ក្រុមបាល់ទះវិសាខា របស់កម្ពុជា បានយកឈ្នះលើក្រុមនគរបាក្រុងហូជីមិញ ក្នុងការប្រកួតបាល់ទះមិត្តភាពអន្តរជាតិ ដើម្បីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀន ដោយក្នុងប្រកួតនោះវិសាខា បានយកឈ្នះដោយលទ្ធផល ៣-១ កាលពីរាត្រីថ្ងៃទី២២ ខែមិថុនា នៅសាលវិមានពហុកីឡដ្ឋានជាតិ រាជធានីភ្នំពេញ។
ក្នុងជំនួបមិត្តភាពអន្តរជាតិនេះដែរ កីឡាករ វឿន វាសនា ដែលប្រកបអាជីបនៅក្លិបបាល់ទះ Win Streak សមាជិកលីគបាល់ទះតៃវ៉ាន់ ហើយបានត្រលបមកចូលរួម និងជួយក្រុមបាល់ទះវិសាខា យកឈ្នះក្រុមនគរបាលក្រុងហូជីមិញ ដោយកាលពីសិតទី (២២ ២៥, ២៥-១៥, ២៥-១៨, ២៥-២១) ។
សម្រាប់សមាជិករបស់ក្រុមបាល់ទះវិសាខា ភាគច្រើនគឺសុតតែជាកីឡាករដែលមានភាគរយខ្ពស់ក្នុងការបង្ហាញខ្លួនឱ្យក្រុមបាល់ទះជម្រើសជាតិកម្ពុជា ប្រកួតពានរង្វាន់ SEA V.League ឆ្នាំ២០២៥
ក្រោយចប់ការប្រកួតមិត្តភាពអន្តរជាតិខាងលើ ក្រុមបាល់ទះបុរសជម្រើសជាតិកម្ពុជា ក៏ត្រៀមខ្លួនដើម្បីចេញទៅចូលរួមពានរង្វាន់បាល់ទះប្រចាំតំបន់អាស៊ាន ផ្នែកបុរស SEA V.League ឆ្នាំ២០២៥ ក្រោយឈរកំពូលតារាងនៅក្នុងពានរង្វាន់ SEA V.League Challenge ក្នុងនាមជាម្ចាស់ផ្ទះ ការប្រកួតជម្រុះកាលពីខែកញ្ញា ឆ្នាំ២០២៤ កន្លងទៅ។
ដូច្នេះក្រុមបាល់ទះជម្រើសជាតិកម្ពុជា នឹងត្រូវឡើងទៅប្រកួតពានរង្វាន់ SEA V.League ឆ្នាំ២០២៥ ជាមួយក្រុមថៃ ឥណ្ឌូណេស៊ី និងហ្វីលីពីន ដែលកំពុងរង់ចាំ ខណៈក្រុមវៀតណាម មានការសម្រេចជាបឋមថានឹងធ្លាក់មកលេងក្នុងពានរង្វាន់ SEA V.League Challenge ឆ្នាំ ២០២៥ ជាមួយម៉ាឡេស៊ី សិង្ហបុរី ឡាវ និងមីយ៉ាន់ម៉ា។
សម្រាប់កម្មវិធីប្រកួតទាំង ២ជើងរួមមាន៖
ជើងទី១៖ ប្រកួតចាប់ពីថ្ងៃទី១១ ដល់ ១៣ ខែកក្កដា ឆ្នាំ២០២៥ នៅប្រទេសហ្វីលីពីន
ជើងទី២៖ ប្រកួតចាប់ពីថ្ងៃទី១៨ ដល់ ២០ ខែកក្កដា ឆ្នាំ២០២៥ នៅប្រទេសឥណ្ឌូនេស៊ី
គួរបញ្ជាក់ថា ក្រុមបាល់ទះជម្រើសជាតិឥណ្ឌូនេស៊ី និងថៃ ធ្លាប់ឈ្នះបាន ២លើកដូចគ្នា ដោយនៅឆ្នាំ២០២៣ ឥណ្ឌូនេស៊ី ឈ្នះជើងឯកទាំង២ជើង ខណ:ជើងឯករង ជើងទី១ ថៃជើងទី២ វៀតណាម ដោយឡែកនៅឆ្នាំ២០២៤ ថៃ ឈ្នះជើងឯកទាំង២ជើង ខណ:ឥណ្ឌូនេស៊ី ជើងឯករងទាំង២ជើង៕
