[ភ្នំពេញ]៖ ក្នុងស្មារតីបុរេសកម្មដើម្បីការពារសន្តិសុខសង្គម និងកិត្តិយសជាតិនៅលើឆាកអន្តរជាតិ ឯកឧត្តម នាយឧត្តមសេនីយ៍ ស ថេត អគ្គស្នងការនៃអគ្គស្នងការដ្ឋាននគរបាលជាតិ បានដាក់ចេញនូវបទបញ្ជាម៉ឺងម៉ាត់ដល់កងកម្លាំងនគរបាលជាតិទាំងអស់ ត្រូវត្រៀមលក្ខណៈជានិច្ចក្នុងការឆ្លើយតប និងបង្ក្រាបរាល់បទល្មើសបច្ចេកវិទ្យា ជាពិសេសល្បែងឆបោកតាមប្រព័ន្ធអនឡាញ (Online Scams) ដែលកំពុងយាយីដល់សុវត្ថិភាពសង្គម។
ការថ្លែងបែបនេះ បានធ្វើឡើងនៅក្នុងឱកាសដែលឯកឧត្តមអគ្គស្នងការ អញ្ជើញជាអធិបតីក្នុង «សន្និបាតបូកសរុបសភាពការណ៍ លទ្ធផលកិច្ចប្រតិបត្តិការឆ្នាំ២០២៥ និងដាក់ចេញទិសដៅការងារឆ្នាំ២០២៦» នៅព្រឹកថ្ងៃទី៣០ ខែធ្នូ ឆ្នាំ២០២៥ នាទីស្តីការក្រសួងមហាផ្ទៃ ដោយមានការចូលរួមពីថ្នាក់ដឹកនាំនគរបាលជាតិ និងស្នងការរាជធានី-ខេត្ត សរុបប្រមាណ ៤០០រូប។
ក្នុងអង្គសន្និបាត ឯកឧត្តម នាយឧត្តមសេនីយ៍ ស ថេត បានសម្តែងនូវការកោតសរសើរយ៉ាងជ្រាលជ្រៅចំពោះកងកម្លាំងនគរបាលគ្រប់លំដាប់ថ្នាក់ ដែលបានលះបង់កម្លាំងកាយចិត្តការពារសន្តិសុខ និងសណ្តាប់ ធ្នាប់ជូនប្រជាពលរដ្ឋបានយ៉ាងល្អប្រសើរក្នុងឆ្នាំកន្លងទៅ។ ឯកឧត្តមបានបញ្ជាក់ថា សមិទ្ធផលទាំងនេះកើតចេញពីការទទួលខុសត្រូវខ្ពស់ និងសាមគ្គីភាពផ្ទៃក្នុងដ៏រឹងមាំរបស់អង្គភាពនីមួយៗ។
ទិសដៅយុទ្ធសាស្ត្រឆ្នាំ២០២៦៖ «សកម្ម រហ័ស និងមានប្រសិទ្ធភាព»
ដើម្បីឆ្លើយតបទៅនឹងការវិវត្តនៃបទល្មើសក្នុងយុគសម័យឌីជីថល ឯកឧត្តមអគ្គស្នងការបានសង្កត់ធ្ងន់លើចំណុចគន្លឹះចំនួន ៤ សម្រាប់ឆ្នាំ២០២៦៖
- ការបោសសម្អាតបទល្មើសបច្ចេកវិទ្យា៖ ត្រូវបង្កើនការស្រាវជ្រាវ និងបង្ក្រាបឱ្យខាងតែបាននូវរាល់សកម្មភាពឆបោកតាមប្រព័ន្ធអនឡាញ ដើម្បីការពារទ្រព្យសម្បត្តិប្រជាពលរដ្ឋ និងកិត្តិយសប្រទេសជាតិ។
- ការពង្រឹងគោលនយោបាយភូមិ-ឃុំមានសុវត្ថិភាព៖ បង្កើនការបង្ក្រាបគ្រឿងញៀន ក្មេងទំនើង ល្បែងស៊ីសង និងការជួញដូរមនុស្សនៅតាមមូលដ្ឋានផ្ទាល់។
- យន្តការអន្តរាគមន៍បន្ទាន់៖ រាល់ការស្នើសុំជំនួយ ឬអន្តរាគមន៍ពីប្រជាពលរដ្ឋ ត្រូវតែមានកម្លាំងចុះទៅដោះស្រាយភ្លាមៗ ប្រកបដោយប្រសិទ្ធភាព និងវិជ្ជាជីវៈ។
- អភិបាលកិច្ច និងសាមគ្គីភាព៖ ថ្នាក់ដឹកនាំអង្គភាពត្រូវតាមដាន និងវាយតម្លៃការងារជាប្រចាំ ដើម្បីស្វែងរកចំណុចខ្វះខាត និងដោះស្រាយបញ្ហាប្រឈមនានាឱ្យបានទាន់ពេលវេលា។
ជាទីបញ្ចប់ ឯកឧត្តមអគ្គស្នងការ បានជំរុញឱ្យកងកម្លាំងទាំងអស់បន្តកិច្ចសហការឱ្យកាន់តែជិតស្និទ្ធជាមួយស្ថាប័នពាក់ព័ន្ធ ដើម្បីធានាថាឆ្នាំ២០២៦ គឺជាឆ្នាំនៃការបន្តពង្រឹងសន្តិសុខ និងការអភិវឌ្ឍន៍សម្រាប់សង្គមជាតិទាំងមូល៕
ប្រភព៖អគ្គនាយកដ្ឋានបច្ចេកវិទ្យាឌីជីថលនិងផ្សាយព្វផ្សាយអប់រំ