ខេត្តត្បូងឃ្មុំ៖ ឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ បានណែនាំដល់អាជ្ញាធរស្រុកទាំងអស់ ឱ្យបន្តដោះស្រាយបញ្ហាប្រឈម និងធានា សុខុមាលភាព ក៏ដូចជា ជីវភាពរស់នៅប្រចាំថ្ងៃ របស់បងប្អូនពលករដែលបានវិលត្រឡប់មកពីប្រទេសថៃ។
ការណែនាំនេះបានធ្វើឡើងនាព្រឹកថ្ងៃអង្គារ ទី៧ ខែតុលា ឆ្នាំ២០២៥ ក្នុងឱកាសដែលឯកឧត្តមអញ្ជើញជួបសំណេះសំណាល និងនាំយកអំណោយមនុស្សធម៌ទៅចែកជូនពលករខ្មែរចំនួន ៦៦៩នាក់ នៅស្រុកមេមត់ ខេត្តត្បូងឃ្មុំ។
ការយកចិត្តទុកដាក់ពីរាជរដ្ឋាភិបាល និងវិធានការដោះស្រាយ
ថ្លែងក្នុងពិធីនោះ ឯកឧត្តម ប៉ែន កុសល្យ បានគូសបញ្ជាក់អំពីការយកចិត្តទុកដាក់ខ្ពស់ពីសំណាក់ សម្តេចតេជោ ហ៊ុន សែន ប្រធានព្រឹទ្ធសភា និង សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ចំពោះសុខទុក្ខរបស់ពលករដែលបានត្រឡប់មកស្រុកកំណើតវិញ។
ឯកឧត្តមអភិបាលខេត្តបានណែនាំអាជ្ញាធរខេត្ត និងមន្ទីរជំនាញត្រូវអនុវត្តការងារដូចខាងក្រោម៖
- អាជ្ញាធរស្រុក: ត្រូវយកចិត្តទុកដាក់ខ្ពស់ និងដោះស្រាយរាល់បញ្ហាប្រឈម ក៏ដូចជាធានាសុខុមាលភាព និងជីវភាពរស់នៅរបស់ពលករទាំងអស់ដោយមិនប្រកាន់និន្នាការនយោបាយ។
- មន្ទីរការងារ និងបណ្តុះបណ្តាលវិជ្ជាជីវៈខេត្ត: ត្រូវគិតគូរ និងស្វែងរក ឱកាសការងារ ជូនដល់បងប្អូនពលករដែលមានបំណងចង់ធ្វើការងារនៅក្នុងស្រុកកំណើតរបស់ពួកគេវិញ។
ពលករបង្ហាញបំណងចង់រស់នៅស្រុកកំណើតវិញ
ឯកឧត្តមអភិបាលខេត្តបានបន្ថែមថា ដោយសារទទួលបានការយកចិត្តទុកដាក់ និងការជួយសម្របសម្រួលយ៉ាងកក់ក្តៅពីសំណាក់អាជ្ញាធរគ្រប់លំដាប់ថ្នាក់នៃខេត្តត្បូងឃ្មុំ បងប្អូនប្រជាពលករបានសម្តែងការសប្បាយរីករាយ និងបង្ហាញ បំណងក្នុងការបន្តរស់នៅស្រុកកំណើតរបស់ខ្លួន វិញ ដោយយល់ថាការរស់នៅនេះអាចប្រសើរជាងការចំណាកស្រុកទៅប្រទេសដទៃ។
គួរបញ្ជាក់ថា បងប្អូនពលករដែលធ្លាប់បម្រើការងារនៅប្រទេសថៃបាននាំគ្នាធ្វើដំណើរត្រឡប់មកស្រុកកំណើតវិញជាបន្តបន្ទាប់ បន្ទាប់ពីមានបញ្ហាព្រំដែនរវាងភាគីថៃ និងកម្ពុជា។
ក្នុងឱកាសនោះដែរ ពលករចំនួន ៦៦៩នាក់ សុទ្ធតែបានទទួលអំណោយមនុស្សធម៌ពីឯកឧត្តមអភិបាលខេត្ត ដែលក្នុងម្នាក់ៗទទួលបាន អង្ករ ២៥គីឡូក្រាម មី ១កេស ទឹកត្រី ១យួរ ទឹកស៊ីអ៊ីវ ១យួរ ត្រីខ ១យួរ ទឹកបរិសុទ្ធ ១យួរ និងថវិកាមួយចំនួនផងដែរ៕
