កម្លាំងនគរបាលព្រំដែនលេខ ១០៥ នៅតំបន់មុំបី ដែលជាតំបន់មានភាពស្ថិតនៅចំណុចខ្ពស់ក្នុងជម្លោះព្រំដែនរវាងកម្ពុជា និងថៃ បានបង្ហាញការប្ដេជ្ញាចិត្តខ្ពស់ក្នុងការការពារថែរក្សាបូរណភាពទឹកដី ដោយបញ្ជាក់ថា នឹងមិនឲ្យបាត់បង់ដីសូម្បីតែ ១មីលីម៉ែត្រឡើយ។
វរៈសេនីយ៍ត្រី សំបូរ មុន្នីសី មេបញ្ជាការវរសេនាតូចគរបាលការពារព្រំដែនគោកលេខ១០៥ ប្រចាំនៅតំបន់មុំបី បានលើកឡើងថា ថ្វីបើស្ថានភាពនៅព្រំដែនហាក់ថយកម្ដៅ បន្ទាប់ពីការប៉ះទង្គិចគ្នារវាងកងទ័ពកម្ពុជានិងថៃ កាលពីថ្ងៃទី២៨ ឧសភា ឆ្នាំ២០២៥មកក្ដី ក៏នគរបាលព្រំដែនគោក និងកម្លាំងយោធាបានសហការគ្នាយ៉ាងស្អិតរមួត ដើម្បីការពារបូរណភាពទឹកដី ក្នុងស្មារតីប្រុងប្រយ័ត្នជាប់ជានិច្ច។
វរៈសេនីយ៍ត្រី សំបូរ មុន្នីសី បញ្ជាក់ថា កងកម្លាំងនគរបាលការពារព្រំដែនគោកលេខ១០៥ ដែលកំពុងឈរជើងនៅតំបន់មុំបី បានប្ដេជ្ញាចិត្តខ្ពស់នៅក្នុងការការពារទឹកដី ការពារប្រជាជន មិនឲ្យជនឈ្លានពានណាមួយបំពានឬរំលោភមកលើទឹកដីកម្ពុជាជាដាច់ខាត។
ចាប់តាំងពីការប៉ះទង្គិចគ្នារវាងកងទ័ពកម្ពុជានិងកងទ័ពថៃ កាលពីចុងខែឧសភាមកនោះ មកដល់ពេលនេះកម្លាំងនគរបាលការពារព្រំដែនគោកលេខ១០៥បានត្រៀមយុទ្ធសាស្រ្តគ្រប់គ្រាន់និងការត្រៀមស្បៀងគ្រប់គ្រាន់ដើម្បីជួយគាំទ្រដល់កម្លាំងជួរមុខ។ ដូច្នេះសូមបងប្អូនប្រជាពលរដ្ឋខ្មែរទាំងអស់កុំមានការព្រួយបារម្ភ គឺកម្លាំងនគរបាល និងយោធា បានសហការគ្នាយ៉ាងល្អ នៅក្នុងការការពារបូរណភាពទឹកដី។
ជម្លោះព្រំដែនកម្ពុជានិងថៃ ញាំងឲ្យប្រជាជនចូលរួមជាស្មារតីគាំទ្រទាំងកម្លាំងចិត្ត និងស្បៀងអាហារផ្សេងៗជាហូរហែ ម៉្លោះហើយ លោកវរសេនីយ៍ត្រី សំបូរ មុន្នីសី បានថ្លែងអំណរគុណដល់សម្បុរសជននិងស្នើឲ្យប្រជាជនទាំងអស់បន្ដការគាំទ្រទាំងស្មារតី និងស្បៀងអាហារបន្ដទៀតដើម្បីជាកម្លាំងចិត្តកាន់តែខ្លាំងសម្រាប់កងកម្លាំង ហើយក៏ជាផ្នែកមួយនៃការបញ្ជាក់ឲ្យពិភពលោកឃើញថាកម្ពុជាមានការសាមគ្គីភាពរួមជាថ្លុងមួយ នៅក្នុងចំណែកនៃការការពារទឹកដីរបស់ខ្លួន។
មុំបីជាចំណុចចាប់ផ្ដើមនៃការបង្កើតភាពតានតឹងព្រំដែន បន្ទាប់ពីកងទ័ពថៃបានលបបាញ់លើកងទ័ពកម្ពុជា បណ្ដាលឲ្យយោធាម្នាក់ស្លាប់កាលពីថ្ងៃទី២៨ ខែឧសភា ឆ្នាំ២០២៥។ ចាប់តាំងពីពេលនោះមកស្ថានភាពព្រំដែនបានឡើងកម្ដៅដោយកងទ័ពកម្ពុជានិងថៃបានបង្កើនកម្លាំងទ័ពទាំងសងខាងនៅតាមបណ្ដោយព្រំដែននៃប្រទេសទាំងពីរ។ ជម្លោះព្រំដែននេះ ភាគីកម្ពុជាបានសម្រេចចិត្តយកសំណុំរឿងមុំបី ប្រាសាទតាមាន់តូច ប្រាសាទតាមាន់ធំ និងប្រាសាទតាក្របី ទៅប្ដឹងនៅតុលាការយុត្តិធម៌អន្ដរជាតិ ICJ៕