ស្ថានការណ៍ព្រំដែនកម្ពុជា-ថៃឡើងកម្ដៅវិញ កងទ័ពកម្ពុជានៅតែប្រកាន់យកការមិនតបត ខណៈបន្ទាត់ក្រហមត្រូវបានកំណត់

ព័ត៌មានចុងក្រោយ គិតមកត្រឹមម៉ោង ១១:០០ ថ្ងៃទី ៨ ខែធ្នូ ឆ្នាំ ២០២៥ នេះ យោធាថៃនៅបន្តបាញ់ប្រហារមកលើកងទ័ព និងលើទីតាំងជនស៊ីវិលកម្ពុជានៅឡើយ។ កងកម្លាំងកម្ពុជាបាននឹងកំពុងបន្តតាមដានលើការ វិវត្ត នៃស្ថានការណ៍នៅតាមបណ្ដោយព្រំដែនកម្ពុជា-ថៃ និងស្ថិតក្នុងការប្រុងប្រយ័ត្នខ្ពស់ជានិច្ច។ នេះបើយោងតាមការ រាយការណ៍ របស់ក្រសួងការពារជាតិកម្ពុជា។

តាមក្រសួងការពារជាតិកម្ពុជា នៅថ្ងៃទី ៨ ខែធ្នូ នេះ យោធាថៃបានបន្តបើកការបាញ់ប្រហារសាជាថ្មីមកលើកងកម្លាំងកម្ពុជា ចាប់ពីវេលាម៉ោងប្រមាណ ០៥:០៤ នាទីព្រឹក។ ការបើកការវាយប្រហារនេះធ្វើឡើង នៅក្នុងតំបន់ អានសេះ នៅប្រាសាទតាមាន់ធំ នៅតំបន់ប្រាសាទព្រះវិហារ នៅ ៥ មករា នៅចំការចេក នៅ មុំបី នៅភ្នំខ្មោច នៅ គោល ៨ នៅប្រាសាទតាក្របី និងនៅប្រាសាទខ្នារ ក្រោយពីភាគីថៃបានបើកការបាញ់ប្រហារមកលើ កម្លាំងកងទ័ពកម្ពុជាវេលាម៉ោង ២:១៥ នាទីរសៀល កាលពីថ្ងៃទី ៧ ខែធ្នូ ឆ្នាំ២០២៥។

របាយការណ៍ ក្រសួងការពារជាតិកម្ពុជា បានឱ្យដឹងថា កងទ័ពថៃបានប្រើប្រាស់អាវុធជាច្រើនប្រភេទមានទាំង កាំភ្លើងដៃ កាំភ្លើងយន្ត កាំភ្លើងត្បាល់ កាំភ្លើងធំ រថក្រោះ និងយន្តហោះ F-16 ផងដែរ។

ក្រសួងការពារជាតិបញ្ជាក់ថា កងកម្លាំងកម្ពុជាមិនទាន់បានតបតអ្វីនៅឡើយទេ ដោយព្យាយាមប្រកាន់ខ្ជាប់បំផុតនូវការគោរព និងការអនុវត្ត បទឈប់បាញ់ និងសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ រួមទាំងគោលការណ៍ដែលបានឯកភាពគ្នា រវាងភាគីកម្ពុជា-ថៃ ដោយឈរលើមូលដ្ឋាន នៃការដោះស្រាយ រាល់បញ្ហាដោយសន្តិវិធី ត្រឹមត្រូវ និង ស្របតាម ច្បាប់អន្តរជាតិ។

ប្រមុខរាជរដ្ឋាភិបាលកម្ពុជា មិនទាន់បញ្ចេញប្រតិកម្មណាមួយ ចំពោះការវាយប្រហារពីសំណាក់ភាគីថៃ នៅឡើយទេ។ ប៉ុន្តែអតីតនាយករដ្ឋមន្ត្រី ដែលជាប្រធានព្រឹទ្ធសភាកម្ពុជា និងជាមេទ័ពចាស់ដែលនៅតែមានឥទ្ធិពល គឺសម្តេចតេជោ ហ៊ុន សែន បានព្រមានអំពីបន្ទាត់ក្រហម ដែលត្រូវតបតបានកំណត់រួចហើយ។

សម្តេចតេជោ បានប្រាប់មេបញ្ជាការគ្រប់ជាន់ថ្នាក់ ត្រូវអប់រំនាយទាហាន និងពលទាហានឱ្យយល់ដឹងគ្រប់ៗគ្នា។ តាមរយៈសារដែលបង្ហោះលើទំព័រហ្វេសប៊ុកផ្លូវការនៅព្រឹកថ្ងៃទី ៨ ធ្នូ នេះ សម្ដេចតេជោ បាន សូម ការយោគយល់ពីភ្ញៀវជាតិ និងអន្តរជាតិដែលមិនអាចជួប សម្តែងការគួរសម និង ពិភាក្សា ការងារបាន។ ព្រោះសម្តេចបានយកពេលវេលាត្រៀមខ្លួន ដើម្បីមករួមជាមួយនាយករដ្ឋមន្ត្រី បញ្ជាការ លើកម្លាំងប្រដាប់អាវុធទប់ទល់ជាមួយការឈ្លានពាន។

នៅឯ កូឡាឡាំពួ លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានប្ដូរវេនអាស៊ាន ដែលបាន សហការ រៀបចំឲ្យមាន កិច្ចព្រមព្រៀង បទឈប់បាញ់ និងសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ បានសម្តែងការព្រួយបារម្ភយ៉ាងខ្លាំងចំពោះរបាយការណ៍នៃការប៉ះទង្គិចគ្នាដោយអាវុធសាជាថ្មីរវាងកងកម្លាំងកម្ពុជា និងថៃតាមបណ្តោយព្រំដែន។ ជាមួយនឹងសារចូលរួមរំលែកទុក្ខដល់ក្រុមគ្រួសាររងគ្រោះដោយ ជម្លោះ នេះ លោក អាន់វ៉ា បានលើកឡើងទំនងជា ខកចិត្ត ចំពោះការខិតខំប្រឹងប្រែងយ៉ាងសកម្មក្នុងការចូលរួមរក្សាសន្តិភាព និងស្ថេរភាពនៅតាមព្រំដែននៃប្រទេសទាំងពីរ៕

អត្ថបទ៖ ឈិន ធារ៉ាត់