ក្រុមបាល់ទាត់ជម្រើសជាតិកូរ៉េខាងជើង អាយុក្រោម ១៧ឆ្នាំ បានធ្លាក់ចេញពីពានរង្វាន់ FIFA U-17 World Cup ឆ្នាំ២០២៥ ក្រោយចាញ់ក្រុមជម្រើសជាតិជប៉ុន អាយុក្រោម ១៧ឆ្នាំ ដោយបាល់កាត់សេចក្ដី ១១ម៉ែត្រ បន្ទាប់ពីស្មើគ្នា ១-១ ពេញ៩០នាទី។
ដូចនេះគិតត្រឹមថ្ងៃទី២០ វិច្ឆិកានេះ បានរកឃើញក្រុមខ្លាំងចំនួន ៨ ឡើងមកកាន់វគ្គ ៨ក្រុមចុងក្រោយ រួមមាន៖ ព័រទុយហ្គាល់ ស្វីស ម៉ារ៉ុក ប្រេស៊ីល អូទ្រីស ជប៉ុន អ៊ីតាលី និងប៊ូគីណាហ្វាសូ។ ស្របពេលការប្រកួត នឹងធ្វើឡើងនៅថ្ងៃទី២១ វិច្ឆិកា ឆ្នាំ២០២៥។
កម្មវិធីប្រកួតវគ្គ ៨ក្រុម ខាងក្រោម៖
- ព័រទុយហ្គាល់ ប្រកួតជាមួយ ស្វីស
- ម៉ារ៉ុក ប្រកួតជាមួយ ប្រេស៊ីល
- អូទ្រីស ប្រកួតជាមួយ ជប៉ុន
- អ៊ីតាលី ប្រកួតជាមួយ ប៊ូគីណាហ្វាសូ
ព្រឹត្តិការណ៍ប្រកួត ពានរង្វាន់ FIFA U-17 World Cup ឆ្នាំ២០២៥ មាន ៤៨ប្រទេស ជ្រើសចេញពី ៦តំបន ជុំវិញពិភពលោក ដើម្បីរកក្រុមខ្លាំង ៣២ក្រុម ឡើងទៅកាន់វគ្គ Knockout stage ខណ:ការប្រកួតនឹងចាប់ពីថ្ងៃទី៣ រហូតដល់ ថ្ងៃទី២៧ ខែវិច្ឆិកា ឆ្នាំ២០២៥ ទើរកឃើញម្ចាស់ជើងឯក នៅទឹកដីប្រទេសកាតា។
គួរបញ្ជាក់ថា ពានរង្វាន់ FIFA U-17 World Cup បង្កើតឡើងដំបូងនៅឆ្នាំ១៩៨៥ ដោយក្រុមជម្រើសជាតិនីហ្សេរីយ៉ា អាយុក្រោម ១៧ឆ្នាំ ឈ្នះជើងច្រើនជាងគេ ៥លើក (១៩៨៥, ១៩៩៣, ២០០៧, ២០១៣, ២០១៥) ប្រេស៊ីល ៤លើក (១៩៩៧, ១៩៩៩, ២០០៣, ២០១៩) ហ្គាណា ២លើក (១៩៩១, ១៩៩៥) មុិកសុិក ២លើក (២០០៥, ២០១១) និងអាល្លឺម៉ង់ បារាំង សហភាពសូវៀត អារ៉ាប៊ីសាអូឌីត ស្វីស និងអង់គ្លេស បាន១លើកដូចគ្នា៕
