ម៉ោង១០ព្រឹក ក្រុមលេខ២ ម៉ាឡេស៊ី ប៉ះក្រុមលេខ៣ សិង្ហបុរី
គូទី៤ ម៉ោង៤ល្ងាច ក្រុមចាញ់ ប៉ះ ក្រុមចាញ់ យកចំណាត់ថ្នាក់លេខ៣
គូទី៥ ម៉ោង៦:៣០នាទីល្ងាច ក្រុមឈ្នះ ប៉ះ ក្រុមឈ្នះ យកជើងឯក។
ការប្រកួតដណ្តើមប្រាក់រង្វាន់សម្តេចមហាបវធិបតី ហ៊ុន ម៉ាណែត សម្រាប់ក្រុមដែលជាម្ចាស់ជើងឯក នឹងទទួលបានប្រាក់រង្វាន់ ១០០លានរៀល លេខ២ នឹងទទួលបាន ៣០លានរៀល លេខ៣ ទទួលបាន ២០លានរៀល
និងលេខ៤ ទទួលបាន ១០លានរៀល។
ដោយឡែកក្រុមបាល់ទះបុរសជម្រើសជាតិកម្ពុជា បានដណ្តើមកៅអីឡើងទៅលេងក្នុងពានរង្វាន់បាល់ទះប្រចាំតំបន់អាស៊ាន ផ្នែកបុរស SEA V.League ឆ្នាំ២០២៥ ខាងមុខ ក្រោយឈរកំពូលតារាងនៅក្នុងពានរង្វាន់ SEA V.League Challenge ក្នុងនាមជាម្ចាស់ផ្ទះ ដែលបានបញ្ចប់នៅរាត្រីថ្ងៃអាទិត្យ ទី១ ខែកញ្ញា ឆ្នាំ២០២៤ លើទីលានវិមានពហុកីឡដ្ឋានជាតិ ក្នុងរាជធានីភ្នំពេញ។
ដូច្នេះក្រុមជម្រើសជាតិកម្ពុជា នឹងត្រូវឡើងទៅប្រកួតពានរង្វាន់ SEA V.League ឆ្នាំ២០២៥ ជាមួយក្រុមថៃ ឥណ្ឌូណេស៊ី និងហ្វីលីពីន ដែលកំពុងរង់ចាំ ខណៈក្រុមវៀតណាម មានការសម្រេចជាបឋមថានឹងធ្លាក់មកលេងក្នុងពានរង្វាន់ SEA V.League Challenge ឆ្នាំ ២០២៥ ជាមួយម៉ាឡេស៊ី សិង្ហបុរី ឡាវ និងមីយ៉ាន់ម៉ា៕
