ភ្នំពេញ៖ រដ្ឋបាលរាជធានីភ្នំពេញ ក្រោមការដឹកនាំរបស់លោក ឃួង ស្រេង កំពុងបោះជំហានយ៉ាងសកម្មក្នុងការតុបតែងលម្អរមណីយដ្ឋានប្រវត្តិសាស្ត្រដ៏ល្បី “វត្តភ្នំ” ដើម្បីត្រៀមអបអរសាទរកម្មវិធីសង្ក្រាន្ត ទទួលស្វាគមន៍ការយាងមកដល់នៃទេវតាឆ្នាំថ្មី គឺ ព្រះនាង គោរាគទេវី។
ការតុបតែងនេះមិនត្រឹមតែបង្កើនភាពស្រស់ស្អាតប៉ុណ្ណោះទេ ថែមទាំងបន្ថែមភាពអស្ចារ្យប្លែកភ្នែក ជាមួយនឹងការតុបតែងរចនាបន្ថែមភ្លើងភ្លឺចែងចាំង ចំណែកក្លោងទ្វារចូលក៏ថ្នៃជារចនាបទខ្មែរយ៉ាងល្អប្រណិត បង្កើតបានជាផ្ទាំងទស្សនីយភាពគួរឱ្យចាប់អារម្មណ៍ ធ្វើឱ្យអ្នកដែលបានជីះកាត់ លួចកត់ចំណាំក្នុងចិត្តថា ឆ្នាំនេះមិនអាចរំលងសង្ក្រាន្តវត្តភ្នំបានឡើយ។
ព្រឹត្តិការណ៍នេះនឹងក្លាយជាកម្មវិធីដ៏រំភើបមួយ ដោយរដ្ឋបាលរាជធានីបានរៀបចំកម្មវិធីកម្សាន្តជាច្រើនបែបដើម្បីបង្កបរិយាកាសរីករាយសម្រាប់អ្នកចូលរួម ក្នុងនោះមានការល្បែងប្រជាប្រិយដូចជា ទាញព្រ័ត្រ បោះអង្គញ់ វាយក្អម ចោលឈូង លាក់កន្សែង និងដណ្តើមស្លឹកឈើ ដែលនឹងនាំមកនូវភាពស្និទ្ធស្នាលនិងសំណើចដល់មនុស្សគ្រប់វ័យ។
មិនតែកម្មវិធីរីករាយសប្បាយប៉ុណ្ណោះទេ ប៉ុន្តែកម្មវិធីវប្បធម៌ប្រពៃណីក៏ត្រូវបានរៀបចំយ៉ាងអធិកអធមផងដែរ ដូចជា ពិធីគោរពទីទួលដូនពេញ ពូនភ្នំខ្សាច់ ការតាំងបង្ហាញគំនូរសិល្បៈដ៏ប្រណិត ការប្រគុំតន្ត្រីបុរាណបញ្ចូលគ្នាជាមួយសម័យ និងការរាំកម្សាន្តដែលនឹងញ៉ាំងឱ្យបរិយាកាសកាន់តែសប្បាយខ្ញៀវខ្ញារនិងគគ្រឹកគគ្រេង៕
សូមជំរាបជូនថា វត្តភ្នំ ជារមណីយដ្ឋានវប្បធម៌ប្រវត្តិសាស្ត្រដ៏សំខាន់ ហើយក៏ជាចំណុចកណ្តាលនៃការបង្កើតបរិយាកាសសប្បាយរីករាយសម្រាប់ពលរដ្ឋដែលរស់នៅទីក្រុងភ្នំពេញ បានមកជួបជុំគ្នាផងដែរ។ ឆ្នាំ២០២៥ នេះ សង្ក្រាន្តវត្តភ្នំ នឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែមេសា ខាងមុខនេះ៕
អត្ថបទ៖ ត្រយងតូច
