[ភ្នំពេញ]៖ ក្នុងស្មារតីមនុស្សធម៌ដ៏ខ្ពង់ខ្ពស់ ថ្នាក់ដឹកនាំ និងមន្ត្រីរាជការនៃសាលាដំបូង និងអយ្យការអមសាលាដំបូងរាជធានីភ្នំពេញ ប្រមាណ ៥០០នាក់ បានរួមគ្នាបង្កើតព្រឹត្តិការណ៍សប្បុរសធម៌ដ៏ធំមួយ តាមរយៈការបរិច្ចាគឈាមដោយស្ម័គ្រចិត្ត ដើម្បីសង្គ្រោះជីវិតមនុស្ស និងបង្ហាញនូវកតញ្ញូតាចំពោះវីរកងទ័ព កាលពីថ្ងៃទី០៥ ខែមករា ឆ្នាំ២០២៦ នេះ។
ក្រោមប្រធានបទ «ផ្ដល់ឈាមដើម្បីជួយសង្គ្រោះប្រជាជន និងដឹងគុណដល់វីរកងទ័ព» ឯកឧត្តម ងួន ណារ៉ា ប្រធានសាលាដំបូង និងឯកឧត្ដម ច្រឹង ខ្មៅ ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ បានដឹកនាំមន្ត្រីគ្រប់ជាន់ថ្នាក់ រួមមាន ចៅក្រម ព្រះរាជអាជ្ញារង ក្រឡាបញ្ជី និងអាជ្ញាសាលា ធ្វើជាគំរូក្នុងការបរិច្ចាគឈាមដោយផ្ទាល់។
ឯកឧត្តមប្រធានសាលាដំបូង បានសង្កត់ធ្ងន់ថា៖ «ឈាមមួយដបដែលយើងបរិច្ចាគនៅថ្ងៃនេះ គឺជាក្តីសង្ឃឹម និងជាការតភ្ជាប់ជីវិតរបស់មនុស្សម្នាក់ ឬច្រើននាក់»។ ឯកឧត្តមបានបន្ថែមថា នេះជាសកម្មភាពមនុស្សធម៌ដ៏សំខាន់ដែលអង្គការសុខភាពពិភពលោក (WHO) តែងតែលើកទឹកចិត្ត ដើម្បីធានាសុវត្ថិភាពឈាមក្នុងប្រព័ន្ធសុខាភិបាល។
អត្ថប្រយោជន៍ដ៏មហាសាលដែលមិនគួររំលង
លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានលើកសរសើរពីទឹកចិត្តរបស់មន្ត្រីយុត្តិធម៌ និងបានរំឭកថា ការផ្ដល់ឈាមផ្ដល់នូវគុណសម្បត្តិ ៣ យ៉ាង៖
- សុខភាពផ្ទាល់ខ្លួន៖ ទទួលបានការពិនិត្យឈាមរកជំងឺឆ្លង (ថ្លើម បេ-សេ, ស្វាយ, អេដស៍) ដោយសម្ងាត់, កាត់បន្ថយជាតិដែកលើសក្នុងឈាម និងកាត់បន្ថយហានិភ័យនៃជំងឺបេះដូង និងមហារីក។
- គុណធម៌សង្គម៖ ជាការបង្ហាញនូវវប្បធម៌ចែករំលែក និងសាមគ្គីភាពជាតិ ក្រោមស្លោក «យើងទាំងអស់គ្នាអាចធ្វើបាន»។
- បុណ្យកុសលតាមបែបសាសនា៖ តាមពុទ្ធឱវាទ ការបរិច្ចាគឈាមគឺជា «ទានឧបបារមី» ដែលជាការលះបង់ដ៏ខ្ពង់ខ្ពស់ (លះបង់សរីរាង្គ/កោសិកា) ដើម្បីសង្គ្រោះជីវិតសត្វលោក។
ព្រឹត្តិការណ៍នេះមិនត្រឹមតែជាការបំពេញការងារតាមវិជ្ជាជីវៈប៉ុណ្ណោះទេ ប៉ុន្តែគឺជាការបង្ហាញពីបេះដូងសប្បុរសរបស់មន្ត្រីរាជការក្នុងវិស័យយុត្តិធម៌ ចំពោះសុខុមាលភាពសង្គម។ ឈាមដែលទទួលបានពីយុទ្ធនាការនេះ នឹងត្រូវប្រគល់ជូនមជ្ឈមណ្ឌលជាតិផ្តល់ឈាម ដើម្បីយកទៅប្រើប្រាស់ក្នុងករណីសង្គ្រោះបន្ទាន់នៅតាមមន្ទីរពេទ្យនានាទូទាំងប្រទេស៕
អត្ថបទ៖ចតុមុខ