បញ្ចប់ភារកិច្ចនៅក្នុងព្រឹត្តិការណ៍ប្រកួតកីឡាអេឡិចត្រូនិកជើងឯកពិភពលោក (World Esports Championship) ឬ IESF WEC 2024 លើកទី១៦ សម្រាប់វិញ្ញាសារ MLBB ផ្នែកនារី នៅរាជធានី រីយ៉ាត ព្រះរាជាណាចក្រអារ៉ាប៊ីសាអ៊ូឌីត ឃើញថាក្រុមនារី E-Sports កម្ពុជា ឈ្នះមេដាយប្រាក់ជាលើកដំបូង។
ក្នុងនោះក្រុម CFU Serendipity ដែលតំណាងក្រុមជម្រើសជាតិកម្ពុជា Angkor warrior ទទួលបានចំណាត់ថ្នាក់ជើងឯករង ក្រោយឆ្លងកាត់ការប្រកួតមានច្រើនដំណាក់កាលក្នុងនោះការប្រកួតជម្រុះតាមអនឡាញដើម្បីជ្រើសរើសយកចំនួន១២ប្រទេសចុងក្រោយទៅប្រកួតនៅប្រទេសអារ៉ាប៊ីសាអ៊ូឌីត។
ការប្រកួតជុំចុងក្រោយ នៅប្រទេសអារ៉ាប៊ីសាអ៊ូឌីត ក្រុមនារីកម្ពុជា ស្ថិតនៅពូល B ជាអ៊ុយក្រែន នេប៉ាល់ អាហ្សង់ទីន ម៉ុងហ្គោលី និងកូឡុំប៊ី ខណៈពូល A មានឥណ្ឌូណេស៊ី អេហ្ស៊ីប អារ៉ាប៊ីសាអ៊ូឌីត អ៊ូបេគីស្ថាន ហ្គាតេម៉ាឡា និងអារ៉ាប់រួម។
ការប្រកួតវគ្គសន្សំពិន្ទុក្នុងពូល ក្រុមនារីកម្ពុជា បានលេខ២ បានឡើងទៅកាន់វគ្គខ្វែង បន្ទាប់ពីឈ្នះនេប៉ាល់ អាហ្សង់ទីន ម៉ុងហ្គោលី និងកូឡុំប៊ី ប៉ុន្តែបានចាញ់ អ៊ុយក្រែន៖
ឆ្លងកាត់ការប្រកួតជាច្រើននៅវគ្គ Play Off ទីបំផុតក្រុមនារីកម្ពុជា បានឈានដល់វគ្គផ្តាច់ព្រ័ត្រ ដោយបានចាញ់ ឥណ្ឌូណេស៊ី ដោយលទ្ធផល ២-០ ទទួលបានត្រឹមជើងឯករងអមដោយប្រាក់រង្វាន់ ២៥០០០ដុល្លារអាមេរិក។ ក្រុមនារីកម្ពុជានៅតែមិនអាចយកឈ្នះឥណ្ឌូណេស៊ីបាន សម្រាប់ការជួបគ្នា៤លើកក្នុងព្រឹត្តិការណ៍នេះគឺ២លើកនៅជុំចុងក្រោយ និង២លើកក្នុងវគ្គជម្រុះប្រចាំតំបន់អាស៊ាន។
ខាងក្រោមនេះ គឺជាចំណាត់ថ្នាក់ជ័យលាភីក្រុមទាំង១៦៖
- លេខ១ មេដាយមាស ៖ ឥណ្ឌូណេស៊ី ទទួលបាន ៥០០០០ដុល្លារ
- លេខ២ មេដាយប្រាក់ ៖ កម្ពុជា ទទួលបាន ២៥០០០ដុល្លារ
- លេខ៣ មេដាយសំរិទ្ធ ៖ អេហ្ស៊ីប ទទួលបាន ១៥០០០ដុល្លារ
- លេខ៤៖ អ៊ុយក្រែន ទទួលបាន ១០០០០ដុល្លារ
- លេខ៥៖ នេប៉ាល់ ទទួលបាន ៧៥០០ដុល្លារ
- លេខ៦៖ អារ៉ាប៊ីសាអ៊ូឌីត ៧៥០០ដុល្លារ
- លេខ៧៖ អ៊ូបេគីស្ថាន ទទួលបាន ២៥០០ដុល្លារ
- លេខ៨៖ អាហ្សង់ទីន ទទួលបាន ២៥០០ដុល្លារ
- លេខ៩៖ ហ្គាតេម៉ាឡា
- លេខ១០៖ ម៉ុងហ្គោលី
- លេខ១១៖ អារ៉ាប់រួម
- លេខ១២៖ កូឡុំប៊ី
និយាយដោយឡែកសម្រាប់ក្រុម CFU Serendipity ដែលតំណាងក្រុមជម្រើសជាតិកម្ពុជា Angkor warrior ក្រោមការដឹកនាំដោយលោក T1m3go ជនជាតិចិន ក៏ធ្លាប់មានប្រវត្តមិនធម្មតាឡើយ ដោយធ្លាប់ឈ្នះ ជើងឯក Queen Arena Series និងបង្ហាញខ្លួនលើឆាកអន្តរជាតិជាបន្តបន្ទាប់។
ក្រុមកីឡាការិនីមកពីក្រុម CFU Serendipity (MLBB) នឹងត្រូវតំណាងក្រុមជម្រើសជាតិ (ANGKOR WARRIORS) នឹងទៅចូលរួមប្រកួត ASIAN ESPORTS GAMES 2024 ដែលសហព័ន្ធនឹងបញ្ជូនកីឡា២វិញ្ញាសាគឺ MLBB FEMALE និង eFootball Mobile នៅប្រទេសថៃពី ថ្ងៃទី២៣ ដល់ថ្ងៃទី៣០ ខែវិច្ឆិកា ឆ្នាំ២០២៤ តែវិញ្ញាសា eFootball Mobile ប្រកួតដល់ថ្ងៃទី២ ខែធ្នូ ឆ្នាំ២០២៤។
សូមបញ្ជាក់ថា សហព័ន្ធកីឡាអេឡិចត្រូនិកកម្ពុជា បានបញ្ជូនក្រុមកីឡាការិនីអ្នកចម្បាំងអង្គរកម្ពុជា ចូលរួមប្រកួតព្រឹត្តិការណ៍ជើងឯកពិភពលោកលើកទី១៦ (IESF – International Esports Federation 16th World Esports Championship 2024) វិញ្ញាសា Mobile Legends: Bang Bang ប្រាក់រង្វាន់ ក្រុមជើងឯកទទួលបាន ៥ម៉ឺនដុល្លារ ក្រុមលេខ២ទទួលបាន ២.៥ម៉ឺនដុល្លារ និងក្រុមលេខ៣ទទួលបាន ១.៥ម៉ឺនដុល្លារ ខណៈក្រុមចំណាត់ថ្នាក់លេខ៤ដល់លេខ១៦ក៏ទទួលបានប្រាក់រង្វាន់ដែរ៕
