នាយករដ្ឋមន្រ្តីម៉ាឡេស៊ី និងជាប្រធានប្ដូរវេនអាស៊ាន លោក អាន់វ៉ា អ៉ីប្រាហ៊ីម បានជំរុញឱ្យប្រទេសថៃ និងកម្ពុជា អនុវត្តវិធានការ «អត់ធ្មត់ជាអតិបរិមា» បន្ទាប់ពីភាគីថៃ បានបើកការបាញ់ប្រហារតាមផ្លូវអាកាសមកលើកម្ពុជាមុន ចាប់តាំងពីថ្ងៃទី៧ ខែធ្នូ រហូតដល់ថ្ងៃទី៨ ខែធ្នូ ឆ្នាំ២០២៥នេះ នៅតាមតំបន់ព្រំដែនមួយចំនួនរវាងប្រទេសទាំង២។ នេះបើយោងតាមការចេញផ្សាយដោយសារព័ត៌មាន Freemalaysia នាថ្ងៃចន្ទ ទី៨ ខែធ្នូ ឆ្នាំ២០២៥។
នៅក្នុងការបង្ហោះមួយលើបណ្ដាញសង្គមរបស់លោក លោក Anwar Ibrahim បាននិយាយថា ប្រទេសថៃ និងកម្ពុជា គឺជាដៃគូជិតស្និទ្ធរបស់ប្រទេសម៉ាឡេស៊ី និងជាសមាជិកសំខាន់ៗរបស់អាស៊ាន។ យើងសូមជំរុញឱ្យភាគីទាំងពីរអនុវត្តការអត់ធ្មត់អតិបរមា រក្សាបណ្តាញទំនាក់ទំនងបើកចំហ និងប្រើប្រាស់យន្តការដែលមានស្រាប់។ ប្រទេសម៉ាឡេស៊ីត្រៀមខ្លួនជាស្រេចដើម្បីគាំទ្រជំហានដែលអាចជួយស្តារភាពស្ងប់ស្ងាត់ និងជៀសវាងឧប្បត្តិហេតុបន្ថែមទៀត។
លោក បន្ថែមថា តំបន់របស់យើងមិនអាចមានលទ្ធភាពមើលឃើញជម្លោះយូរអង្វែងធ្លាក់ចូលទៅក្នុងវដ្តនៃការប្រឈមមុខដាក់គ្នានោះទេ។ អាទិភាពបន្ទាន់ គឺការបញ្ឈប់ការប្រយុទ្ធ ការពារជនស៊ីវិល និងត្រឡប់ទៅរកមាគ៌ាការទូតដែលគាំទ្រដោយច្បាប់អន្តរជាតិ និងស្មារតីអ្នកជិតខាងដែលអាស៊ានពឹងផ្អែក។
ដោយឡែក លោក ម៉ូហាម៉េត ហាសាន (Mohamad Hasan) រដ្ឋមន្ត្រីក្រសួងការបរទេសបានជំរុញឱ្យប្រទេសថៃ និងកម្ពុជាធ្វើការពិគ្រោះយោបល់គ្នាទៅវិញទៅមកតាមរយៈបណ្តាញទ្វេភាគីនៅថ្នាក់មូលដ្ឋាន។
លោកបាននិយាយនៅក្នុងសេចក្តីថ្លែងការណ៍មួយថា «ម៉ាឡេស៊ីជឿជាក់ថា តាមរយៈការសន្ទនាជាបន្តបន្ទាប់ ជំហានការទូតប្រកបដោយការស្ថាបនា និងការគោរពយន្តការទ្វេភាគីដែលមានស្រាប់ សន្តិភាព និងស្ថិរភាពអាចត្រូវបានរក្សាសម្រាប់ផលប្រយោជន៍រួមនៃតំបន់»។
គួរបញ្ជាក់ថា ចាប់តាំងពីការវាយប្រហារពីភាគីថៃ កាលពីរសៀលថ្ងៃទី៧ ខែធ្នូ រហូតមកដល់ថ្ងៃទី៨ ខែធ្នូ នេះ ប្រទេសកម្ពុជា មិនបានធ្វើការបាញ់តបតទៅភាគីថៃវិញឡើយ ដោយកម្ពុជា បានប្ដេជ្ញាចិត្តយ៉ាងខ្ជាប់ខ្ជួនក្នុងការគោរព និងអនុវត្តតាមលក្ខខណ្ឌនៃបទឈប់បាញ់ និងសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ប្រកបដោយសុច្ឆន្ទៈ និងការទទួលខុសត្រូវខ្ពស់បំផុត។
ក្រសួងការពារជាតិកម្ពុជា បានបដិសេធ និងច្រានចោលទាំងស្រុងចំពោះការចោទប្រកាន់ទាំងឡាយរបស់ភាគីថៃ ដែលមានគោលបំណងបំភ័ន្តសាធារណមតិជាតិ និងអន្តរជាតិ និងយកមកធ្វើជាលេសដើម្បីបង្កឱ្យមានភាពតានតឹងផ្នែកយោធាជាមួយកម្ពុជាឡើងវិញ៕
