សហព័ន្ធបាល់ទាត់អាស៊ី (AFC) បានបញ្ជាក់ពីផែនការនៃការបង្កើតពានរង្វាន់បាល់ទាត់ថ្មីមួយមានឈ្មោះថា «AFC Nations League» ដែលមានគោលបំណងពង្រឹងបាល់ទាត់ក្រុមជម្រើសជាតិនៅទូទាំងទ្វីបអាស៊ី។
បើយោតាមការចេញផ្សាយដោយកាសែត The Daily Star បានបញ្ជាក់ថាសហព័ន្ធកីឡាបាល់ទាត់ប្រចាំទ្វីបអាស៊ី (AFC) បង្កើតពាន AFC Nations League នេះឡើងក្នុងគោលដំបងធំៗចំនួនបី រួមមាន៖
- ទី១) ធានាបាននូវការប្រកួតទៀងទាត់ និងមានអត្ថន័យក្នុងអំឡុងពេលប្រកួតអន្តរជាតិរបស់ FIFA
- ទី២) បង្កើតការប្រកួតដែលមានតុល្យភាពតាមរយៈការប្រកួតប្រជែងជាលំដាប់ៗ
- ទី៣) កែលម្អស្ថេរភាពប្រតិទិន និងប្រសិទ្ធភាពចំណាយសម្រាប់សមាគមសមាជិកទាំងអស់
- ទី៤) ផ្តល់ជូននូវផ្លូវអភិវឌ្ឍន៍ និងវឌ្ឍនភាពច្បាស់លាស់សម្រាប់ក្រុមជម្រើសជាតិ
លោក Datuk Seri Windsor John អគ្គលេខាធិការ AFC បានថ្លែងថា៖« Nations League នឹងមិនត្រឹមតែជំរុញគុណភាពកីឡាប៉ុណ្ណោះទេ ប៉ុន្តែថែមទាំងទាក់ទាញចំណាប់អារម្មណ៍ផ្នែកពាណិជ្ជកម្ម និងការផ្សាយយ៉ាងខ្លាំងផងដែរ ដែលធ្វើឱ្យបាល់ទាត់អន្តរជាតិអាស៊ី កាន់តែមានការប្រកួតប្រជែង និងមានទីផ្សារ។
សូមរំឭកថា បច្ចុប្បន្ននេះ AFC បានរៀបចំការប្រកួតពានរង្វាន់ធំៗចំនួន៤ សម្រាប់ក្រុមជម្រើសជាតិទូទាំងទ្វីបអាស៊ី៖
- ទី១) ពានរង្វាន់ជើងឯកអាស៊ី AFC Asian Cup គឺជាពានរង្វាន់ធំបំផុតប្រចាំទ្វីបអាស៊ី ដែលធ្វើឡើងរៀងរាល់៤ឆ្នាំម្តង ហើយចំពោះពានរង្វាន់ធំជាងគេមួយនេះប្រៀបបាននឹងពាន Euro របស់ទ្វីបអឺរ៉ុប ដែរ។
- ទី២) ពានរង្វាន់នារីទ្វីបអាស៊ី AFC Women’s Asian Cup ជាពានរង្វាន់កំពូលសម្រាប់ក្រុមបាល់ទាត់នារីក្នុងទ្វីបអាស៊ី។
- ទី៣) AFC U23 Asian Cup ពានរង្វាន់សម្រាប់យុវជនអាយុក្រោម ២៣ឆ្នាំ។
- ទី៤) AFC Asian Qualifiers រួមជាមួយ World Cup Qualifiers ទោះបីជាមិនមែនជាការលើកពានផ្ទាល់ ប៉ុន្តែការប្រកួតជម្រុះ World Cup គឺជាព្រឹត្តិការណ៍ដ៏ធំ និងសំខាន់បំផុតមួយដែល AFC រៀបចំ ដើម្បីយកក្រុមដែលជាសមាជិកទាំងអស់ឡើងទៅជុំផ្តាច់ព្រ័ត្រ ព្រឹត្តិការណ៍បាល់ទាត់ពិភពលោក FIFA World Cup ។
សូមជម្រាបថា ប្រសិនបើគម្រោងនោះនៃការបង្កើតពានរង្វាន់ AFC Nations League កើតឡើងមែនពិត នោះក្រុមបាល់ទាត់ជម្រើសជាតិកម្ពុជា នឹងស្ថិតនៅកម្រិតទី៣ League C ដែលមាន ១២ប្រទេស បែងចែកជា៤ពូល ដោយ១ពូលមាន៣ក្រុម៕
