យោងតាមសារពត៌មាន Khoasod របស់ថៃ បានឱ្យដឹងថា អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្ស លោកស្រី ម៉ារី ឡាវល័រ (Mary Lawlor) បានបង្ហាញពីការព្រួយបារម្ភយ៉ាងខ្លាំងអំពីសុវត្ថិភាព និងការវាយប្រហារតាមប្រព័ន្ធអ៉ីនធឺណិតប្រឆាំងនឹងលោកស្រី អាំងខៈណា នីឡាផៃចិត្រ (Agkhana Neelapaijit) ដែលជាសមាជិកព្រឹទ្ធសភាថៃ បន្ទាប់ពីលោកស្រី បានប្រកាសយ៉ាងចំហ ថា ថៃពិតជាបានប្រើប្រាស់យន្ដហោះចម្បាំង F-16 និង វាយប្រហារមកលើកម្ពុជាមុន និងក្រោយពេលលោកស្រីបានចេញការប្រឆាំងពីការចាក់សំឡេងរំខានប្រជាពលរដ្ឋខ្មែរ ពីសំណាក់ក្រុមជ្រុលនិយម និងអ្នកគាំទ្រ «កាន់ចមផៈឡាំង»។ នេះបើតាមការបង្ហោះនៅលើបណ្តាញសង្គម X របស់លោកស្រីផ្ទាល់ នៅថ្ងៃពុធ ទី១៥ ខែតុលា ឆ្នាំ២០២៥។
លោកស្រី ឡាវល័រ (Lawlor) បានសរសេរថា «ការការពារការពិត យុត្តិធម៌ និងសេចក្តីថ្លៃថ្នូរ មិនមែនជាឧក្រិដ្ឋកម្មទេ។ លោកស្រី Angkhana ត្រូវតែទទួលបានការការពារ មិនមែនការចោទប្រកាន់ ឬការបំផ្លើសនោះទេ»។
ការលើកឡើងរបស់សមាជិកព្រឹទ្ធសភារូបនេះ កំពុងធ្វើឱ្យក្រុមជ្រុលនិយមថៃ បានព្រួតគ្នាសម្ដែងការស្អប់ខ្ពើម ការគំរាមកំហែងអាយុជីវិត និងចាត់ទុកលោកស្រីជាជនក្បត់ជាតិផងដែរ។ លើសពីនេះ ក្រុមជ្រុលនិយមថៃ បានទាមទារឱ្យលោកស្រី លាលែងពីតំណែងជាសមាជិកព្រឹទ្ធសភាថែមទៀត៕
