ម្ចាស់ជើងឯកឆ្នាំចាស់ ស្នងការដ្ឋាននគរបាលខេត្តស្វាយរៀង បានប្រកាសពីការវិលត្រលប់មកវិញពីសំណាក់កីឡាករ Sherigar Praful អ្នកធ្វើរនាំងកណ្តាលល្អជាងគេ និងកីឡាករ Nguyễn Văn Quốc Duy ជនជាតិវៀតណាម ត្រៀមចូលរួមក្នុងការប្រកួតពានរង្វាន់សម្តេចក្រឡាហោម ស ខេង លើកទី៤ ឆ្នាំ២០២៦ ។
ចំពោះកីឡាករ Sherigar Praful រូបគេធ្លាប់បានចូលរួមជាមួយក្លិបបាល់ទះស្នងការដ្ឋាននគរបាលខេត្តស្វាយរៀង ១លើករួចមកហើយ ដោយក្នុងនោះធ្លាប់ប្រកួតក្នុងពានរង្វាន់តេជោលីគ និងជាប់ឈ្មោះជាកីឡាករធ្វើរនាំកណ្តាល ល្អជាងគេ ថែមទៀតផង។
សូមបញ្ជាក់ថា ពានរង្វាន់បាល់ទះសម្តេចក្រឡាហោម ស ខេង លើកទី៤ ឆ្នាំ២០២៦នេះ មាន៣២សមាគម-ក្លិប មកពី ២៥រាជធានី-ខេត្តទូទាំងប្រទេសកម្ពុជាចូលរួមប្រកួត ចំពោះផ្នែកបុរស និង៨សមាគម-ក្លិប សម្រាប់ផ្នែកនារី។
បើនិយាយពីរូបមន្តប្រកួតផ្នែកបុរសគឺ ក្រុមទាំង៣២នៃផ្នែកបុរសត្រូវបានបែងចែកជា៨ពូល ក្នុងមួយពូលគឺមានចំនួន៤ក្រុម ខណៈផ្នែកនារីវិញគឺបែងចែកជា២ពូល ក្នុងមួយពូលមានចំនួន៤ក្រុម ដូចគ្នា ។ក្រុមដែលមានចំណាត់ថ្នាក់លេខ១ដល់លេខ២ក្នុងពូលនីមួយៗទាំង៨ពូល នឹងមានឈ្មោះឡើងទៅកាន់ការប្រកួតវគ្គ១៦ក្រុមចុងក្រោយ និងបន្តប្រកួតជម្រុះយកក្រុមទៅវគ្គ៨ក្រុម រហូតដល់វគ្គផ្តាច់ព្រ័ត្រ។
សូមរំឮកថា ក្លិបកីឡាបាល់ទះស្នងការដ្ឋាននគរបាលខេត្តស្វាយរៀង គឺជាម្ចាស់ជើងឯក នៃពានរង្វាន់សម្តេចក្រឡាហោម ស ខេង លើកទី៣ កន្លងទៅ ក្រោយយកឈ្នះសមាគមកីឡាបាល់ទះក្រសួងមហាផ្ទៃ ដោយលទ្ធផល ៣-២ នៅវគ្គផ្តាច់ព្រ័ត្រ ខណៈការប្រកួតនោះធ្វើឡើងនៅពហុកីឡដ្ឋានជាតិ រាជធានីភ្នំពេញ។
គូរឱ្យដឹងថា ពានរង្វាន់សម្តេចក្រឡាហោម ស ខេង រដូរកាលទី១ រៀបចំឡើងដំបូងនៅឆ្នាំ២០២២ ម្ចាស់ជើងឯក គឺសមាគមកីឡាបាល់ទះវិសាខា B, រដូលកាលទី២ ឆ្នាំ២០២៣ ម្ចាស់ជើងឯក គឺសមគមកីឡាបាល់ទះក្រសួងមហាផ្ទៃ B និងចុងក្រោយរដូវកាលទី៣ ឆ្នាំ២០២៤ ម្ចាស់ជើងឯក គឺស្នងការដ្ឋាននគរបាលខេត្តស្វាយរៀង៕
កម្មវិធីប្រកួតពានរង្វាន់សម្តេចក្រឡាហោម ស ខេង លើកទី៤
