ម៉ិកស៊ិក៖ អាជ្ញាធរម៉ិកស៊ិកបាននិយាយកាលពីថ្ងៃអាទិត្យ ទី២៨ ខែធ្នូ ថា យ៉ាងហោចណាស់មនុស្ស ១៣នាក់បានស្លាប់ បន្ទាប់ពីរថភ្លើងមួយខ្សែដឹកមនុស្ស ២៥០នាក់បានក្រឡាប់ធ្លាក់ចេញពីផ្លូវរត់នៅរដ្ឋ Oaxaca ភាគខាងត្បូងប្រទេស។ នេះបើយោងតាមការចេញផ្សាយដោយសារព័ត៌មាន CNA នាថ្ងៃចន្ទ ទី២៩ ខែធ្នូ ឆ្នាំ២០២៥។
កងទ័ពជើងទឹកម៉ិកស៊ិកបានឱ្យដឹងថា រថភ្លើងដែលបានធ្លាក់ផ្លូវនៅជិតទីក្រុង Nizanda បានដឹកសមាជិកនាវិក ៩នាក់ និងអ្នកដំណើរសរុបចំនួន ២៤១នាក់។ ក្នុងចំណោមអ្នកជិះលើរថភ្លើងទាំងនោះ មនុស្សចំនួន ១៣៩នាក់ត្រូវបានគេរាយការណ៍ថា បានរួចផុតពីគ្រោះថ្នាក់ ខណៈ ៩៨នាក់បានរងរបួសក្នុងនោះមាន ៣៦នាក់កំពុងសង្រ្គោះបន្ទាន់។
ប្រធានាធិបតីម៉ិក លោកស្រី Claudia Sheinbaum បានបង្ហោះនៅលើបណ្ដាញសង្គម X ថា អ្នករបួស ៥នាក់ស្ថិតក្នុងស្ថានភាពធ្ងន់ធ្ងរ ដោយបន្ថែមថា ក្រុមមន្ត្រីជាន់ខ្ពស់ត្រូវបានបញ្ជូនទៅកាន់កន្លែងកើតហេតុ ដើម្បីជួយដល់គ្រួសាររបស់អ្នកបាត់បង់ជីវិត។
ជាមួយគ្នា អភិបាលរដ្ឋ Oaxaca លោក Salomon Jara Cruz បានសម្តែងការរំលែកទុក្ខដល់ក្រុមគ្រួសារសពក្នុងឧបទ្ទវហេតុនេះ ហើយបាននិយាយថា អាជ្ញាធររដ្ឋកំពុងសម្របសម្រួលជាមួយភ្នាក់ងារសហព័ន្ធ ដើម្បីជួយដល់អ្នកដែលរងផលប៉ះពាល់ទាំងនោះ។
ទាក់ទិននឹងបញ្ហានេះ ការិយាល័យអគ្គមេធាវីរបស់ប្រទេសម៉ិកស៊ិក បានបើកការស៊ើបអង្កេតលើឧប្បត្តិហេតុនេះ។
សូមជម្រាបថា រថភ្លើងមួយខ្សែនេះ ត្រូវបានសម្ពោធដាក់ឱ្យប្រើប្រាស់ក្នុងឆ្នាំ២០២៣ ដែលជាផ្នែកមួយនៃគម្រោងច្រករបៀងអន្តរសមុទ្រដ៏ធំ ដើម្បីតភ្ជាប់កំពង់ផែសមុទ្រប៉ាស៊ីហ្វិក Salina Cruz ជាមួយកំពង់ផែ Coatzacoalcos នៃឆ្នេរសមុទ្រ Gulf។ រដ្ឋាភិបាលម៉ិកស៊ិកមានបំណងអភិវឌ្ឍតំបន់នេះឱ្យទៅជាច្រករបៀងពាណិជ្ជកម្មយុទ្ធសាស្ត្រ ដើម្បីប្រកួតប្រជែងជាមួយព្រែកជីកប៉ាណាម៉ាផងដែរ៕
