ប៉ារីស៖ នាយករដ្ឋមន្រ្តីបារាំងលោក សេបាស្ទៀន លឺកូនុយ (Sebastien Lecornu) ដែលបានលាលែងពីតំណែងក្នុងរយៈពេលតិចជាង ១ខែ កាលពីថ្ងៃចន្ទ សប្ដាហ៍នេះ និយាយកាលពីយប់ថ្ងៃពុធ ថា លោកប្រធានាធិបតី អ៊ែមម៉ានុយអ៊ែល ម៉ាក្រុង (Emmanuel Macron) ត្រូវបានគេរំពឹងថា នឹងតែងតាំងនាយករដ្ឋមន្ត្រីថ្មីក្នុងរយៈពេល ៤៨ម៉ោងខាងមុខ។ នេះបើយោងតាមការចេញផ្សាយដោយសារព័ត៌មាន Xinhua នាថ្ងៃទី៩ ខែតុលា ឆ្នាំ២០២៥។
លោក Lecornu បានប្រាប់ប៉ុស្តិ៍ទូរទស្សន៍ France 2 ថា «ខ្ញុំមានអារម្មណ៍ថាផ្លូវឆ្ពោះទៅមុខគឺអាចធ្វើទៅបាន» ដោយបន្ថែមថា «បច្ចុប្បន្នលោក Macron បានស្នើឱ្យលោកបន្តកាន់តំណែងរយៈពេលខ្លីសិន ដើម្បីជួបពិភាក្សាបន្ទាន់ជាមួយគណបក្សនយោបាយនានា»។
ចំពេលមានការផ្លាស់ប្ដូរនាយករដ្ឋមន្រ្តីបារាំងថ្មី គណបក្សប្រឆាំងទាមទារឱ្យលោក Macron ឆាប់បោះឆ្នោតឡើងវិញមុនកំណត់ ដើម្បីបញ្ចប់ភាពជាប់គាំងនយោបាយ ប៉ុន្ដែអតីតនាយករដ្ឋមន្រ្តីបារាំងលោក Lecornu បាននិយាយថា «វាមិនមែនជាពេលវេលា ដើម្បីផ្លាស់ប្តូរប្រធានាធិបតីនៅពេលនេះនោះទេ»។ លោកបានបន្ថែមថា «លោក Macron នឹងថ្លែងទៅកាន់ប្រជាជាតិបារាំងក្នុងពេលកំណត់ច្បាស់លាស់ណាមួយ»។
យ៉ាងណាម៉ិញ អតីតនាយករដ្ឋមន្រ្តីបារាំងរូបនេះ ក៏បានដោះស្រាយបញ្ហាគោលនយោបាយសំខាន់ៗមួយចំនួនផងដែរ ដោយនិយាយថា «ការធ្វើកំណែទម្រង់ប្រាក់សោធននិវត្តន៍គួរតែត្រូវបានជជែកវែកញែកបន្ដទៀត»។ លោកបានព្រមានថា «ប្រសិនបើមិនបន្ដការពិភាក្សាលើកំណែទម្រង់កញ្ចប់ថវិកាជាតិនោះ នឹងបារាំងត្រូវចំណាយប្រាស់យ៉ាងហោចណាស់ ៣ពាន់លានអឺរ៉ូ (ស្មើនឹង ៣,៥ពាន់លានដុល្លារ) ក្នុងឆ្នាំ២០២៧»។
ដោយឡែក បើនិយាយអំពីសេចក្តីព្រាងថវិកាសម្រាប់ឆ្នាំ២០២៦ លោក Lecornu បាននិយាយថា វាអាចត្រូវបានបង្ហាញទៅគណៈរដ្ឋមន្ត្រីនៅថ្ងៃចន្ទ សប្ដាហ៍ក្រោយ ដោយជំរុញឱ្យសមាជិកសភាពិភាក្សាគ្នាយ៉ាងហ្មត់ចត់ ជាជាងការបដិសេធភ្លាមៗ។
ប្រទេសបារាំងបានជាប់គាំងក្នុងវិបត្តិនយោបាយ ចាប់តាំងពីការបោះឆ្នោតកាលពីខែកក្កដា ឆ្នាំ២០២៤ នៅពេលដែលគ្មានគណបក្សណាមួយទទួលបានសំឡេងភាគច្រើនច្បាស់លាស់ ដែលបញ្ហានេះបានធ្វើឱ្យមានការលំបាកក្នុងការអនុម័តច្បាប់ និងកញ្ចប់ថវិកាជាតិ។
សូមជម្រាបថា លោក Lecornu គឺជានាយករដ្ឋមន្ត្រីទី៣ ដែលបានលាលែងពីតំណែងក្នុងរយៈពេលតិចជាងមួយខែ ដែលបង្ហាញពីការបែកបាក់យ៉ាងខ្លាំងនៅក្នុងសភារបស់ប្រទេសបារាំង៕
