កម្ពុជាប្រាប់អគ្គលេខាធិការអង្គការសហប្រជាជាតិថា កម្ពុជារក្សាជំហរផ្ដោតលើការអនុវត្តសន្ដិវិធីដើម្បីបន្ថយភាពតានតឹង នៅក្នុងជម្លោះព្រំដែនកម្ពុជានិងថៃ។
ការលើកឡើងនេះធ្វើឡើងបន្ទាប់ពី ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ បានអញ្ជើញជួបពិសេសជាមួយ ឯកឧត្តម António Guterres អគ្គលេខាធិការអង្គការសហប្រជាជាតិ នៅអំឡុងវេទិកាកិច្ចពិភាក្សាទូទៅនៃមហាសន្និបាតអង្គការសហប្រជាជាតិលើកទី៨០ នៅទីក្រុងញូវយ៉ក កាលពីថ្ងៃទី២៦ ខែកញ្ញា ឆ្នាំ២០២៥។
សូមចុចអាន៖ សម្តេចធិបតី ហ៊ុន ម៉ាណែត បដិសេធការអះអាងរបស់ថៃលើបញ្ហាព្រំដែន និងអំពាវនាវឱ្យដោះស្រាយដោយសន្តិវិធី
ក្នុងឱកាសនោះ ឯកឧត្តមរដ្ឋមន្ត្រីបានរាយការណ៍ជូនអគ្គលេខាធិការអង្គការសហប្រជាជាតិអំពីស្ថានភាពនៃជម្លោះព្រំដែនកម្ពុជា–ថៃ ដោយលើកឡើងជាថ្មីនូវ ជំហររបស់កម្ពុជា ដែលផ្តោតលើការខិតខំអនុវត្តដោយសន្តិវិធី ដើម្បីបន្ថយភាពតានតឹង កសាងទំនុកចិត្តឡើងវិញ និងគោរពតាមកិច្ចព្រមព្រៀងនានាដែលមានស្រាប់។
ឯកឧត្តមបានបញ្ជាក់ថា កម្ពុជាចង់ឃើញប្រក្រតីភាព និងសន្តិភាពមានស្ថិរភាពក្នុងទំនាក់ទំនងទ្វេភាគី ជាមួយប្រទេសថៃ ដើម្បីអភិវឌ្ឍន៍ទាំងសង្គម និងសេដ្ឋកិច្ចរួមគ្នា។