ភ្នំពេញ៖ រសៀលថ្ងៃទី១៤ខែតុលាឆ្នាំ២០២៥ លោក តុប ឈុនសុង ចៅក្រមជំនុំជម្រះសាលាដំបូងរាជធានីភ្នំពេញនិងលោក លឹម ប៊ុនហេង ជាតំណាងអយ្យការ បានសម្រេចធ្វើការប្រកាសសាលក្រមផ្តន្ទាទោសលើជនជាប់ចោទឈ្មោះ ហ៊ុន ហេង ភេទប្រុស អាយុ៦១ឆ្នាំ ជនជាតិខ្មែរ ដាក់ពន្ធនាគារកំណត់៣ឆ្នាំ តែអនុវត្ត១ឆ្នាំ ទោសសល់ព្យួរ និងពិន័យជាទឹកប្រាក់ ៤លានរៀល ពីបទ បេីកបរបង្កគ្រោះថ្នាក់ចរាចរណ៍បណ្តាលឱ្យមានរបួស និងស្លាប់អ្នកដទៃ សាលក្រមនេះទុកសិទ្ធិឱ្យជនជាប់ចោទប្តឹងឧទ្ធរណ៍តាមកំណត់ច្បាប់។
គួររំលឹកថា លោក ឆែ វិវឌ្ឍនៈ ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី១៧ ខែឧសភា ឆ្នាំ២០២៥ បានសម្រេចចេញដីកាបង្គាប់ឱ្យឃុំខ្លួនជនត្រូវចោទឈ្មោះ ហ៊ុន ហេង អក្សរឡាតាំង HUN HENG ភេទប្រុសអាយុ ៦១ឆ្នាំជនជាតិខ្មែរ ទីកន្លែងកំណើត ភូមិកាច់ត្រក ឃុំលាយបូរ ស្រុកត្រាំកក់ ខេត្តតាកែវ អាសយដ្ឋានមុនពេលឃាត់ខ្លួនស្នាក់នៅផ្ទះលេខ១០៦ ផ្លូវលំ ភូមិមានជ័យ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ត្រូវបានដាក់ឱ្យស្ថិតក្រោមការពិនិត្យពីបទ បើកបរដោយធ្វេសប្រហែស និងស្ថិតក្នុងស្ថានភាពស្រវឹងបង្កគ្រោះថ្នាក់បណ្តាលឱ្យរបួស និងស្លាប់អ្នកដទៃ ប្រព្រឹត្តនៅចំណុចមុខក្រសួងវប្បធម៌ និងវិចិត្រសិល្បៈ លើមហាវិថីព្រះនរោត្តម ភូមិ១០ សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃទី១៥ ខែឧសភាឆ្នាំ២០២៥ តាមបញ្ញត្តិមាត្រា៨៣ កថាខណ្ឌ ២ ចំណុច ខ និង គ និងមាត្រា៨៥ កថាខណ្ឌ ២ ចំណុច ខ និង គ នៃច្បាប់ស្តីពីចរាចរណ៍ផ្លូវគោក។
ជនត្រូវចោទឈ្មោះ ហ៊ុន ហេង បានបើកបររថយន្ត១គ្រឿងម៉ាក LEXUS RX400h ពណ៌ទឹកមាស ពាក់ផ្លាកលេខ ភ្នំពេញ 2AQ-2188 ស្ថិតក្នុងស្ថានភាពស្រវឹងដែលមានអត្រាជាតិអាកុល ០.៣៥ Mg/L បានបុករះ បណ្ដាលឱ្យបុរសអ្នកបើកម៉ូតូកង់បីឥណ្ឌាម្នាក់ ឈ្មោះ រៀន សុនឿន ភេទប្រុស មានអាយុ៤៩ឆ្នាំ ស្លាប់ និងខូចខាតម៉ូតូ១គ្រឿង កង់បីឥណ្ឌា ២គ្រឿង និងរថយន្តព្រុស១គ្រឿង និងអ្នករងរបួសច្រេីននាក់ផ្សេងទៀត៕
អត្ថបទ៖ ចតុម្មុខ
