ព្រះខ័នរាជស្វាយរៀង ឈរកំពូលតារាង ពូល D នៃពានរង្វាន់ AFC Challenge League ២០២៥-២៦ Group Stage វគ្គចែកពូល (តំបន់ខាងកើត) ក្រោយយកឈ្នះ ក្រុម SP Falcons របស់ម៉ុងហ្គោលី ក្នុងលទ្ធផល ៣-០ កាលពីថ្ងៃទី២៦ តុលា ២០២៥ ក្នុងពហុកីឡដ្ឋានជាតិមរតតេជោ។
ថិតក្នុងការតាមដានក្នុងក្រសែភ្នែកអ្នកគាំទ្រ ជាង ១ម៉ឺននាក់ ព្រះខ័នរាជស្វាយរៀង ពិតជាធ្វើបានយ៉ាងល្អ ដោយនៅវគ្គទី១ ខ្សែប្រយុទ្ធ Peprah Kwame សញ្ជាតិហ្គាណា រកបាន ១គ្រាប់ បើកការនាំមុខនៅនាទីទី១៨ ឆានដល់ចុងវគ្គទី១ នៅនាទីទី៣៣ Peprah Kwame បន្ថែម ១គ្រាប់ទៀត បង្កើនភាពសប្បាយរីករាយកាន់តែខ្លាំងដល់អ្នកគាំទ្រ។
លុះដល់វគ្គទី២ ព្រះខ័នរាជស្វាយរៀង បន្តដាក់សម្ពាធលើក្រុមភ្ញៀវ SP Falcons នៅរក្សាលទ្ធផល ២-០ រហូតដល់នាទី ទី៩០ បូក១ ទើបខ្សែការពារសញ្ជាតិជប៉ុន Takashi Odawara បន្ថែម ១គ្រាប់ទៀត មុនបញ្ចប់ការប្រកួត។
តារាងចំណាត់ថ្នាក់ពូល D ដែលមានព្រះខ័នរាជស្វាយរៀង ជាម្ចាស់ផ្ទះ រួមមាន៖
- ព្រះខ័នរាជស្វាយរៀង របស់កម្ពុជា ឈ្នះ១ មាន ៣ពិន្ទុ
- Manila Digger FC របស់ហ្វីលីពីន ឈ្នះ១ មាន ៣ពិន្ទុ
- SP Falcons របស់ម៉ុងហ្គោលី ចាញ់១ មាន ០ពិន្ទុ
- Ezra FC របស់ឡាវ ចាញ់១ មាន ០ពិន្ទុ។
ដោឡែកសម្រាប់ពូល E ដែលមានភ្នំពេញក្រោន ក្រោយស្មើ ១-១ ជាមួយម្ចាស់ផ្ទះ Dewa United៖
- Tainan City FC របស់តៃវ៉ាន់ ឈ្នះ១ មាន ៣ពិន្ទុ
- Dewa United របស់ឥណ្ឌូណេស៊ី ស្មើ១ មាន ១ពិន្ទុ
- ភ្នំពេញក្រោន របស់កម្ពុជា ស្មើ១ មាន ១ពិន្ទុ
- Shan United របស់មីយ៉ាន់ម៉ា ចាញ់១ មាន ០ពិន្ទុ។
កម្មវិធីប្រកួត៖
ពូល D
- ថ្ងៃទី២៩ ខែតុលា ឆ្នាំ២០២៥ Ezra FC របស់ឡាវ ប៉ះ ព្រះខ័នរាជស្វាយរៀង ម៉ោង ៧:០០ នាទីយប់
- ថ្ងៃទី១ ខែវិច្ចិកា ឆ្នាំ២០២៥ Manila Digger FC របស់ហ្វីលីពីន ប៉ះ ព្រះខ័នរាជស្វាយរៀង ម៉ោង ៧:០០ នាទីយប់ ខណៈការប្រកួតទាំង ៣របស់ព្រះខ័នរាជស្វាយរៀង គឺធ្វើឡើងនៅនៅពហុកីឡដ្ឋានជាតិមរតកតេជោ។
ពូល E
- ថ្ងៃទី២៩ ខែតុលា ឆ្នាំ២០២៥ ភ្នំពេញក្រោន ប៉ះ Shan United របស់មីយ៉ាន់ម៉ា ម៉ោង ៣:០០នាទីរសៀល
- ថ្ងៃទី១ ខែវិច្ចិកា ឆ្នាំ២០២៥ Tainan City របស់តៃវ៉ាន់ ប៉ះ ភ្នំពេញក្រោន ម៉ោង ៣:០០នាទីរសៀល ខណៈការប្រកួតទាំង៣របស់ភ្នំពេញក្រោន ធ្វើឡើងនៅ កីឡដ្ឋាន Indomilk Arena។
សូមជម្រាបថា កម្មវិធីប្រកួតវគ្គជម្រុះក្នុងពូលតាមតំបន់ទាំងពីរគឺនឹងចាប់ផ្ដើមនៅថ្ងៃទី២៥ តុលា សម្រាប់តំបន់អាស៊ីខាងលិច និងថ្ងៃទី២៦ តុលា សម្រាប់តំបន់អាស៊ីខាងកើត ខណៈវគ្គផ្ដាច់ព្រ័ត្រ ពានរង្វាន់កម្រិតទី៣ ប្រចាំទ្វីប AFC Challenge League ២០២៥-២៦ នេះ នឹងធ្វើឡើងនៅថ្ងៃទី៩ ខែឧសភា ឆ្នាំ២០២៦ ខាងមុខ៕
