ថៃ (ស្រះកែវ) – អាជីវករជនជាតិថៃ ដែលជាអ្នកលក់ដូរទំនិញនៅផ្សាររោងក្លឿ ខេត្តស្រះកែវ បាននាំគ្នា ប្រមូលផ្ដុំគ្នា អំពាវនាវដល់លោកស្រីនាយករដ្ឋមន្ត្រី ផែថងថាន ឱ្យពិចារណាបើកច្រកព្រំដែនកម្ពុជា-ថៃ ឡើងវិញឱ្យបានឆាប់បំផុត។
ក្រុមអាជីវករបានប្រាប់ទៅកាន់អ្នកសារព័ត៌មានថៃថា ពួកគេកំពុងជួបការលំបាក ដោយសារតែស្ថានភាពការរីករាលដាលនៃជំងឺកូវីដ-១៩ និងការបិទច្រកព្រំដែន បានជះឥទ្ធិពលយ៉ាងខ្លាំង ដល់ជីវភាពរស់នៅប្រចាំថ្ងៃ របស់ពួកគេ។
អ្នកលក់ជាច្រើនបាននិយាយស្របគ្នាថា ការបិទច្រកព្រំដែនបានធ្វើឱ្យសកម្មភាពសេដ្ឋកិច្ចក្នុងតំបន់ជាប់គាំង ហាងនានាត្រូវបិទទ្វារ ហើយមនុស្សជាច្រើន ត្រូវទទួលរ៉ាប់រ៉ងបំណុល។ តំណាងអាជីវករបានឆ្លុះបញ្ចាំងពីការលំបាកខ្លួនប្រាប់ទៅកាន់អ្នកសារព័ត៌មានថៃថា “ពួកខ្ញុំលំបាកណាស់ បច្ចុប្បន្ន គ្មានចំណូលទាល់តែសោះ ចង់ឱ្យនាយករដ្ឋមន្ត្រីអាណិតពួកខ្ញុំផង”។
គួរដឹងថា ផ្សាររោងក្លឿ ដែលជាមជ្ឈមណ្ឌលពាណិជ្ជកម្មព្រំដែនដ៏សំខាន់រវាងកម្ពុជា និងថៃ ធ្លាប់មានភាពអ៊ូអរដោយសារភ្ញៀវទេសចរជាតិ អន្តរជាតិ នាំគ្នាមកជាវទំនិញ ពីអាជីវករប្រទេសទាំងពីរ (កម្ពុជា-ថៃ) ប៉ុន្តែបច្ចុប្បន្ន ផ្សារ គឺស្ងាត់ជ្រងំ។
អ្នកលក់ជាច្រើនមិនអាចទ្រាំទ្រនឹងបន្ទុកចំណាយ និងបំណុលបានបន្តទៀតនោះឡើយ ដូច្នេះពួកគេត្រូវបិទអាជីវកម្ម និងបណ្តេញបុគ្គលិកចេញ ដែលប៉ះពាល់យ៉ាងទូលំទូលាយដល់សេដ្ឋកិច្ចក្នុងខេត្តស្រះកែវទាំងមូល។
ក្រុមអាជីវករដែលរងផលប៉ះពាលដោយផ្ទាល់បានទទូចដល់រដ្ឋាភិបាលថៃ ហើយសង្ឃឹមថា រដ្ឋាភិបាល នឹងពិចារណារកវិធីបើកច្រកព្រំដែនប្រកបដោយសុវត្ថិភាពឡើងវិញ ដើម្បីឱ្យពួកគេអាចត្រឡប់មករកស៊ី និងស្តារសេដ្ឋកិច្ចក្នុងតំបន់ឱ្យបានឆាប់រហ័ស៕
